ఊహ తెలిసీ తెలియడంతోనే ఆర్టిస్ట్ అయ్యారు వెంకట్ గడ్డం. పన్నెండేండ్ల వయసులోనే వెంకట్ వేసిన పెయింటింగ్స్ ఎగ్జిబిషన్కి చేరాయి. అలా మొదలైన జర్నీ.. ఇప్పుడు ఫ్యాషన్ డిజైనింగ్లో ఒక ట్రెండ్ సెట్ చేసింది. ఆయన డిజైన్ చేసిన ఫ్యాషన్లైన్ను మామూలు జనం మొదలు సెలబ్రిటీల వరకు అందరూ ఇష్టపడుతున్నారు.
నాకు ఊహ తెలిసినప్పటి నుంచే ఆర్టిస్ట్ని. మొదటి పెయింటింగ్ ఎప్పుడు వేశానో నాకే గుర్తులేదు. అంత చిన్న వయసులో కుంచె పట్టా. అలా పెయింటింగ్ నేర్చుకోకముందే ఆర్టిస్ట్ అయ్యా. అలాగే మ్యూజిక్లో బేసిక్స్ కూడా నేర్చుకోకున్నా పాటలు కూడా పాడతా” అన్నారు వెంకట్ గడ్డం. ఒక ఆర్ట్ని పూర్తిగా నేర్చుకోవడానికి, దానిపై పని చేయడానికి చాలా టైం పడుతుంది. కానీ.. వెంకట్ ఆర్టిస్ట్గా సక్సెస్ కావడమే కాకుండా.. ఇప్పుడు ఫ్యాషన్ డిజైనర్గా కూడా మంచి పేరు తెచ్చుకున్నారు. ‘‘WHENCUT GODDAMN” బ్రాండ్ నేమ్తో వచ్చిన ఆయన డిజైన్స్ చాలా పాపులర్ అయ్యాయి.
చిన్నప్పటినుంచే బొమ్మలు
చిన్నప్పుడే ఆర్ట్ మీద ఇంట్రెస్ట్ కలిగింది వెంకట్కు. దాంతో తెలియకుండానే ఆర్టిస్ట్ అయిపోయారు. స్కూల్లో ఉన్నప్పుడు కూడా అన్ని సబ్జెక్ట్స్కన్నా క్రియేటివ్ ఫీల్డ్స్ బాగా నచ్చేవి. అప్పుడు కూడా పెయింటింగ్, రైటింగ్లో ఎప్పుడూ ఫస్టే. తర్వాత న్యూయార్క్ వెళ్లి ఆర్ట్స్లో నాలుగేండ్లు అండర్ గ్రాడ్యుయేషన్ చేశారు. అప్పుడే గోడల మీద ఆర్ట్ వేయడం మొదలుపెట్టారు. అంతేకాదు.. తన వంతు సొసైటీకి ఏదైనా చేయాల్సి వస్తే.. అది కూడా తన ఆర్ట్ ద్వారానే చేస్తానంటున్నారు. అందుకే తన పెయింటింగ్స్, రచనల ద్వారా ఇన్స్పైర్ చేస్తున్నారు.
విమెన్ ఎందుకు?
వెంకట్ ఆర్ట్లో ఎక్కువగా ఆడవాళ్లు, వాళ్ల మనోభావాలు కనిపిస్తుంటాయి. అదే విషయం ఆయన్ని అడిగితే.. ‘‘నా దృష్టిలో విమెన్, మెన్ ఇద్దరూ సమానమే. నా ఆర్ట్లో విమెన్ని చూడడం కంటే హ్యూమన్ బీయింగ్స్ని చూడాలి. ఆడవాళ్లు నా ఆర్ట్లో క్యారెక్టర్స్ మాత్రమే. నేను చెప్పదలచుకున్నది ఆ క్యారెక్టర్స్ కథల ద్వారా చెప్తున్నా. అవి మెన్, విమెన్ ఇద్దరికీ కనెక్ట్ అవుతాయి. అందుకే చాలామంది మగవాళ్లు కూడా ఆ క్యారెక్టర్స్లా ఫీల్ అవుతుంటారు. నేను ప్రతి పెయింటింగ్కి దాన్ని రిప్రజెంట్ చేసే ఒక క్యాప్షన్ రాస్తుంటా. ఆ క్యాప్షన్ చూసి చాలామంది అందులో తమను చూసుకున్నట్టు చెప్పారు. నా ఆర్ట్ వర్క్ అలా ఉండడానికి కారణం మా అమ్మే. ఆమే నాకు ఇన్స్పిరేషన్. ఒక హ్యూమన్ బీయింగ్లా ఎలా ఉండాలో నేను అమ్మ దగ్గరే నేర్చుకున్నా. అందుకే ఎదుటి వ్యక్తి ఎమోషన్స్ని ఈజీగా అర్థం చేసుకోగలను. ఆ ఎమోషన్స్ నా ఆర్ట్లో కనిపిస్తుంటాయి. అందుకే అందరికీ అర్థమవుతాయి” అని వివరించారు.
