వరల్డ్ క్రికెట్ లో కోహ్లీ మరోసారి తన మార్క్ చూపించాడు. సెంచరీలు చేయడం తనకేమీ కొత్త కాదు అని మరోసారి నిరూపించాడు. సౌతాఫ్రికాతో జరుగుతున్న తొలి వన్డేలో విరాట్ సెంచరీతో చెలరేగాడు. ఆదివారం (నవంబర్ 30) రాంచీ స్టేడియంలో సఫారీ బౌలర్లపై ఆధిపత్యం చూపిస్తూ శతకంతో మెరిశాడు. 102 బంతుల్లో సెంచరీ పూర్తి చేసుకున్న కోహ్లీ.. తన వన్డే కెరీర్ లో 52 వ సెంచరీ నమోదు చేశాడు. కోహ్లీ ఇన్నింగ్స్ లో 7 ఫోర్లతో పాటు ఐదు సిక్సర్లున్నాయి. కోహ్లీ సెంచరీతో పాటు రోహిత్ శర్మ (57) హాఫ్ సెంచరీ చేయడంతో ఇండియా భారీ స్కోర్ దిశగా పయనిస్తోంది.
ఆరంభం నుంచి దూకుడు:
ఈ మ్యాచ్ లో ఆరంభం నుంచి కోహ్లీ దూకుడుగా ఆడుతూ కనిపించాడు. తనదైన శైలికి భిన్నంగా ఆడుతూ ప్రారంభం నుంచే సఫారీ బౌలర్లపై ఎదురు దాడికి దిగాడు. జైశ్వాల్ ఔటైన తర్వాత రోహిత్ శర్మ క్రీజ్ లో పరుగులు చేయడానికి కాస్త టైం తీసుకున్న సమయంలో కోహ్లీ చెలరేగాడు. బ్యాటింగ్ కు దిగిన వెంటనే రెండు సిక్సర్లతో తన జోరు చూపించాడు. 18 ఓవర్లో కార్బన్ బాష్ బౌలింగ్ లో వరుసగా రెండు సిక్సర్లు కొట్టి స్టేడియంలో ఫ్యాన్స్ ను ఖుషీ చేశాడు. 47 బంతుల్లో హాఫ్ సెంచరీ పూర్తి చేసుకున్న విరాట్.. హాఫ్ సెంచరీ తర్వాత జాగ్రత్తగా ఆడుతూ సెంచరీ మార్క్ అందుకున్నాడు.
భారీ స్కోర్ దిశగా ఇండియా:
ఈ మ్యాచ్ విషయానికి వస్తే మొదట బ్యాటింగ్ చేస్తున్న ఇండియా ప్రస్తుతం 38 ఓవర్లలో 4 వికెట్ల నష్టానికి 233 పరుగులు చేసింది. క్రీజ్ లో విరాట్ కోహ్లీ (103), కెప్టెన్ కేఎల్ రాహుల్ (17) ఉన్నాడు. ఈ మ్యాచ్ లో ఓపెనర్ గా బరిలోకి దిగిన రోహిత్ అద్భుతంగా ఆడాడు. 51 బంతుల్లోనే 57 పరుగులు చేసి రాణించాడు. హిట్ మ్యాన్ ఇన్నింగ్స్ లో ఐదు ఫోర్లు, 3 సిక్సర్లున్నాయి. జైశ్వాల్ 18 పరుగులు చేసి విఫలమయ్యాడు. రెండేళ్ల తర్వాత జట్టులోకి వచ్చిన గైక్వాడ్ 8 పరుగులే చేసి నిరాశపరిచాడు. సౌతాఫ్రికా బౌలర్లలో బార్ట్ మాన్ రెండు వికెట్లు తీసుకున్నాడు. బర్గర్, జాన్సెన్ తలో వికెట్ తీసుకున్నారు.
52 ODI hundreds
— ESPNcricinfo (@ESPNcricinfo) November 30, 2025
83 international hundreds
1 VIRAT KOHLI 🐐 pic.twitter.com/m6cuaqodkq
