రానున్న పంచాయతీ ఎన్నికల్లో బీసీలకు 42శాతం రిజర్వేషన్ను బీజేపీ ప్రభుత్వం, కోర్టులు అంగీకరించే అవకాశం లేదు.. కనుక కాంగ్రెస్ పార్టీపరంగా 42 శాతం అభ్యర్థులను బీసీలను నిలబెడతామంటుంది. ఈ పద్ధతి కాంగ్రెస్కు ఒక పరీక్ష అయితే బీసీలకు కూడా ఒక పరీక్షే. కాంగ్రెస్ బీసీలను పెట్టినచోట బీఆర్ఎస్, బీజేపీ అగ్రకుల అభ్యర్థులను పెట్టే అవకాశం ఎక్కువ.
ఈ గ్రామస్థాయి ఎన్నికల్లో కాంగ్రెస్ను ఓడించడం ఆ రెండు పార్టీల లక్ష్యం. బీసీ అభ్యర్థులను 42శాతం వరకు నిలబెట్టడం
ఒక అంశం. ఆ పార్టీలో ఉన్న గ్రామస్థాయి అగ్రకులాలవారిని బీసీల కోసం పనిచేయించడం ఒక అంశం. ముఖ్యంగా రెడ్లు గ్రామస్థాయిలో పార్టీకి, ముఖ్యమంత్రికి సహకరించాలి.
గ్రామస్థాయిలో చాకలి, మంగలి నుంచి మున్నూరు కాపు దాదాపు 100 కులాలుగా ఉన్న బీసీలు మేం బీసీలం, మా పై కులాలవారు కారు అనే అవగాహన లేదు. కేవలం చదువుకోసమో, ఉద్యోగం కోసమో రిజర్వేషన్ సర్టిఫికెట్ కోసం ఆలోచించిన కుటుంబాలు మండల ఆఫీసులలో తమ పిల్లలకు సర్టిఫికెట్లు తీసుకున్న తల్లిదండ్రులకు మాత్రమే తాము బీసీలం అని తెలుసు. అందులో చాలామంది స్త్రీలకు అదొక గీటురాయి అని తెలియదు. తాము బీసీ కేటగిరీలో ఉన్నామని తెలియని కుటుంబాలు కూడా రాష్ట్రంలో చాలా ఉన్నాయి. రాజకీయరంగంలో పార్టీలలో పనిచేసే బీసీ నాయకులకు, కార్యకర్తలకు మాత్రమే తాము బీసీలమనే అవగాహన ఉంటుంది.
విద్యార్థులుగా, ముఖ్యంగా యూనివర్సిటీ స్థాయిలో తాము బీసీలమనే అవగాహన ఉంటుంది. ఉద్యోగులకూ ఉంటుంది. కానీ, ఈ రంగంలోకి రాని వ్యవసాయ కూలీలకు, చిన్న రైతులకు, స్కూలు వరకే విద్యను ఆపేసి గ్రామస్థాయిలో, వ్యవసాయమో మరో పనో చేసుకునే బతికే స్త్రీ, పురుషులకు బీసీ లిస్టులో వారి పేరు ఉన్నప్పటికీ అదొక సామాజిక కేటగిరీ అని వారికి తెలియదు. ఎస్సీలకు, ఎస్టీలకు చాలా కాలంగా ఎన్నికల రంగాల్లో కూడా వారి కులాలు ఉన్నాయి. కనుక కొంత అవగాహన ఉంటుంది. కానీ, బీసీలకు తమ కులం, గ్రామసంబంధాల్లో దాని స్థానం, పెళ్లిళ్లలో దాని పాత్ర తెలుసు కానీ రాజకీయాల్లో ఆ కేటగిరీ పాత్ర అసలు తెలియదు.
బీసీ ఐడెంటిటీ సంబంధాలు ఉన్నాయా?