ఆర్ట్– ఫ్యాషన్
ఒక ఆర్టిస్ట్ ఏ పని చేసినా ఆ పని కళాత్మకంగా మారుతుంది. అందుకే వెంకట్ డిజైన్ చేసే బట్టల్లోనూ ఆర్ట్ కనిపిస్తుంది. వాటి రూపురేఖలు ఆర్టిస్టిక్గా ఉంటాయి. పెయింటింగ్స్నే బట్టలపై ప్రింట్ చేసినట్టు ఉంటుంది. ఆయన డిజైనింగ్ అలా ఉండడానికి కారణం ఉంది. వెంకట్ చిన్నప్పుడు ఒకసారి ఎం.ఎఫ్. హుస్సేన్ కూతురిని చూశారు. అప్పుడామె కట్టుకున్న చీర చాలా డిఫరెంట్గా అనిపించింది. ఆమె ఆ చీరపై వాళ్ల నాన్న వేసిన పెయింటింగ్ని ప్రింట్ చేయించుకుంది. అప్పుడే ఆయనకు ఆర్ట్ డిజైన్ ఐడియా వచ్చింది.
సెలబ్రిటీల వరకు
వెంకట్ డిజైన్ చేసిన బట్టలు చాలామంది ఇష్టపడుతుంటారు. ఆర్ట్ వర్క్ యునిక్ స్టైల్లో ఉండటమే అందుకు కారణం. ఉదాహరణకు ఒక షర్ట్ డిజైన్ చేస్తే అది నార్మల్ షర్ట్లా ఉండదు. బోల్డ్, డిఫరెంట్గా ఉంటుంది. దాన్ని ఎక్కడ చూసినా ఇది వెంకట్ డిజైన్ అని గుర్తుపట్టొచ్చు. మామూలుగా మార్కెట్లోకి ఒక కొత్త స్టైల్ వచ్చిందంటే ట్రై చేయాలని చాలామందికి ఉంటుంది. కానీ.. వెంకట్ డిజైన్స్ విషయంలో మాత్రం చాలామంది అవి నచ్చడం వల్ల వేసుకుంటున్నారు. ఈ మధ్య బిగ్బాస్ సీజన్–6లో హీరో నాగార్జున కూడా వెంకట్ డిజైన్ చేసిన డ్రెస్ వేసుకున్నారు.
మల్టీ టాలెంటెడ్
కళకు పరిధి లేదు. అది ఎక్కడివరకైనా రీచ్ అవుతుంది అంటుంటారు. క్రియేటివిటీ ఉంటే ఆర్ట్.. దానికి అనుబంధంగా ఉన్న అన్ని రంగాలకు విస్తరిస్తుంది అంటారు వెంకట్. అందుకేనేమో ఆయన ముందు ఆర్టిస్ట్ అయ్యి.. ఆ తర్వాత పాట, కవిత్వం, ఫ్యాషన్ డిజైనింగ్లో కూడా సక్సెస్ అయ్యారు. ఇన్నింటిలో ఉండటం ఎలా సాధ్యమైందని అడిగితే.. “క్రియేటివ్గా ఆలోచించే వాళ్ల ఆర్ట్కి హద్దులు ఉండవు. ఒక నదిలా ఎప్పుడూ ఫ్లో అవుతూనే ఉంటుంది. ఆ ఫ్లో నుంచే సింగింగ్, రైటింగ్, డిజైనింగ్, పెయింటింగ్ వంటివి నాకు వచ్చాయి” అన్నారు వెంకట్.
పేరు కూడా యునిక్
మామూలుగా వెంకట్ గడ్డం అనే పేరుని ఇంగ్లీష్లో ‘‘VENKAT GADDAM” అని రాస్తారు. కానీ.. వెంకట్ మాత్రం ‘‘WHENCUT GODDAMN” అని డిఫరెంట్గా రాస్తుంటారు. అదే ఆయన బ్రాండ్నేమ్. ఇలా రాయడం వెనక ఒక కారణం ఉంది. అదేంటంటే.. న్యూయార్క్లో అండర్ గ్రాడ్యుయేషన్ చేస్తున్నప్పుడు అక్కడి వాళ్లకు వెంకట్ పేరును ఎలా పలకాలో తెలిసేది కాదు. దాంతో వాళ్లకు అర్థమయ్యేలా ‘‘వెన్ కట్ గాడ్ డామ్’’ అని విడదీసి చెప్పేవారు. ఇలా రాయడం యునిక్గా ఉండడంతో అదే బ్రాండ్నేమ్గా పెట్టారు.
ఆలోచనల నుంచే ఆర్ట్
‘‘దేన్నైనా కళాత్మకంగా చూడాలి. అందుకే నేనేది చేసినా చాలా కాన్సన్ట్రేట్గా చేస్తుంటా. ఉదాహరణకు ఒక సినిమా చూసినా, ఎవరితోనైనా మాట్లాడినా, ఏదైనా చదివినా.. వాటి తాలూకు గుర్తులు నాతో నడుస్తూనే ఉంటాయి. వాటి నుంచి కొత్త ఆలోచనలు వస్తుంటాయి. ఆ ఆలోచనల నుంచే ఆర్ట్ పుడుతుంది.’’