మేడారం(ములుగు), వెలుగు: ములుగు జిల్లా మేడారం జాతరలో ముందస్తుగా ఉన్నతాధికారులు జారీ చేసిన వీవీఐపీ పాసులు చెల్లడం లేదు. పాసులు ఉన్నవారిని పోలీసులు ప్రత్యేక క్యూలైన్లలోకి అనుమతించడం లేదు. జిల్లా కలెక్టర్ జారీ చేసిన పాసులు చెల్లడంలేదని గురువారం పలువురు భక్తులు, జర్నలిస్టులు ఆగ్రహం వ్యక్తం చేశారు. వీవీఐపీ పాసులు ఉన్నవారిని కూడా వీఐపీ క్యూలైన్ నుంచి పంపించడం కరెక్ట్కాదని వాపోయారు. అలాంటప్పుడు వీవీఐపీ పాసులను ఎందుకు ఇచ్చారని పోలీసులను ప్రశ్నించారు.
మేడారం జాతర డ్యూటీలో ఉన్న మీడియా ప్రతినిధులను గద్దెల ప్రాంగణంలోని మీడియా పాయింటుకు వెళ్లేందుకు కంట్రోల్రూం నుంచి పోలీసులు అనుమతించలేదు. జిల్లా ఎస్పీ డాక్టర్ శబరీష్ మీడియా ప్రతినిధులు కవరేజీ కోసం కంట్రోల్ రూం నుంచి వెళ్లొచ్చని, ఫ్యామిలీతో దర్శనానికి వీఐపీ క్యూలైన్ నుంచి వెళ్లొచ్చని చెప్పినప్పటికీ డ్యూటీ పోలీసులు పట్టించుకోవడంలేదు. దీంతో గురువారం పలువురు జర్నలిస్టులు, ఫొటోగ్రాఫర్లకు పోలీసులకు మధ్య తీవ్ర వాగ్వాదం జరిగింది. బుధవారం కన్నెపల్లిలో కవరేజీ కోసం వెళ్లిన మహిళా జర్నలిస్టులు తిరిగి గద్దెల వద్దకు బైక్పై వస్తుంటే పోలీసులు నిలిపివేశారు. దీంతో కొద్దిపాటి గొడవ జరిగింది. జర్నలిస్టు పాసులను కూడా పరిగణలోకి తీసుకోకపోవడంపై ఆగ్రహం వ్యక్తం చేశారు.
