ఢిల్లీలో వాయు కాలుష్యంపై జాతీయ మానవ హక్కుల సంఘం ఆగ్రహం వ్యక్తం చేసింది. వాయు కాలుష్యాన్ని నియంత్రించడంలో ప్రభుత్వాలు వైఫల్యం అయ్యాయని తెలిపింది. ఈ నెల 10న ఢిల్లీ, పంజాబ్ , హర్యానా, ఉత్తర ప్రదేశ్ ప్రభుత్వ ప్రధాన కార్యదర్శులు తన ముందు హాజరుకావాలని నోటీసులు జారీ చేసింది. ఈ సందర్భంగా రాష్ట్ర ప్రభుత్వాలు తీసుకున్న చర్యలపై మానవ హక్కుల సంఘం అసంతృప్తి వ్యక్తం చేసింది. ఆర్టికల్ 47 ప్రకారం ప్రజారోగ్యం, ప్రజల జీవన ప్రమాణాలను మెరుగుపరచాల్సిన బాధ్యత ప్రభుత్వాలదేనని స్పష్టం చేసింది.
దీంతో పాటు ఈ మధ్య కాలంలో తమ ప్రాంతాల్లో పొగను నివారించడానికి చేపట్టిన చర్యల గురించి తెలియజేయాలని ఆదేశించింది. ఢిల్లీ-ఎన్‌సీఆర్‌లో వాయు కాలుష్యాన్ని నియంత్రించేందుకు ఇంకా చాలా చర్యలు తీసుకోవాల్సిన అవసరం ఉందని కమిషన్ అభిప్రాయపడింది. ఇదిలా ఉండగా దేశ రాజధాని ఢిల్లీలో గాలి కాలుష్యం అంతకంతకూ పెరుగుతోంది. ఎయిర్ క్వాలిటీ రోజురోజుకూ తగ్గిపోతుండటంపై ప్రజల్లో ఆందోళన వ్యక్తమవుతోంది. ఈ నేపథ్యంలో ఢిల్లీ సీఎం కేజ్రీవాల్ కీలక నిర్ణయం తీసుకున్నారు. రేపట్నుంచి ప్రైమరీ స్కూళ్లు బంద్ చేస్తున్నట్లు ప్రకటించారు. కాలుష్యం తగ్గే వరకు స్కూళ్లు మూసేవేస్తామని చెప్పారు. పంజాబ్ సీఎం భగవంత్ మాన్ తో కలిసి మీడియాతో మాట్లాడిన కేజ్రీవాల్ ఈ మేరకు నిర్ణయం వెలువరించారు. ప్రైమరీ స్కూళ్లకు సెలవులు ప్రకటించిన ప్రభుత్వం 5 నుంచి 8వ తరగతి విద్యార్థుల ఔట్ డోర్ యాక్టివిటీస్పై నిషేధం విధించారు.
