హైదరాబాద్, వెలుగు: సిటీ నుంచి ఇతర ప్రాంతాలకు వెళ్లే ఆర్టీసీ బస్సు ఉన్నదో, వెళ్లిపోయిందో తెలుసుకోవడం ప్రయాణికులకు సవాల్గా మారింది. సిటీ నుంచి జిల్లాలకు వెళ్లే డిస్ట్రిక్ట్ సర్వీసుల సమాచారం ఆర్టీసీ అధికారుల వద్ద ఉండటం లేదు. ఎంజీబీఎస్, జేబీఎస్తోపాటు శివారు ప్రాంతాల్లోని బస్టాపుల్లో ఎక్కడ అడిగినా సరైన సమాచారం దొరకడం లేదు. చాలా బస్టాపుల్లో కంట్రోలర్లు కూడా కనిపించడం లేదు. బస్సులు ఎక్కడున్నాయో ఆన్లైన్ ద్వారా తెలుసుకునేందుకు అధికారులు ట్రాకింగ్ సిస్టమ్ ఏర్పాటు చేశారు. అయితే రాజధాని, సూపర్ లగ్జరీ, ఎయిర్ పోర్ట్ పుష్పక్ బస్సులకు మాత్రమే ఉన్న ఈ ట్రాకింగ్ సిస్టమ్.. డీలక్స్, ఎక్స్ప్రెస్, పల్లె వెలుగు బస్సులకు లేదు. దీంతో వీటి సమాచారం తెలియకపోతుండటంతో బస్సుల కోసం బస్టాపుల్లో ప్యాసింజర్లు గంటల తరబడి వెయిట్ చేస్తున్నారు. వీటికి కూడా ట్రాకింగ్ సిస్టమ్ ఏర్పాటు చేయాలని కోరుతున్నారు.
హైల్ప్ లైన్కు కాల్ చేసినా నో రెస్పాన్స్
ఆర్టీసీ హెల్ప్లైన్ నంబర్లకి కాల్ చేసినా అన్ని బస్సుల సమాచారం దొరకడం లేదు. సిటీ నుంచి శివారు ప్రాంతాలకు, జిల్లాలకు వెళ్లే ఎక్స్ప్రెస్, పల్లె వెలుగు బస్సుల సమాచారం కావాలంటూ ప్యాసింజర్లు ఎంజీబీఎస్హెల్ప్లైన్ నంబర్కి కాల్ చేస్తే.. తమ వద్ద ఆఫ్లైన్ బస్సుల సమాచారం ఉండదని , కేవలం ట్రాకింగ్ ఏర్పాటు చేసిన బస్సుల సమాచారం మాత్రమే ఉంటుందని సమాధానం ఇస్తున్నారు. మరి ఆ బస్సుల వివరాలు ఎలా అని అడిగితే అవి ప్లాట్ ఫాం మీద నుంచి వెళ్లిపోతాయని, వాటి వివరాలు మేము తీసుకోమని అధికారులు సమాధానం ఇస్తున్నారని ప్యాసింజర్లు చెబుతున్నారు.
కంట్రోలర్లు ఉండట్లే ..
బస్సులకు సంబంధించి సమాచారం అందించేందుకు అన్ని బస్టాప్లలో ఆర్టీసీ కంట్రోలర్లు ఉన్నట్లు అధికారులు చెబుతున్నప్పటికీ కొన్ని చోట్ల మాత్రమే వారు ఉంటున్నారు. కంట్రోలర్లు ఉన్న దగ్గర కూడా ప్యాసింజర్లు అడిగినా వాటికి వారు సరైన సమాచారం ఇవ్వడం లేదు. కేవలం సిటీ బస్సుల్లో ప్యాసింజర్స్ను ఎక్కించేందుకే కంట్రోలర్లు పనిచేస్తున్నారు. జిల్లాలకు వెళ్లే బస్సుల సమాచారం అందించడం లేదు. కనీసం బస్సు ఉన్నదో, పోయిందో కూడా చెప్పడం లేదని ప్యాసింజర్లు అసహనం వ్యక్తం చేస్తున్నారు. తాము వెళ్లాల్సిన బస్సు ఎప్పుడొస్తుందో తెలియక ప్రైవేట్ వెహికల్స్లో వెళ్తున్నామని ప్యాసింజర్లు చెబుతున్నారు.
దశలవారీగా అందుబాటులోకి తెస్తం
ఇటీవల ‘ట్రాకింగ్ సిస్టమ్’ అమల్లోకి తీసుకొచ్చామని, ప్రస్తుతం దూర ప్రాంతాలకు వెళ్లే రాజధాని, సూపర్ లగ్జరీ బస్సులకు దీన్ని ఏర్పాటు చేశామని ఆర్టీసీకి చెందిన ఓ అధికారి చెబుతున్నారు. ప్యాసింజర్ల సమయం వృథా కాకుండా ఉండేందుకే బస్సు ఎక్కడుందో ట్రాకింగ్ సిస్టం ద్వారా ఆన్లైన్లో చూసుకోవచ్చని పేర్కొన్నారు. దీనిపై ప్యాసింజర్ల సలహాలు సూచనలు కోరుతున్నామని చెప్పారు. సమస్యలను అధిగమిస్తామని,దశల వారీగా అన్ని బస్సులకుఈ ట్రాకింగ్ సిస్టమ్ అందుబాటులోకి తీసుకొస్తామని ఆయన పేర్కొన్నారు.
