నేటి నుంచి రెండోవిడత బడ్జెట్ సమావేశాలు
ఫైనాన్స్ బిల్లుకే తొలిప్రాధాన్యం : కేంద్రం
న్యూఢిల్లీ : రెండో విడత బడ్జెట్ సమావేశాలు సోమవారం నుంచి మొదలుకానున్నాయి. ఈసారి ఫైనాన్స్ బిల్లును పాస్చేయడానికి తొలి ప్రాధాన్యమిస్తామని కేంద్రం చెబుతుండగా.. రాజకీయ ప్రత్యర్థలపైకి కేంద్ర దర్యాప్తు సంస్థలను ఉసిగొల్పుతున్న అంశాన్ని లేవనెత్తుతామని ప్రతిపక్షాలు అంటున్నాయి. హిండెన్ బర్గ్–అదానీ గ్రూపు వ్యవహారంపైనా సర్కారును నిలదీస్తామని చెబుతున్నాయి. ఉభయ సభల్లో ప్రస్తావించాల్సిన అంశాలపై చర్చించేందుకు ప్రతిపక్ష పార్టీలు సోమవారం ఉదయం భేటీ కానున్నాయి.
ఫైనాన్స్ బిల్లును పాస్ చేయించడానికే తాము తొలి ప్రాధాన్యమిస్తామని.. ఆ తర్వాతే విపక్షాల డిమాండ్లపై చర్చ నిర్వహిస్తామని పార్లమెంటరీ వ్యవహారాల శాఖ సహాయ మంత్రి అర్జున్ రాం మేఘ్వాల్ స్పష్టం చేశారు. రైల్వే, పంచాయతీ రాజ్, టూరిజం, సాంస్కృతిక, ఆరోగ్య శాఖలకు గ్రాంట్ల కేటాయింపునకు సంబంధించిన డిమాండ్లపై ఉభయ సభల్లో చర్చలు జరుగుతాయని తెలిపారు. ఇక సోమవారం బడ్జెట్ సెషన్ ప్రారంభం కాగానే కేంద్ర ఆర్థిక మంత్రి నిర్మలా సీతారామన్ 2022–23 ఆర్థిక సంవత్సరానికి సంబంధించి సప్లిమెంటరీ గ్రాంట్లను కోరుతూ వచ్చిన డిమాండ్లను చదివి వినిపిస్తారు. కేంద్రపాలిత ప్రాంతంగా మారిన జమ్మూకశ్మీర్ కు సంబంధించిన బడ్జెట్ (2023–24)ను కూడా నిర్మల ప్రవేశపెడతారు. ఏప్రిల్ 6 వరకు రెండో విడత బడ్జెట్సెషన్స్ కొనసాగనున్నాయి.
