- మన ఐరన్ డోమ్ 2035 నాటికి అందుబాటులోకి వస్తది: ప్రధాని మోదీ
- శత్రువులు దాడికి యత్నిస్తే వారికి ఇక నాశనమే
- టెర్రరిస్టు దాడులు జరిగితే గత ప్రభుత్వాలు పట్టించుకోలే
- ఇప్పుడు ఇది న్యూ ఇండియా.. ఎవరి ముందు తలవంచదు
- ఆపరేషన్ సిందూర్.. ప్రపంచం చూసిందని వెల్లడి
- ఉడుపిలో శ్రీ కృష్ణ మఠం సందర్శన.. లక్ష కంఠ గీతా పారాయణం
- సౌత్ గోవాలో 77 అడుగుల శ్రీరాముడి కాంస్య విగ్రహ ఆవిష్కరణ
ఉడుపి(కర్నాటక): దేశ భద్రతా కవచం ‘సుదర్శన చక్రం’ అని ప్రధానమంత్రి నరేంద్ర మోదీ అన్నారు. ఇదొక ఐరన్ డోమ్ మాదిరి పని చేస్తుందని తెలిపారు. ‘‘శత్రువులు మన దేశం వైపు కన్నెత్తి చూస్తే లేదా దాడికి ప్రయత్నిస్తే.. మన ఈ ‘సుదర్శన చక్రం’ వారిని నాశనం చేస్తది. 2035 నాటికి పూర్తి స్థాయిలో అందుబాటులోకి వస్తది. ఇది దేశంలోని కీలక ప్రాంతాలు, సంస్థల చుట్టూ శత్రువులు చొరబడలేనంత పటిష్టమైన భద్రతా కవచాన్ని నిర్మిస్తుంది. దేశానికి ఒక రక్షణ గోడలా ఉంటది. ఎర్రకోట వేదికగా మనం శ్రీకృష్ణుడి దయ, కరుణ గురించి సందేశం ఇచ్చాం. అదే స్ఫూర్తితో ఇప్పుడు ‘మిషన్ సుదర్శన చక్ర’ను ప్రకటిస్తున్నాం’’అని మోదీ అన్నారు. కర్నాటక పర్యటనలో భాగంగా శుక్రవారం మంగళూరు ఎయిర్‌‌‌‌‌‌‌‌పోర్ట్ నుంచి హెలికాప్టర్‌‌‌‌‌‌‌‌లో ఉడుపికి చేరుకున్న మోదీ.. పెద్ద సంఖ్యలో భక్తులతో రోడ్ షోలో పాల్గొన్నారు. అనంతరం ఉడుపిలోని ప్రసిద్ధ శ్రీకృష్ణ మఠాన్ని సందర్శించారు. కృష్ణ దేవాలయం ముందు ఉన్న సువర్ణ తీర్థ మండపాన్ని ప్రారంభించారు. అనంతరం లక్ష కంఠ భగవద్గీత పఠనంలో పాల్గొని గీతా పారాయణం చేశారు. అనంతరం భక్తులు, గాయకులను ఉద్దేశించి ప్రధాని మోదీ ప్రసంగించారు. ‘‘కురుక్షేత్ర యుద్ధభూమిలో శ్రీకృష్ణుడు చెప్పినట్లుగా.. ధర్మాన్ని, శాంతిని స్థాపించాలంటే చెడును అంతం చేయడం తప్పనిసరి. ఇదే మా ప్రభుత్వ భద్రతా విధానం. గతంలో టెర్రరిస్ట్ దాడులు జరిగినప్పుడు అప్పటి ప్రభుత్వాలు ఏం చేయకుండా చూస్తుండిపోయాయి. కానీ, న్యూ ఇండియా అలా కాదు. ఎవరి ముందు తలవంచదు. దేశ రక్షణ విషయంలో ఎన్నటికీ వెనుకడుగు వేయదు. ఆపరేషన్ సిందూర్‌‌‌‌‌‌‌‌లో మన సంకల్పాన్ని ప్రపంచం చూసింది. మన ‘మిషన్ సుదర్శన చక్ర’.. శత్రువులను నాశనం చేస్తుంది. వెనుకడుగు వేయదు’’అని మోదీ అన్నారు.
