ముంబై: లీగులో వరుస విజయాలతో జోష్ మీదున్న ముంబై ఇండియన్స్కు బిగ్ షాక్ తగిలింది. ఆ జట్టు యంగ్ స్పిన్నర్ విఘ్నేష్ పుత్తూర్ ఐపీఎల్ టోర్నీకి దూరమయ్యాడు. గాయం కారణంగా పుత్తూర్ మిగిలిన సీజన్ నుంచి వైదొలిగాడు. దీంతో పుత్తూర్ స్థానంలో లెగ్ స్పిన్నర్ రఘు శర్మను జట్టులోకి తీసుకుంది ముంబై. రూ.30 లక్షల బేస్ ప్రైజ్కు రఘు శర్మతో ఒప్పందం కుదుర్చుకుంది. దీంతో రఘు శర్మ ఐపీఎల్లో ముంబై ఇండియన్స్ జట్టుతో కలవనున్నాడు.
ఎవరీ రఘు శర్మ..?
పంజాబ్లోని జలంధర్‌కు చెందిన 31 ఏళ్ల కుడిచేతి లెగ్ బ్రేక్ బౌలర్ రఘు శర్మ పంజాబ్ పుదుచ్చేరి తరపున దేశవాళీ క్రికెట్ ఆడాడు. 11 మ్యాచ్‌ల్లో 19.59 సగటుతో 57 వికెట్లు పడగొట్టి అద్భుతమైన ఫస్ట్-క్లాస్ రికార్డు కలిగి ఉన్నాడు. 7/56 రఘు శర్మ అత్యుత్తమ గణాంకాలు. 9 లిస్ట్ A గేములో 14 వికెట్లు సాధించాడు. ఐపీఎల్ ఆడటం రఘు శర్మకు ఇదే ఫస్ట్.
పుత్తూర్కు ఏమైంది..?
కేరళకు చెందిన 24 ఏళ్ల విఘ్నేష్ పుత్తూర్ ఈ ఏడాది (2025) ముంబై ఇండియన్స్ ద్వారా ఐపీఎల్లోకి ఎంట్రీ ఇచ్చాడు. చెన్నైపై అరంగ్రేటం చేసిన పుత్తూర్.. తొలి మ్యాచులోనే రాణించాడు. చెన్నైపై మూడు వికెట్లు పడగొట్టి ఆకట్టుకున్నాడు. ఈ సీజన్లో ఐదు మ్యాచ్‌లు ఆడి మొత్తం 6 వికెట్లు తీశాడు. ఈ క్రమంలోనే పుత్తూర్ గాయపడ్డాడు. ఇంజ్యూరీ ఎక్కువగా కావడంతో టోర్నీ నుంచి వైదొలగాల్సి వచ్చింది. జట్టుకు దూరమైనప్పటికీ విఘ్నేశ్ ముంబై ఇండియన్స్ మెడికల్ అండ్ స్ట్రెంగ్త్ & కండిషనింగ్ ఉండనున్నాడు.
ALSO READ | IPL 2025: శ్రేయాస్ అయ్యర్‌కు భారీ జరిమానా.. మ్యాచ్ జరుగుతున్నప్పుడే పంజాబ్‌కు పనిష్మెంట్
ఐదుసార్లు ఐపీఎల్ ఛాంపియన్లుగా నిలిచిన ముంబై జట్టు.. ఈ ఏడాది సీజన్ను పేలవంగా ఆరంభించింది. మొదటి ఐదు మ్యాచ్‌ల్లో ఒకే ఒక్క విజయం సాధించి పాయింట్ల పట్టికలో చిట్టచివరకు పడిపోయింది. ఇక ముంబై జట్టు పనైపోయిందనుకున్న తరుణంలో తిరిగి బలంగా పుంజుకుంది. వరుసగా ఐదు మ్యాచులు గెలిచి ప్లే ఆఫ్స్ రేసులోకి దూసుకొచ్చింది.
ఈ సీజన్లో ఇప్పటి వరకు 10 మ్యాచులు ఆడిన ముంబై.. 6 విజయాలతో పాయింట్ల పట్టికలో 3వ స్థానంలో ఉంది. మరో రెండు మ్యాచుల్లో విజయం సాధిస్తే.. ముంబై ప్లే ఆఫ్స్కు చేరుకుంటుంది. పాండ్యా సేన ప్రస్తుతమున్న ఫామ్ ను బట్టి చూస్తే ఈ ఏడాది ముంబై ఫ్లే ఆఫ్స్కు వెళ్లడం పెద్ద కష్టమేమి కాదనిపిస్తోంది.
