హైదరాబాద్, వెలుగు: ట్రూకాలర్.. చాలా మంది ఫోన్లలో ఉంటున్న యాప్. తెలియని వ్యక్తులు ఫోన్ చేసినా, వాళ్లు ఎవరన్నది ఆ యాప్తో తెలిసిపోతుంది. ప్రపంచంలో 70 శాతం మంది యూజర్లు మనోళ్లే. 10 కోట్ల మందికిపైగా దానిని వాడుతున్నారు. స్పామ్ ఫోన్లు, మెసేజ్ల బెడద నుంచి తప్పించేందుకు అది ఉపయోగపడుతుందని యూజర్లు భావిస్తుండొచ్చు. కానీ, యూజర్లూ మీకో షాకింగ్ న్యూస్. మీ పర్సనల్ డేటాను ట్రూ కాలర్ అమ్మేసుకుంటోంది. మార్కెటింగ్ కంపెనీలకు ఇచ్చేస్తోంది. ట్రూకాలర్లో రిజిస్టర్ చేసుకునే ముందు పేరు, ఫోను, సోషల్ మీడియా వివరాలు తప్పకుండా ఇవ్వాల్సి ఉంటుంది కదా. ఆ వివరాలనే ఆసరాగా చేసుకుంటోంది సంస్థ. దానికి సంబంధించి తనకూ ఇలాంటి అనుభవమే ఎదురైందంటూ రాకేశ్ అనే వ్యక్తి ఆధారాలతో సహా ట్విట్టర్లో పోస్ట్ చేశారు. ట్రూకాలర్లో ‘abcd efgh’ అన్న పేరుతో ఐడీ క్రియేట్ చేసుకున్నారట. ఆ పేరుతోనే కొన్ని కార్పొరేట్ కంపెనీల నుంచి ఆయనకు మెసేజ్లు వచ్చాయట. అది చూసి కంగుతిన్న ఆయన, దాని తాలూకు స్క్రీన్ షాట్లను ట్విట్టర్లో పోస్ట్ చేసి ట్రూకాలర్కు ట్యాగ్ చేశారు. మార్కెటింగ్ సంస్థలకు తన డేటాను అమ్ముకుందని ఆరోపించారు. దానిపై ట్రూకాలర్సీఈవో అలన్ మమేడి వెంటనే స్పందించారు. చిన్న బగ్ వల్ల జరిగిన పొరపాటు అని, కంపెనీ ఎవరి డేటా అమ్ముకోదని వివరణ ఇచ్చారు.
ట్రూకాలర్ ‘యూపీఐ స్కామ్’
ఇంతకు ముందు యూజర్ల ప్రమేయం లేకుండానే నేరుగా బ్యాంక్ సర్వీసులు చేసుకునేలా యూపీఐ అకౌంట్ను క్రియేట్ చేసింది ట్రూకాలర్. 2017లో ఐసీఐసీఐతో కలిసి మొబైల్ పేమెంట్స్ను ప్రారంభించింది. చాలా మంది అకౌంట్లు యూజర్ల అనుమతి లేకుండానే యాడ్ అయ్యాయి. దీంతో తమ ప్రమేయం లేకుండా అకౌంట్ యాడ్ అవడంతో డబ్బులూ మాయమయ్యే ప్రమాదం ఉందన్న ఆందోళనతో యూజర్లు కంపెనీపై ఫిర్యాదులు చేశారు. కొందరికైతే బ్యాంకు అకౌంట్ డీయాక్టివేట్ అయినట్టు మెసేజ్లూ వెళ్లాయి. అసలు యూపీఐ అకౌంటే లేనప్పుడు ఎట్ల డీయాక్టివేట్ అవుతుందని కొందరు యూజర్లు గందరగోళంలో పడ్డారు. దానిపై ఓ యూజర్ నేషనల్ పేమెంట్స్ కార్పొరేషన్ ఆఫ్ ఇండియాకు ఫిర్యాదు చేశారు. దర్యాప్తు మొదలవడంతో, వెంటనే ట్రూకాలర్ కొత్త వెర్షన్ను తొలగించేసింది. ఓ బగ్ వల్ల సమస్య వచ్చిందని, క్షమించాలని కోరింది.
అమ్ముకుంటున్నట్టు తేలింది
రెండు, మూడేళ్ల కిందట ట్రూకాలర్ డేటాబేస్ పెద్ద మొత్తంలో లీకైంది. జాగ్రత్తలు తీసుకుంటామని అప్పుడు కంపెనీ చెప్పింది. కానీ, ఇప్పుడు ఆ డేటాను అమ్ముకుంటున్నట్టు క్లియర్గా అర్థమవుతోంది. డార్క్వెబ్లోనూ కొన్ని లక్షల ఈమెయిల్ ఐడీలు, డేటా కేవలం 50 నుంచి 60 డాలర్లకు అమ్మకానికి పెట్టారు. ఇలాంటి వాటిపై కఠినమైన చట్టాలు తేవాల్సిన అవసరం ఉంది. విదేశాల్లో అయితే, కఠిన చర్యలు తీసుకుంటారు.
‑ నల్లమోతు శ్రీధర్, సాంకేతిక నిపుణులు