భగవద్గీత నుంచి స్ఫూర్తి పొందాలి
తాను గుజరాత్ (ద్వారక) నుంచి వచ్చానని, ఉడుపిలోని కృష్ణ విగ్రహాన్ని రుక్మిణీ దేవి ద్వారకలో పూజించేదని పురాణాల ప్రస్తావన తెస్తూ.. ఈ రెండు ప్రాంతాల మధ్య ఉన్న ఆధ్యాత్మిక బంధాన్ని ప్రధాని మోదీ గుర్తుచేశారు. అయోధ్య రామ మందిర ఉద్యమంలో ఉడుపి పీఠాధిపతుల పాత్ర ఎంతో ఉందని, అక్కడ మధ్వాచార్యుల పేరిట ఒక ద్వారం ఏర్పాటు కావడం గర్వకారణమని అన్నారు. ‘‘భగవద్గీతలో శ్రీకృష్ణుడి బోధనలు ప్రతి యుగానికి సంబంధించినవి. మన జాతీయ విధానాన్ని శ్రీకృష్ణుడి బోధనలు నిర్దేశిస్తాయి. ప్రజా సంక్షేమం కోసం పనిచేయాలని కృష్ణుడు బోధించాడు. ‘సబ్‌‌‌‌‌‌‌‌కా సాథ్‌, సబ్‌‌‌‌‌‌‌‌కా వికాస్‌’, ‘సర్వజన్‌ హితయ’, ‘పీఎం ఆవాస్’, ‘ఆయుష్మాన్ భారత్’ వంటి పథకాలు గీత నుంచి స్ఫూర్తి పొందినవే. మహిళల రక్షణపై శ్రీ కృష్ణుడి సందేశమే.. రిజర్వేషన్ల చట్టానికి మార్గనిర్దేశనం. శాంతి, సత్యాన్ని సాధించడం కోసం అవసరమైతే దురాగతాలకు పాల్పడే వారిని అణిచివేయాలని భగవద్గీత మనకు బోధిస్తుంది’’అని ప్రధాని మోదీ అన్నారు.
ఇండియా.. విశ్వ గురువుగా మారుతున్నది
శ్రీకృష్ణుడి ఆశీస్సులతో, గీతా స్ఫూర్తితో ఇండియా.. విశ్వగురువుగా మారుతున్నదని ప్రధాని మోదీ తెలిపారు. ‘‘800 ఏండ్ల చరిత్ర కలిగిన ఉడుపి శ్రీ కృష్ణ మఠాన్ని సందర్శించి, కృష్ణుడిని దర్శించుకోవడం సంతోషంగా ఉంది. కనకదాసులకు శ్రీకృష్ణుడు దర్శనమిచ్చిన ప్రదేశంగా భావించే ‘కనక కిండి’ (చిన్న కిటికీ) నుంచి దేవుడిని దర్శించుకున్నాను. అక్కడ ఏర్పాటు చేసిన ‘కనక కవచాన్ని’ (బంగారు కవచం) జాతికి అంకితం చేస్తున్నాం’’అని మోదీ తెలిపారు. అంతకుముందు కృష్ణ ఆలయానికి చేరుకున్న ప్రధానికి పుతిగే మఠాధిపతి సుగుణేంద్ర తీర్థుల ఆధ్వర్యంలో అష్ట మఠాధిపతులు ఘనంగా స్వాగతం పలికారు.
శ్రీరాముడి కాంస్య విగ్రహావిష్కరణ
ప్రపంచంలోనే అత్యంత ఎత్తయిన శ్రీరాముడి కాంస్య విగ్రహాన్ని ప్రధాని మోదీ శుక్రవారం ఆవిష్కరించారు. సౌత్ గోవాలోని ‘శ్రీ సంస్థాన్‌ గోకర్ణ పర్తగాలీ జీవోత్తమ్‌ మఠం’లో కుశావతి నది ఒడ్డున 77 అడుగుల ఈ విగ్రహాన్ని ఏర్పాటు చేశారు. మఠం 550వ వార్షికోత్సవం సందర్భంగా మోదీ అక్కడ పర్యటించారు. శ్రీరాముడి విగ్రహానికి ప్రత్యేక పూజలు చేశారు. అదేవిధంగా, రామాయణ ఇతివృత్తంతో రూపొందించిన ‘రామాయణ థీమ్ పార్క్’ను కూడా ప్రారంభించారు. అలాగే, ప్రత్యేక పోస్టల్ స్టాంప్, స్మారక నాణెం విడుదల చేశారు. ఈ సందర్భంగా ప్రధాని మోదీ మాట్లాడారు. ‘‘ఈ 77 అడుగుల విగ్రహం కేవలం ఒక నిర్మాణం కాదు.. ఇది మన సంస్కృతికి, భక్తికి ప్రతీక. శ్రీరాముడి ఆదర్శాలు, ఆయన పాలన (రామరాజ్యం) మన దేశానికి ఎప్పటికీ స్ఫూర్తిదాయకం. ఈ విగ్రహం, రామాయణ థీమ్ పార్క్ తో గోవా కేవలం బీచ్‌‌‌‌‌‌‌‌లకే కాకుండా, ఆధ్యాత్మిక పర్యాటకానికి కూడా కేంద్రంగా మారుతుంది. 550 ఏండ్లుగా ‘గోకర్ణ పర్తగాలి మఠం’ హిందూ ధర్మాన్ని రక్షించడంలో, సమాజ సేవలో చేస్తున్న కృషి అద్భుతం’’అని మోదీ అన్నారు.
