సిటీ ట్రాఫిక్‌లో కారు నడపడం అంటే మాటలు కాదు. పదేపదే క్లచ్ నొక్కడం, గేర్లు మార్చడం ఒక్కోసారి చిరాకు తెప్పిస్తుంటాయి. అందుకే ఇప్పుడు చాలామంది ఆటోమేటిక్ కార్ల వైపు మొగ్గు చూపుతున్నారు. ముఖ్యంగా తక్కువ బడ్జెట్లో ఆటోమేటిక్ కారు కొనాలనుకునే వారి సంఖ్య పెరుగుతోంది.
అయితే ఆటోమేటిక్ కారు కొనాలంటే ఎక్కువ ఖర్చు పెట్టాల్సిన అవసరం లేదు. మారుతి సుజుకి, రెనాల్ట్ వంటి కంపెనీలు తక్కువ ధరలోనే ఆటోమేటిక్ గేర్బాక్స్ కార్లను అందిస్తున్నాయి. వీటిలో ఎక్కువగా AMT గేర్‌బాక్స్‌లు ఉంటాయి. ఇవి డ్రైవింగ్‌ను ఈజీగా చేయడంతో పాటు మెయింటెనెన్స్ ఖర్చులు కూడా బడ్జెట్లో ఉండేలా చూస్తాయి.
ముఖ్యంగా మొదటిసారి కారు కొనేవారికి, రోజూ సిటీలో ప్రయాణించేవారికి, తక్కువ ధరలో ఆటోమేటిక్ కారు కావాలనుకునేవారికి ఈ ఐదు కార్లు మంచి ఆప్షన్లు. 2026 నాటికి ప్రస్తుతం అందుబాటులో ఉన్న ఎక్స్-షోరూమ్ ధరల ప్రకారం ఈ కార్ల వివరాలు తెలుసుకుందాం....
1. మారుతి సుజుకి ఎస్-ప్రెస్సో
తక్కువ ధరలో ఆటోమేటిక్ కారు కొనాలనుకునేవారికి మారుతి ఎస్-ప్రెస్సో మంచి ఆప్షన్. దీని ఎక్స్-షోరూమ్ ధర రూ.3.49 లక్షల నుంచి రూ.4.64 లక్షల వరకు ఉంటుంది. ఈ కారులో 1.0 లీటర్ పెట్రోల్ ఇంజిన్, AMT గేర్బాక్స్ VXI (O), VXI+ (O) వేరియంట్లలో లభిస్తుంది. ఈ కారు మెయింటెనెన్స్ ఖర్చులు తక్కువగా ఉండటం మంచి ప్లస్ పాయింట్. అలాగే ఎత్తుగా ఉండే సీటింగ్ పొజిషన్ వల్ల రోడ్డుపై ముందున్న వాహనాలను స్పష్టంగా చూడొచ్చు. అయితే ఫీచర్లు, సేఫ్టీ విషయంలో కొన్ని ఇతర కార్లతో పోలిస్తే కొంచెం వెనుకబడి ఉంటుంది.
2. రెనాల్ట్ క్విడ్
మారుతి కార్లకు అల్టెర్నేటివ్ రెనాల్ట్ క్విడ్‌ను కూడా చూడొచ్చు. ఈ కారు ఎక్స్-షోరూమ్ ధర రూ.4.52 లక్షల నుంచి ప్రారంభమవుతుంది. ఇందులో 1.0 లీటర్ పెట్రోల్ ఇంజిన్‌తో పాటు AMT గేర్బాక్స్ కూడా ఉంది. ఈ కారు ప్రత్యేకత ఏంటంటే.. సాధారణ చిన్న హ్యాచ్‌బ్యాక్ కార్లతో పోలిస్తే కొంచెం ఎక్కువ గ్రౌండ్ క్లియరెన్స్ ఉంటుంది. కారు లోపల కూడా మంచి స్థలం ఉంటుంది. తక్కువ వేగంతో ప్రయాణిస్తున్నప్పుడు ఇంజిన్ పనితీరు సాఫీగా ఉంటుంది. అయితే వేగంగా యాక్సిలరేటర్ నొక్కినప్పుడు ఇంజిన్ సౌండ్ కొంచెం ఎక్కువగా వినిపిస్తుంది. గుంతలు, ఎగుడుదిగుడు రోడ్లపై ప్రయాణం కూడా కొంత కష్టంగా అనిపించవచ్చు.
3. మారుతి సుజుకి ఆల్టో K10
బడ్జెట్లో ఆటోమేటిక్ కారు కావాలనుకునేవారు ఆల్టో K10ను కూడా చూడొచ్చు. దీని ప్రారంభ ఎక్స్-షోరూమ్ ధర రూ.3.69 లక్షలు. ఇందులో 1.0 లీటర్, మూడు సిలిండర్ల పెట్రోల్ ఇంజిన్ ఉంటుంది. AMT గేర్బాక్స్ మాత్రం సెలెక్ట్ చేసిన వేరియంట్లలో లభిస్తుంది.
