- భవిష్యత్తులో ఉపయోగపడుతుందంటున్న మున్సిపల్ ఆఫీసర్లు
- లాభనష్టాలను బేరీజు వేసుకుంటున్న బాధితులు
వనపర్తి, వెలుగు: వనపర్తి పట్టణంలో టీడీఆర్(ట్రాన్స్ఫర్ ఆఫ్ డెవలప్మెంట్ రైట్స్)పై చర్చ నడుస్తోంది. 30 ఏళ్ల తరువాత వనపర్తిలో రోడ్ల విస్తరణ చేపట్టారు. పట్టణంలోని గోపాల్పేట, ఖిల్లాగణపురం, పాన్గల్, కొత్తకోట, పెబ్బేరు రోడ్ల విస్తరణ చేపడుతున్నారు. పెబ్బేరు రోడ్డు విస్తరణ ఇంకా ప్రారంభం కాలేదు. ఎమ్మెల్యే, కలెక్టర్లు ఇటీవల ఆ ప్రాంతంలోని వ్యాపారులతో మాట్లాడి విస్తరణకు సహకరించాలని కోరారు. విస్తరణకు ముందుకొచ్చే వారికి టీడీఆర్ ఇస్తామని చెప్పారు. అందుకు కొందరు ఒప్పుకున్నా, స్థలం పూర్తిగా కోల్పోతున్న వారు వెనుకాడుతున్నారు.
టీడీఆర్తో లాభం ఏమిటి?
ఉదాహరణకు 20×40 చదరపు అడుగుల దుకాణంలో 10 చదరపు అడుగులు రోడ్డు విస్తరణలో కోల్పోతే, మున్సిపాలిటీ 10 చదరపు అడుగులకు నాలిగింతలు అంటే 40 చదరపు అడుగులు సరెండర్ చేసినట్లు టీడీఆర్ సర్టిఫికెట్ ఇస్తుంది. ఆ తరువాత ఎక్కడైనా జీ ప్లస్ ఫోర్ అపార్ట్మెంట్ కట్టుకుంటే, ఐదో అంతస్తుకు అనుమతి లేకున్నా సదరు బాధితుడు ఈ సర్టిఫికెట్ను ఉపయోగించుకొని పర్మిషన్ తీసుకోవచ్చు. బాధితులు అపార్ట్మెంట్ కట్టుకోకున్నా, ఈ టీడీఆర్ సర్టిఫికెట్లోని స్థలాన్ని రిజిస్ట్రేషన్ ధరకు వేరే ఎవరికైనా అమ్ముకోవచ్చు. అంటే తాను కోల్పోయిన స్థలంపై నాలుగింతల రేటు బాధితుడికి వస్తుందన్న మాట.
వనపర్తిలోని పాలిటెక్నిక్ కాలేజీ నుంచి రామాలయం వరకు రోడ్డుకు ఇరువైపులా విస్తరణలో స్థలాలు కోల్పోయే వారు ఈ విషయంపై చర్చించుకుంటున్నారు. స్థలం కోల్పోతున్న వారు లాభనష్టాలను బేరీజు వేసుకొని, ఒక నిర్ణయం తీసుకోవాలని భావిస్తున్నారు. ఇక పట్టణంలోని వివేకానంద చౌరస్తా నుంచి బస్ డిపో వరకు 94 షాపులు ఉన్నాయి. ఈ రూట్లో రోడ్ను 80 ఫీట్లు వెడల్పు చేయాలని మార్కింగ్ ఇచ్చారు. దీంతో ఎడమ వైపు ఉన్న షాపులు తీవ్రంగా ప్రభావితం అవుతున్నాయి. విస్తరణలో 10 ఫీట్లు పోయే షాపులు నాలుగు ఉండగా, నాలుగైదు ఫీట్ల స్థలం మిగిలే షాపులు 25 దాకా ఉన్నారు. వీరు తమకు న్యాయం చేయాలని కోరుతున్నారు.
టీడీఆర్ పరిధి పెంచాలి..
టీడీఆర్ నువనపర్తి మున్సిపాలిటీకే పరిమితం చేయకుండా, ఇతర మున్సిపాలిటీలు, జీహెచ్ఎంసీలో చెల్లుబాటు అయ్యేలా ఇవ్వాలని కోరుతున్నారు. ఒక్క వనపర్తిలోనే టీడీఆర్ ఉపయోగించుకొని అపార్ట్మెంట్లు, ఇతర వాణిజ్య సముదాయాలు కట్టుకునే పరిస్థితి లేదని అంటున్నారు. పెద్ద మొత్తంలో స్థలాలు కోల్పోతున్న వారిలో కొందరికే టీడీఆర్తో ప్రయోజనం కలుగుతుందని పేర్కొంటున్నారు.
టీడీఆర్ కోసం ముందుకొస్తున్రు..
వనపర్తిలో రోడ్ల విస్తరణలో స్థలం కోల్పోతున్న వారు టీడీఆర్ కోసం ముందుకొచ్చి దరఖాస్తు చేసుకుంటున్నారు. దరఖాస్తులను పరిశీలించి టీడీఆర్ ఇస్తాం. పాలిటెక్నిక్ నుంచి రామాలయం వరకు ఉన్న రోడ్లో స్థలాలు కోల్పోతున్న వారిలో ఐదుగురు స్వచ్ఛందంగా తమ స్థలాలు అప్పగించేందుకు ముందుకొచ్చారు. విస్తరణలో నష్టపోయిన వారికి టీడీఆర్ ఉపయోగకరంగా ఉంటుంది.- వెంకటేశ్వర్లు, మున్సిపల్ కమిషనర్
