ఇకపై జరగకుండా చర్యలు తీసుకోవాలని ఆదేశం
ఎక్కడైనా చేసినట్టు తెలిస్తే కఠిన చర్యలు తప్పవని వార్నింగ్
న్యూఢిల్లీ: మహిళపై అత్యాచారం జరిగిందా లేదా అని తెలుసుకోవడానికి ‘టూ ఫింగర్ టెస్టు’ను ఇంకా అమలు చేస్తున్నారా? అని కేంద్ర, రాష్ట్ర ప్రభుత్వాలను సుప్రీం కోర్టు ప్రశ్నించింది. 2013లోనే ‘టూ ఫింగర్ టెస్టు’ను తప్పుబట్టిన విషయాన్ని ఈ సందర్భంగా గుర్తుచేసింది. వెంటనే ఈ టెస్టును ఆపేయాలని ఆదేశాలు జారీ చేసింది. ఈ టెస్టుకు ఎలాంటి శాస్ర్తీయత లేదని పేర్కొంటూ ఇకపై ఎక్కడైనా టూ ఫింగర్ టెస్టు చేసినట్టు తెలిస్తే కఠిన చర్యలు తీసుకుంటామని హెచ్చరించింది.
ఓ రేప్ ఘటనకు సంబంధించిన విచారణలో భాగంగా జస్టిస్ డీవై చంద్రచూడ్, జస్టిస్ హిమా కోహ్లీ ఆధ్వర్యంలోని బెంచ్ ‘టూ ఫింగర్ టెస్ట్’పై కీలక వ్యాఖ్యలు చేసింది. టూ ఫింగర్ టెస్టు చేయడంతో మహిళల ఆత్మగౌరవం దెబ్బతింటుందని, ప్రైవసీకి భంగం కలుగుతుందని అభిప్రాయపడింది. ఇప్పటికీ సమాజంలో ఈ టెస్టు కొనసాగుతుండటం దురదృష్టకరమని తెలిపింది. ఇకపై ఎక్కడా ఈ టెస్ట్ జరగకుండా చూసుకోవాలని కేంద్ర, రాష్ట్ర ప్రభుత్వాలను ఆదేశించింది.
కేంద్ర, రాష్ట్ర ప్రభుత్వాలతో పాటు హెల్త్ సెక్రటరీలు ‘టూ ఫింగర్ టెస్టు’కు ప్రత్యామ్నాయ పద్ధతులు కనుగొనాలని, వాటిపై హెల్త్ వర్కర్లకు ట్రైనింగ్ ఇవ్వాలని సూచించింది. గవర్నమెంట్, ప్రైవేట్ మెడికల్ కాలేజీ పుస్తకాల్లోని ‘టూ ఫింగర్ టెస్ట్’ అంశాన్ని సమీక్షించి, వెంటనే తొలగించాలని ఆదేశించింది. అత్యాచారం, హత్య చేసిన నిందితుడిని నిర్దోషిగా ప్రకటిస్తూ జార్ఖండ్ హైకోర్టు ఇచ్చిన తీర్పును సుప్రీం బెంచ్తోసిపుచ్చింది. అతన్ని దోషిగా పేర్కొంటూ ట్రయల్ కోర్టు నిర్ణయాన్ని సమర్థించింది.