టీమిండియా స్టార్ ప్లేయర్ విరాట్ కోహ్లీకి రికార్డ్స్ బ్రేక్ చేయడం కొత్త కాదు. ప్రతి మ్యాచ్ లో ఏదో ఒక రికార్డ్ బ్రేక్ చేస్తూ క్రికెట్ లో దూసుకెళ్తాడు. అయితే ఈ సారి రికార్డ్ బద్దలు కొట్టడం కాదు సరికొత్త చరిత్ర సృష్టించాడు. అదేంటో కాదు ఒకే ఫార్మాట్ లో అత్యధిక సెంచరీలు సాధించడం. ఆదివారం (నవంబర్ 30) రాంచీ వేదికగా సౌతాఫ్రికాతో జరుగుతున్న తొలి వన్డేలో కోహ్లీ సెంచరీతో సత్తా చాటాడు. 102 బంతుల్లో సెంచరీ పూర్తి చేసుకున్న విరాట్.. ఓవరాల్ గా 120 బంతుల్లో 135 పరుగులు చేసి అదిరిపోయే ఇన్నింగ్స్ ఆడాడు. కోహ్లీకి వన్డే ఫార్మాట్ లో ఇది 52వ సెంచరీ కావడం విశేషం.
క్రికెట్ లో ఇప్పటివరకు ఒక ఫార్మాట్ లో ఏ ప్లేయర్ కూడా 52 సెంచరీలు చేయలేదు. సచిన్ టెండూల్కర్ టెస్టుల్లో 51 సెంచరీలు చేస్తే.. ఈ మ్యాచ్ కు ముందు కోహ్లీ వన్డేల్లో 51 సెంచరీలు చేశాడు. ప్రస్తుతం సఫారీలపై కోహ్లీ సెంచరీ కొట్టడంతో కోహ్లీ వన్డే సెంచరీల సంఖ్య 52కి చేరింది. దీంతో సింగిల్‌ ఫార్మాట్లో అత్యధిక శతకాల వీరుడిగా ఉన్న టీమిండియా బ్యాటింగ్ దిగ్గజం సచిన్ టెండుల్కర్‌ రికార్డును బద్దలు కొట్టాడు. ఈ సెంచరీతో ఒకే ఫార్మాట్లో అత్యధిక సెంచరీలు చేసిన ప్లేయర్ గా చరిత్ర సృష్టించాడు. కోహ్లీ అంతర్జాతీయ కెరీర్ లో ఇది 83వ సెంచరీ. 100 సెంచరీలతో సచిన్ అగ్రస్థానంలో ఉన్నాడు.
సౌతాఫ్రికాతో జరుగుతున్న తొలి వన్డే విషయానికి వస్తే టీమిండియా భారీ స్కోర్ తో చెలరేగింది. ఆదివారం (నవంబర్ 30) రాంచీ వేదికగా జరుగుతున్న ఈ మ్యాచ్ లో సొంతగడ్డపై సఫారీ బౌలర్లకు చుక్కలు చూపిస్తూ భారీ స్కోర్ చేశారు. స్టార్ బ్యాటర్ విరాట్ కోహ్లీ సెంచరీ (120 బంతుల్లో 135: 11 ఫోర్లు, 7 సిక్సర్లు)తో విధ్వంసం సృష్టిస్తే.. రోహిత్ శర్మ (57) హాఫ్ సెంచరీతో అదరగొట్టాడు. కేఎల్ రాహుల్ (60) కెప్టెన్ ఇనింగ్స్ తో సత్తా చాటాడు. దీంతో మొదట బ్యాటింగ్ చేసిన ఇండియా నిర్ణీత 50 ఓవర్లలో 8 వికెట్ల నష్టానికి 349 పరుగులు చేసింది. కోహ్లీ 135 పరుగులతో టాప్ స్కోరర్ గా నిలిచాడు. సౌతాఫ్రికా బౌలర్లలో బార్ట్ మాన్, బర్గర్, జాన్సెన్, బాష్ తలో రెండు వికెట్లు తీసుకున్నారు.
Virat Kohli - 52* Hundreds in ODIs
— Johns. (@CricCrazyJohns) November 30, 2025
Sachin Tendulkar - 51 Hundreds in Tests.
VIRAT KOHLI HAS MOST HUNDREDS IN A SINGLE FORMAT IN INTERNATIONAL CRICKET 🇮🇳 pic.twitter.com/9s0jhoj2Af
