న్యూఢిల్లీ: నీట్ పేపర్ లీకేజీకి వ్యతిరేకంగా ఢిల్లీలో జరిగిన నిరసనల్లో పోలీసుల బలప్రయోగం ఆరోపణలపై విచారణ జరుపుతోన్న హైపవర్డ్ కమిటీకి సుప్రీంకోర్టు డెడ్ లైన్ విధించింది. ఇప్పటికే సేకరించిన సాక్ష్యాలతో నెలలోగా ప్రాథమిక విచారణ నివేదిక సమర్పించాలని సుప్రీంకోర్టు విశ్రాంత న్యాయమూర్తి జస్టిస్ ఆర్. సుభాష్‌ రెడ్డి నేతృత్వంలోని ఉన్నత స్థాయి కమిటీని దేశ సర్వోన్నత న్యాయస్థానం ఆదేశించింది. బాధితుల తరపున ఇతరులు సమర్పించే వీడియో ఆధారాలను కూడా పరిశీలించాలని కమిటీకి సూచించింది. ఫిర్యాదుల కోసం నిరంతరం వేచి చూడకుండా విచారణ ప్రక్రియను వేగవంతం చేయాలని ఆదేశించింది. అక్టోబర్ 31న కమిటీ సమర్పించిన నివేదికలో ఆరోపణలపై ఎలాంటి నిర్ధారణలు లేవని సీజేఐ జస్టిస్ సూర్యకాంత్ నేతృత్వంలోని ధర్మాసనం పేర్కొంది. అనంతరం ఈ కేసు తదుపరి విచారణను సుప్రీంకోర్టు రెండు వారాలకు వాయిదా వేసింది.
నీట్ పేపర్ లీకేజీకి వ్యతిరేకంగా 2026, జూలైలో కాక్రోచ్ జనతా పార్టీ నేతృత్వంలో ఢిల్లీలో పెద్ద ఎత్తున ఆందోళనలు జరిగిన విషయం తెలిసిందే. నిరసనకారులపై ఢిల్లీ పోలీసులు బలప్రయోగం చేశారని పెద్దఎత్తున ఆరోపణలు వెల్లువెత్తాయి. శాంతియుత నిరసనను అణిచివేసేందుకు పోలీసులు బలప్రయోగం చేయడాన్ని సవాల్ చేస్తూ సుప్రీంకోర్టులో పిటిషన్లు దాఖలయ్యాయి. ఈ పిటిషన్లపై విచారణ జరిపిన సుప్రీంకోర్టు.. పోలీసుల బలప్రయోగం ఆరోపణలపై విచారణ జరిపేందుకు సుప్రీంకోర్టు విశ్రాంత న్యాయమూర్తి జస్టిస్ ఆర్. సుభాష్‌ రెడ్డి నేతృత్వంలో ఐదుగురు సభ్యులతో కూడిన హైపవర్డ్ కమిటీ ఏర్పాటు చేసింది.
పంజాబ్ హైకోర్టు మాజీ ప్రధాన న్యాయమూర్తి రవిశంకర్ ఝా, ఢిల్లీ హైకోర్టు మాజీ న్యాయమూర్తి జస్టిస్ శాలిందర్ కౌర్, మాజీ సీబీఐ డైరెక్టర్ రిషి కుమార్ శుక్లా, రిటైర్డ్ మేఘాలయ డీజీపీ డాక్టర్ ఎల్.ఆర్. బిష్ణోయ్ను న్యాయస్థానం ఈ కమిటీలో సభ్యులుగా అపాయింట్ చేసింది. నిరసనల సమయంలో పోలీసులు ఎంత మేరకు బలప్రయోగం చేశారు.. పరిస్థితికి అనుగుణంగానే చేశారా లేదా అనేది విచారించి నివేదిక సమర్పించాలని కమిటీని ఆదేశించింది. సుప్రీంకోర్టు ఆదేశాల మేరకు ఉన్నత స్థాయి కమిటీ ముమ్మరంగా దర్యాప్తు జరుపుతోంది.