ఈ మౌలిక అంశంపై సామాజిక శాస్త్ర రిసెర్చీ కూడా జరగలేదు. ఉదాహరణకు ఒక గ్రామంలో ఒక మున్నూరు కాపు స్త్రీ, పురుషుడో గొల్ల–కురుమ లేక పద్మశాలి లేక ముదిరాజు స్త్రీ, పురుషుడో బీసీగా సర్పంచ్కు పోటీ చేస్తాడనుకుందాం. ఆ ఊళ్లో ఉండే చాకలి, మంగలి, ఎరుకలి, పిచ్చకుంట్ల, గంగిరెద్దుల వంటి కుల స్త్రీ, పురుషులతో వారి సంబంధాలు బీసీలుగా మిత్ర సంబంధాలు ఉన్నాయా? అదే ఊర్లో ఒక రెడ్డి స్త్రీ, పురుషుడో వెలమ లేదా బ్రాహ్మణ లేదా కోమటి వంటి స్త్రీ, పురుషుడు పోటీచేస్తే ఆ గ్రామ కింది కులస్తులు బీసీలు గనక ఒక మున్నూరుకాపు, గొల్ల కురమకో, ముదిరాజు అభ్యర్థికో ఓటు వేయడానికి కావాల్సిన బీసీ ఐడెంటిటీ సంబంధాలు ఉన్నాయా? ఈ అవగాహన గ్రామస్థాయికి చేరిందా? కుల సంబంధాల్లో తేడా కనపడితే కదా ఓటు సంబంధాల్లో తేడా వచ్చేది. అది లేనప్పుడు ఎవరెక్కువ పైసలిస్తే వారికి ఆ ప్రజలు ఓటు వేస్తే తప్పుబట్టగలమా? అందరి బీసీల మధ్య కంచం–మంచం పొత్తులో ఏమైనా తేడా వచ్చిందా? బీసీ అనేది ఒక రాజ్యాంగ గ్రామ కుల ఐడెంటిటీ కాదు.
బీసీ సంఘాలు తెచ్చిన మార్పు
42శాతం బీసీ రిజర్వేషన్ కోసం బీసీ సంఘాలు చాలా పట్టణాల్లో, ఉద్యోగ విద్యార్థి వర్గాలలో పెరుగుతున్నాయి. మీడియాలో కొంత ప్రచారం ఉన్నది. పైన నేను పేర్కొన్న మార్పు ఏమాత్రమైనా తెచ్చిందా! గ్రామాల్లో ఈ సంఘాలు ప్రచారం చేస్తున్నాయా! బీసీలుకాని కులాల దగ్గర డబ్బు తెలంగాణలో కూడా కుటుంబ స్థాయిలో ఎక్కువే. ఈ విషయం క్యాస్ట్సర్వేలో కూడా తేలింది. కనుక కాంగ్రెస్లో ఉన్న అగ్ర కులాలను కాంగ్రెస్ పార్టీ భవిష్యత్ రీత్యా 2028లో మళ్లీ గెలవాలనే ఆకాంక్షతోనైనా బీసీ సర్పంచ్ అభ్యర్థికి ఓటు వేయించే అవకాశం ఉందా! పార్టీ అటువంటి ప్రచారం చేస్తుందా! బీఆర్ఎస్, బీజేపీలు కాంగ్రెస్ ఓడిపోయిందని చూపించడానికి ఎందుకైనా సిద్ధంగా ఉంటాయి.అది వారి రాజకీయ లక్ష్యం కూడా.