ఈ కారు చిన్న సైజులో ఉండటం వల్ల సిటీ ట్రాఫిక్ మధ్య నడపడం, ఇరుకైన ప్రదేశాల్లో పార్కింగ్ చేయడం ఈజీ. రోజు ఉండే అవసరాలకు సరిపడా పనితీరును అందిస్తుంది. అంతేకాకుండా అన్ని వేరియంట్లలోనూ మల్టిపుల్ ఎయిర్‌బ్యాగ్స్ వంటి సేఫ్టీ ఫీచర్లు ఉన్నాయి. ధర, నిర్వహణ ఖర్చులు, ఫీచర్లను పోల్చి చూసుకుంటే మొదటిసారి కారు కొనేవారికి ఇదొక మంచి అప్షన్ అని చెప్పవచ్చు.
4. మారుతి సుజుకి సెలెరియో
మంచి మైలేజీతో పాటు ఆటోమేటిక్ గేర్బాక్స్ కావాలనుకునేవారికి మారుతి సెలెరియో బాగా ఉపయోగపడుతుంది. దీని ఎక్స్-షోరూమ్ ధర రూ.4.69 లక్షల నుంచి ప్రారంభమవుతుంది. ఇందులో 1.0 లీటర్ పెట్రోల్ ఇంజిన్‌తో పాటు AMT గేర్బాక్స్ ఉంటుంది.
ఈ కారు ఆకర్షణ మైలేజీ. AMT వేరియంట్ లీటరుకు 26 కిలోమీటర్లకు పైగా మైలేజీ ఇస్తుందని కంపెనీ ప్రకటించిన లెక్కలు చెబుతున్నాయి. ట్రాఫిక్‌లో గేర్లు మార్చుకునే ఇబ్బంది లేకుండా సులభంగా డ్రైవ్ చేయొచ్చు. క్యాబిన్‌లో నలుగురు ప్రయాణికులు సౌకర్యంగా కూర్చోవచ్చు. తక్కువ ఇంధన ఖర్చుతో రోజూ ఆఫీసు, ఇతర పనులకు వెళ్లేవారికి ఇది మంచి ఆప్షన్.
5. మారుతి సుజుకి వాగన్ ఆర్
కుటుంబంతో కలిసి ప్రయాణించడానికి కొంచెం ఎక్కువ స్థలం ఉన్న ఆటోమేటిక్ కారు కావాలనుకుంటే వాగన్ ఆర్‌ను పరిశీలించవచ్చు. దీని ప్రారంభ ఎక్స్-షోరూమ్ ధర రూ.4.98 లక్షలు. ఇందులో 1.0 లీటర్, 1.2 లీటర్ పెట్రోల్ ఇంజిన్ ఆప్షన్లు ఉన్నాయి. సెలెక్ట్ చేసిన వేరియంట్లలో AMT గేర్బాక్స్ కూడా లభిస్తుంది.
ఈ కారు ప్రత్యేకత క్యాబిన్‌లో ఎక్కువ స్థలం, మంచి హెడ్‌రూమ్. ఎత్తుగా ఉండే డిజైన్ వల్ల కారులోకి ఎక్కడం, దిగడం కూడా ఈజీగా ఉంటుంది. కుటుంబ సభ్యులతో కలిసి రోజూ ప్రయాణించేవారికి ఈ కారు ఉపయోగకరంగా ఉంటుంది. మారుతి సుజుకి సర్వీస్ నెట్‌వర్క్ అందుబాటులో ఉండటం, నిర్వహణ ఖర్చులు కూడా ఎక్కువగా లేకపోవడం మరో ప్లస్ పాయింట్. సిటీ ప్రయాణాలకు, కుటుంబ అవసరాలకు ఇదొక చక్కటి అప్షన్.
ఏ కారు కొనాలి?
తక్కువ ధరలో ఆటోమేటిక్ కారు కావాలనుకుంటే ఎస్-ప్రెస్సో, ఆల్టో K10లను పరిశీలించవచ్చు. మైలేజీకి ప్రాధాన్యత ఇచ్చేవారికి సెలెరియో మంచి ఆప్షన్. కుటుంబంతో కలిసి ప్రయాణించేవారికి వాగన్ ఆర్ ఉపయోగపడుతుంది. ఇక కొంచెం వెరైటీ డిజైన్, ఎక్కువ గ్రౌండ్ క్లియరెన్స్ కోరుకునేవారు రెనాల్ట్ క్విడ్‌ను చూడొచ్చు.
అయితే కారు కొనేముందు మీ బడ్జెట్, అవసరాలు, సేఫ్టీ ఫీచర్లు, మైలేజీ, నిర్వహణ ఖర్చులను పరిశీలించి మీకు సరైన వేరియంట్‌ను సెలెక్ట్ చేసుకోవడం మంచిది.
