- అసంపూర్తిగా మెయిన్ కెనాల్స్, డిస్ట్రిబ్యూటరీలు, పిల్ల కాలువలు
- పెండింగ్ పనులపై దృష్టి పెట్టిన కొత్త ప్రభుత్వం
మహబూబ్నగర్, వెలుగు: రాష్ట్రంలో 75 శాతం పూర్తయిన ప్రాజెక్టుల్లో పెండింగ్ పనులను పూర్తి చేసేందుకు రాష్ట్ర సర్కారు సన్నాహాలు చేస్తోంది. ఈ మేరకు సీఎం రేవంత్రెడ్డి సొంత జిల్లా అయిన పాలమూరు జిల్లాలో పెండింగ్ ప్రాజెక్టులపై సర్కారు ఫోకస్ పెట్టింది. జిల్లాలోని ప్రాజెక్టుల వారీగా పెండింగ్ పనుల వివరాలు సేకరిస్తోంది. రాష్ట్ర బడ్జెట్ సమావేశాల్లో ఫండ్స్ కేటాయించి, లక్ష్యం మేరకు ఆయకట్టుకు సాగునీరు అందించేలా ప్లాన్ చేస్తోంది.
10 శాతం పనులు కంప్లీట్ చేయలే..
జలయజ్ఞంలో భాగంగా ఉమ్మడి ఏపీ ప్రభుత్వ హయాంలో అప్పటి సీఎం వైఎస్సార్పాలమూరు జిల్లాకు సాగునీటిని అందించేందుకు స్కీమ్లను అందుబాటులోకి తెచ్చారు. జూరాల, శ్రీశైలం బ్యాక్ వాటర్ ఆధారంగా మహాత్మాగాంధీ కల్వకుర్తి లిఫ్ట్ ఇరిగేషన్(ఎంజీకేఎల్ఐ), నెట్టెంపాడు, రాజీవ్ భీమా స్కీమ్లను ఏర్పాటు చేశారు. అప్పటికే అందుబాటులో ఉన్న కోయిల్సాగర్ రిజర్వాయర్ కెపాసిటీని పెంచి అదనపు ఆయకట్టుకు సాగునీటిని అందించేలా కెనాల్స్ డిజైన్ చేశారు.
2014 నాటికి ఈ స్కీమ్లలో దాదాపు 90 శాతం పనులు కంప్లీట్ అయ్యాయి. రాష్ట్ర విభజన జరగడంతో మిగిలిన పది శాతం పనులను గత ప్రభుత్వం నిర్లక్ష్యం చేసింది. చేయాల్సిన పనులను గాలికొదిలేసి సాగునీటిని విడుదల చేసింది. తామే పాలమూరు పెండింగ్ ప్రాజెక్టులను పూర్తి చేసి, ఆన్ గోయింగ్ ప్రాజెక్టులను తీర్చిదిద్దామని రైతులు, రాష్ట్ర ప్రజలను తప్పుదోవ పట్టించింది.
ఈ పదేండ్లలో కేవలం 2 శాతం పనులను మాత్రమే కంప్లీట్ చేసి చేతులు దులుపుకుంది. ఇప్పుడు తిరిగి కాంగ్రెస్ గవర్నమెంట్ రావడంతో పాలమూరు ప్రాజెక్టుల పెండింగ్ పనులపై దృష్టి పెట్టింది. బడ్జెట్లో రూ.500 కోట్ల నుంచి రూ.800 కోట్ల వరకు నిధులు కేటాయించి రానున్న రెండేండ్లలో పెండింగ్ పనులు పూర్తి చేసేందుకు సన్నాహాలు చేస్తోంది.
పదేండ్లుగా పెండింగ్లో ఉన్న స్కీమ్లు..
ఎంజీకేఎల్ఐలోని 28వ ప్యాకేజీ కింద కొల్లాపూర్ నియోజకవర్గంలోని కోడేరు, పెద్దకొత్తపల్లి ప్రాంతాలకు సాగునీరు అందడం లేదు. 29 ప్యాకేజీ కింద 58 కిలోమీటర్ల మేరకు కెనాల్స్ పనులు పెండింగ్లో ఉన్నాయి. ఈ పనులు కంప్లీట్ అయితే కల్వకుర్తి ప్రాంతంలోని 60 వేల ఎకరాలకు సాగునీరు అందుతుంది. 30వ ప్యాకేజీ కింద 23 కిలోమీటర్ల మేరకు కెనాల్స్ పనులు చేయాల్సి ఉంది. ఈ పనులు పూర్తయితో అచ్చంపేట నియోజకవర్గంలోని 30 వేల ఎకరాలకు సాగునీరు అందుతుంది.
నెట్టెంపాడు కింద మెయిన్ కెనాల్, పిల్ల కాలువల పనులు పెండింగ్లో ఉన్నాయి. ఈ పనులు పూర్తయితే 10 వేల ఎకరాలకు సాగునీరు అందుతుంది. మూడేండ్ల కింద ర్యాలంపాడు రిజర్వాయర్కు పడిన బుంగకు రిపేర్లు చేయలేదు. ప్రస్తుతం ఈ రిజర్వాయర్ ఖాళీ అయింది.
కోయిల్సాగర్ కింద రైట్ మెయిన్ కెనాల్ పనులు పెండింగ్లో ఉన్నాయి. 2014 నుంచి డిస్ట్రిబ్యూటరీలు, పిల్ల కాలువల పనులు టేకప్ చేయలేదు. పుట్టగడ్డ, అప్పంపల్లి, చిత్తనూరు, కన్మనూరు, తండా, ఉందేకోడ్, ఎక్లాస్పూర్, కుమార్లింగంపల్లి గ్రామాల పరిధిలోని 18 వేల ఎకరాలకు సాగునీరు అందడం లేదు. ఉందేకోడ్లోని నాలుగు గొలుసు కట్టు చెరువులు, ఎక్లాస్పూర్, కుమార్లింగంపల్లి గ్రామాల్లోని చెరువులను ఈ కెనాల్ ద్వారా నింపాలని డిజైన్లో ఉన్నా, లింక్ కెనాల్ పనులు
చేయలేదు.
ALSO READ : బీఆర్‌‌‌‌ఎస్‌‌కు షాక్‌.. క్యాతనపల్లి మున్సిపాలిటీలో వీగిన అవిశ్వాసం
రాజీవ్ భీమా ప్రాజెక్టు కింద సంగంబండ రిజర్వాయర్ పరిధిలో ముంపు బాధితులకు రూ.13 కోట్ల పరిహారం చెల్లింపు పెండింగ్లో ఉంది. లో లెవల్ కెనాల్ పనుల్లో 400 మీటర్ల బండరాయి అడ్డుగా ఉంది. ఈ పనులు ఎనిమిదేండ్లుగా పెండింగ్లో ఉన్నాయి. ఈ బండరాయిని తొలిగిస్తే సంగంబండ, గుర్లపల్లి, వానాయకుంట, తిర్మలాపూర్, దాసర్దొడ్డి, ఓబులాపూర్, వడ్వాట్ గ్రామాల పరిధిలోని 8 వేల ఎకరాలకు సాగునీరు అందుతుంది. భూత్పూర్ రిజర్వాయర్ కింద రాజుపల్లి, నర్వ, రాంపూర్, లంకాల గ్రామాలకు వెళ్లే కెనాల్ పనులు అసంపూర్తిగా ఉన్నాయి.