పార్టీపరంగా ఇచ్చే రిజర్వేషన్కు, చట్టపర రిజర్వేషన్లకు చాలా తేడా ఉంది. బీసీ కులాలు తమ మధ్య కులాతీత మిత్ర సంబంధాలు ఉన్నాయని భావించే గ్రామీణ సమాజం ఇంకా ఏర్పడలేదు. అటువంటప్పుడు రిజర్వుడు నియోజకవర్గాలలో.. అంటే గ్రామాలలో అంతా బీసీలు పోటీ చేశారు కనుక ఏ పార్టీ వ్యక్తిని గెలిపించినా బీసీ స్త్రీ, పురుషులే ఎన్నికవుతారు. కాంగ్రెస్ పార్టీ రిజర్వు చేసిన 23 నియోజకవర్గాలు, గ్రామాలు కాక ఎవరైనా స్త్రీ, పురుషులు పోటీ చేయగలిగే గ్రామాల్లో బీసీలను సపోర్టు చేసే బీసీలు కనీసం ఎక్కువ శాతం ఆ బీసీ అభ్యర్థికి ఓటు వేయాలి కదా! అలా వేయించుకోవడం ఎప్పుడు సాధ్యమవుతుంది?
గ్రామస్థాయిలో ప్రజాస్వామ్యం
గ్రామస్థాయి పంచాయతీ ఎన్నికలు ఉనికిలోకి వచ్చిన దగ్గర నుంచి గ్రామస్థాయి ప్రజాస్వామిక సంబంధాలు క్రమంగా మారాయి అనేది కూడా వాస్తవం. గ్రామాల అభివృద్ధి గ్రామ రాజకీయ, సామాజిక చైతన్యం ఈ వ్యవస్థ మూలంగా పెరుగుతున్నాయి. అయితే, గ్రామ పంచాయతీతోపాటు గ్రామ వ్యవస్థను బాగా మార్చడానికి గ్రామ స్కూలు చాలా కీలకమైన పాత్ర పోషిస్తుంది. ఈ స్కూళ్లను తెలంగాణలో ఇంగ్లిష్ మీడియంలోకి మారడం అభివృద్ధికి మరో మెట్టు. అయితే, ఎన్నికల చర్చలో గ్రామస్కూళ్లను సక్రమంగా పనిచేయించడం, ఇంగ్లిష్ మీడియం చదువుప తల్లిదండ్రులు, గ్రామ సర్పంచ్, వార్డు మెంబర్ తమ అభిప్రాయాలు స్పష్టంగా చెప్పే క్యాంపేన్ ప్రతి గ్రామంలో ఒక పోటీతత్వంలో పెరగాలి. జనరల్ కులాలకు కేటాయించిన గ్రామ సర్పంచ్ ఎన్నికల్లో బీసీ అభ్యర్థులు ఆ గ్రామం ప్రభుత్వ స్కూళ్లల్లో మంచి ఇంగ్లిష్ మీడియా విద్య కోసం ఏం చేశాడు లేదా చేసేది ఇంటింటికీ తిరిగి చెప్పడం చాలా ముఖ్యమైనది.
చాలామంది జనరల్ సీటుకు పోటీపడగలిగే అభ్యర్థులు తమ పిల్లలను కూడా దగ్గరి పట్టణ, ప్రైవేటు స్కూళ్లలో చదివించే స్థోమత కలవారే ఉంటారు. అగ్ర కులాలు లాగే వారికి గ్రామస్కూలు అభివృద్ధి అంత ముఖ్యమైనదిగా కనిపించదు. ఆయా స్కూళ్లలో పాఠాలు చెప్పే టీచరు కూడా తమ పిల్లలను ప్రైవేటు స్కూళ్లలో చదివిస్తారు. కనుక వీరంతా ప్రభుత్వ స్కూలును పట్టించుకోని వర్గంగా ఉంటున్నారు. జనరల్ సీటుకు పోటీపడే ఆర్థిక స్థోమత లేని బీసీలు, ఎస్సీలు, ఎస్టీలు తమ స్కూలు అభివృద్ధి గురించి పట్టించుకునే స్థితి ఉండదు. రోజువారీ కుటుంబాన్ని వెళ్లదీసుకునే పనుల్లో పిల్లల తల్లిదండ్రులు ఉంటారు.
