సంగారెడ్డి టౌన్, వెలుగు : ఉపాధ్యాయుల బదిలీలు, పదోన్నతులు చేపట్టకుంటే అసెంబ్లీని ముట్టడిస్తామని యూఎస్పీసీ స్టేట్ లీడర్ వై. అశోక్ కుమార్, లక్ష్మారెడ్డి హెచ్చరించారు. ఆదివారం సంగారెడ్డి కలెక్టరేట్ ఎదుట ఉపాధ్యాయులు సామూహిక నిరాహార దీక్షకు వారు హాజరయ్యారు. ఈ సందర్భంగా వారు మాట్లాడుతూ విద్యారంగ, ఉపాధ్యాయ సమస్యలు పరిష్కరించాలని, ఖాళీ పోస్టులు భర్తీ చేయాలని, జీవో 317 అమలు కారణంగా ఉత్పన్నమైన సమస్యలను పరిష్కరించాలని డిమాండ్ చేశారు.
స్వయంగా సీఎం కేసీఆర్బదిలీలు పదోన్నతులు చేపడతామని ప్రకటించినా ఇప్పటికీ అతీగతి లేదన్నారు. హైస్కూల్స్లో వేలాది సబ్జెక్ట్ టీచర్ పోస్టులు ఖాళీగా ఉన్నాయని, ప్రైమరీ స్కూళ్లలో సరిపడా ఉపాధ్యాయులు లేరని ఆవేదన వ్యక్తం చేశారు. ఇప్పటికైనా ప్రభుత్వం సానుకూలంగా స్పందించకుంటే ఆందోళన తీవ్రతరం చేస్తామని హెచ్చరించారు. ఉపాధ్యాయ సంఘాల నాయకులు రాంచందర్ , లక్ష్మయ్య యాదవ్ సంజీవయ్య ,విజయభాస్కర్ పాల్గొన్నారు.
