మహబూబ్నగర్, వెలుగు:టీఎస్పీఎస్సీ పేపర్ లీకేజీ కేసును సిట్టింగ్ జడ్జితో విచారణ చేయించి, ఎగ్జామ్స్ రాసిన నిరుద్యోగులకు రూ.లక్ష చెల్లించాలని, మంత్రి కేటీఆర్ను బర్తరఫ్ చేయాలనే డిమాండ్లతో బీజేపీ నిరుద్యోగ మార్చ్కు శ్రీకారం చుట్టింది. రెండో విడత కార్యక్రమాన్ని మంగళవారం పాలమూరులో నిర్వహించేందుకు ఏర్పాట్లు చేస్తోంది. మార్చ్కు ఉమ్మడి మహబూబ్నగర్ జిల్లా నుంచి 50 వేల మంది నిరుద్యోగులు, యువత పాల్గొనేలా స్టడీ సెంటర్లు, కాలేజీల్లో సదస్సులు నిర్వహిస్తోంది.
బూత్ కమిటీ నుంచి 10 మంది..
ఇటీవల బీజేపీ గ్రామ స్థాయి నుంచి బూత్ కమిటీలను ఏర్పాటు చేసింది. ప్రస్తుతం పాలమూరులో నిర్వహించే నిరుద్యోగ మిలియన్ మార్చ్ కార్యక్రమానికి బూత్ కమిటీ సేవలను వినియోగిస్తుంది. నిరుద్యోగ మార్చ్కు ఒక్కో బూత్ కమిటీ నుంచి 10 మంది నిరుద్యోగులు, యువకులను తీసుకొచ్చేలా వారం కిందటే ప్లాన్ చేసింది. దీని ప్రకారం ఒక్క పాలమూరు జిల్లాలో 832 కమిటీలు ఉండగా, ఈ కమిటీలు 8,320 మందిని కార్యక్రమానికి తీసుకురానున్నాయి. ఉమ్మడి పాలమూరు జిల్లాలోని గద్వాల, అలంపూర్, నాగర్కర్నూల్, నారాయణపేట, మక్తల్, కొడంగల్, కొల్లాపూర్, వనపర్తి, అచ్చంపేట, కల్వకుర్తి, షాద్నగర్, జడ్చర్ల, దేవరకద్ర, మహబూబ్నగర్ నియోజకవర్గాల నుంచి 3 వేల మంది చొప్పున 42 వేల మందిని తరలించేందుకు జిల్లాల అధ్యక్షులు వీరబ్రహ్మచారి, పగడాల శ్రీను, దిలీపాచారి, రాంచందర్రెడ్డి, రాజవర్ధన్రెడ్డి, లీడర్లు డోకూర్ పవనకుమార్ రెడ్డి, ఆర్బాలాత్రిపుర సుందరి, జలంధర్రెడ్డి, ఎన్పీ వెంకటేశ్, సత్య యాదవ్, ఎల్లేని సుధాకర్రావు ఏర్పాట్లు చేస్తున్నారు.
స్టడీ సెంటర్లలో మీటింగ్లు..
బీజేపీ పాలమూరు జిల్లా అధ్యక్షుడు వీరబ్రహ్మచారి ఆధ్వర్యంలో మూడు రోజులుగా దరువు ఎల్లన్న, వరంగల్ జేఏసీ చైర్మన్ పుల్లారావు, బీజేవైఎం జిల్లా అధ్యక్షుడు కొత్తకోట కిరణ్ కుమార్రెడ్డిస్టూడెంట్లతో ఇంట్రాక్ట్ అవుతున్నారు. స్టడీ సెంటర్లు, పాలమూరు యూనివర్సిటీలను విజిట్ చేసి పేపర్ లీకేజీపై జరుపుతున్న పోరుకు రావాలని పిలుపునిచ్చారు. నీళ్లు, నిధులు, నియామకాల కోసం తెచ్చుకున్న తెలంగాణలో ఇప్పటికే నీళ్లు, నిధులు పక్కదారి పట్టాయని, ఉద్యోగ నియామకాల్లో కూడా యువతకు అన్యాయం జరుగుతోందనే విషయాన్ని వివరిస్తున్నారు. ఇప్పుడు మేల్కోకపోతే తెలంగాణ యువత భవిష్యత్ ప్రశ్నార్థకంగా మారుతుందని, మిలియన్ మార్చ్ను సక్సెస్ చేయాలని కోరుతున్నారు. దరువు ఎల్లన్న, పుల్లారావు పాటల ద్వారా స్టూడెంట్లలో చైతన్యం తీసుకొస్తున్నారు. వీరితో పాటు ఉమ్మడి జిల్లాల్లో మనోహర్రెడ్డి, వీరేందర్గౌడ్, పార్టీ రాష్ట్ర కోశాధికారి శాంతికుమార్ విస్తృతంగా పర్యటిస్తూ ప్రతీ నిరుద్యోగి, యువత కార్యక్రమానికి రావాలని పిలుపునిస్తున్నారు.
కార్యక్రమం ఇలా..
మహబూబ్నగర్ జిల్లా కేంద్రంలోని టీటీడీ కల్యాణ మండపం వద్ద మధ్యాహ్నం నిరుద్యోగులు, యువతను సమీకరించి, 4 గంటలకు మార్చ్ను ప్రారంభించనున్నారు. గవర్నమెంట్ బాయ్స్ కాలేజీ, అంబేద్కర్ చౌరస్తా, అశోక్ టాకీస్ మీదుగా క్లాక్ టవర్ వద్దకు చేరుకోనున్నారు. అక్కడ ఏర్పాటు చేసే సభలో పార్టీ జాతీయ ఉపాధ్యక్షురాలు డీకే అరుణ, జాతీయ కార్యవర్గ సభ్యుడు ఏపీ జితేందర్రెడ్డి మాట్లాడిన తర్వాత పార్టీ స్టేట్ చీఫ్ బండి సంజయ్ యువతను ఉద్దేశించి ప్రసంగించనున్నారు. ఉమ్మడి జిల్లాలోని వివిధ ప్రాంతాల నుంచి నిరుద్యోగులు, యువతను తరలించేందుకు 60 బస్సులు, 500 ఇతర వెహికల్స్ ఏర్పాటు చేస్తున్నారు.