గ్రామ ఎన్నికలు అభివృద్ధి అంశాలపై చర్చించాలి
ఒకప్పుడు గ్రామాలలో తాగునీటి వనరు కూడా ఉండేదికాదు. చదువు గురించి ఆలోచించే స్థితి మెజారిటీలో ఉండేది కాదు. పెద్ద భూస్వాములు కూడా గ్రామ ప్రజలపై ఆధిపత్యం కోసం ఆరాటపడటం తప్ప తమ పిల్లలకు పై చదువులపై ఖర్చుపెట్టేవారు కాదు. అందుకే, తెలంగాణ గ్రామాలు ఆంధ్రప్రదేశ్ గ్రామాల కంటే అభివృద్ధిలో, విద్యారంగంలో వెనుకబడి ఉన్నాయి. గత కొంతకాలంగా తెలంగాణ ఉద్యమం చుట్టే గ్రామాలు తిరిగాయి. విద్యావ్యవస్థ పటిష్టత గురించి గ్రామాల్లో ప్రజలు ఆలోచించలేదు. ఆ తరువాత పది సంవత్సరాలు టీఆర్ఎస్–బీఆర్ఎస్ పాలన కాలంలో వీటి వనరు స్థితి కొంత మారినప్పటికీ స్కూలు, కాలేజ్, యూనివర్సిటీ విద్యావ్యవస్థ పూర్తిగా దెబ్బతిన్నది. కేసీఆర్ గ్రామాల్లో చదువు, ముఖ్యంగా ఇంగ్లిష్ మీడియం విద్య పెరగకుండా చూడాలనే పట్టుదలతో ఉన్నట్టు కనపడింది. రెసిడెన్షియల్ స్కూళ్ల సంఖ్య పెరిగినప్పటికీ విద్యారంగాన్ని ముఖ్యమంత్రిగా కేసీఆర్ ఎన్నడూ పట్టించుకోలేదు. ఈ పంచాయతీ ఎన్నికలు గ్రామాల అభివృద్ధి, ముఖ్యంగా విద్యాభివృద్ధి గురించి చర్చించే ఎన్నికలు కావాలి. ఇప్పటికే చదువుకున్న యువతీ, యువకులు ఎన్నికల సందర్భంలో గ్రామాల్లో ఉండి అభివృద్ధి అంశాలపై, ఆయా గ్రామాల పరిస్థితులను అంచనావేసి చర్చకు పెట్టడం చాలా ముఖ్యం.
కాంగ్రెస్ పార్టీ కార్యకర్తలంతా కులాలకు అతీతంగా ఆ గ్రామంలోని బీసీ అభ్యర్థికి సపోర్టు చేసినప్పుడు మాత్రమే గెలుపు సాధ్యమవుతుంది. కాంగ్రెస్ బీసీలకు
42 శాతం రిజర్వేషన్ ఇవ్వాలని పట్టు పట్టిందనే అభిప్రాయం బీసీల్లో ఉంది. కానీ, కాంగ్రెస్ జనరల్ సీట్లలో అలా ఇవ్వడానికి వ్యతిరేకత ఉన్న అగ్ర కులస్తులు చాలామంది ఉన్నారు. డిసిప్లేన్ పార్టీలలో అలా ఉండదు. ఎవరి రాజకీయ ఇంట్రెస్టులు వారికి ఉంటాయి. అయినా పార్టీ నిర్మాణం బలంగా ఉన్న సూత్రాలకు, నిర్ణయాలకు కట్టుబడి ఉండడం అనే రాజకీయ నిర్మాణ పటిష్టత మీద ఆధారపడి ఉంటుంది. ఒకప్పుడు నిర్మాణ సూత్రాలకు కట్టుబడి పనిచేసిన కమ్యూనిస్టు పార్టీలోనే తమ తమ కుల అభ్యర్థులకు అనుకూలంగా కమ్యూనిస్టు నాయకులే ఓట్లు వేయించే స్థితికి కుల అభిమానం ఎదిగి ఉన్నది.
- ప్రొ. కంచ ఐలయ్య షఫర్డ్
