తెలుగు రాష్ట్రాల్లో సంచలనం రేపుతున్న లక్ష్మీస్ ఎన్టీఆర్ సినిమా విడుదల కాకుండా ఆదేశాలు ఇవ్వాలంటూ ఎన్నికల సంఘాన్ని కోరింది తెలుగుదేశం పార్టీ. టీడీపీ నాయకుడు దేవిబాబు చౌదరి ఎన్నికల కమిషన్‌ ను కలిసి లక్ష్మీస్ ఎన్టీఆర్ సినిమాపై ఫిర్యాదు చేశారు. ఈ చిత్రం రాబోయే ఎన్నికలపై ప్రభావం చూపుతుందని… సినిమాలో ఆంధ్రప్రదేశ్ సీఎం చంద్రబాబు నాయుడు పాత్రను ఉద్దేశపూర్వకంగా నెగెటివ్ గా చూపించారని అన్నారు. ఫస్ట్ ఫేజ్ పోలింగ్ ఏప్రిల్ 11న జరగనుండటంతో.. అప్పటివరకు ఈ సినిమా విడుదల కాకుండా ఆపాలని ఈసీని కోరారు టీడీపీ నేతలు.
సినిమా విడుదల ఆపేందుకు టీడీపీ చేస్తున్న ప్రయత్నాలపై దర్శకుడు రామ్ గోపాల్ వర్మ స్పందించారు. నరకం నుంచి కూడా నిజాన్ని ఎవరూ ఆపలేరని … ఈ సినిమాను ఆపాలనుకుంటున్నవాళ్లు తెల్సుకుంటే మంచిదని అన్నారు. చంద్రబాబును నెగెటివ్ గా చూపించానని అనుకుంటున్న వాళ్లు కూడా నిజం తెల్సుకోవాలన్నారు. తనను చంపినా కూడా లక్ష్మీస్ ఎన్టీఆర్ విడుదలవుతుందని చెప్పారు వర్మ. మార్చి 22న లక్ష్మీస్ ఎన్టీఆర్ విడుదలవుతుందని ఇప్పటికే ప్రకటించారు.
