వరంగల్ కాకతీయ మెడికల్ కాలేజీలో జూనియర్ విద్యార్థిపై సీనియర్ విద్యార్థుల దాడి కలకలం రేపుతోంది. సెప్టెంబర్ 14వ తేదీన కేఎంసీ ఆవరణలో నిర్వహించిన పుట్టినరోజు వేడుకల సందర్భంగా విద్యార్థుల మధ్య వివాదం తలెత్తినట్లు తెలుస్తోంది. ఫస్ట్ ఇయర్ చదువుతున్న ఓ మెడికోను సీనియర్లు విచక్షణా రహితంగా కొట్టారు.
తీవ్ర గాయాలపాలైన బాధితుడిని ఆస్పత్రికి తీసుకెళ్లారు. బాధిత విద్యార్థి మట్వాడ పోలీసులకు, యూజీసీకి ఫిర్యాదు చేశాడు. కేసు నమోదు చేసుకున్న పోలీసులు అన్ని కోణాల్లోనూ దర్యాప్తు చేస్తున్నారు. ఏడుగురు సీనియర్ మెడికోలపై ఐపీసీ 294 -బీ, 323, ర్యాగింగ్ నిరోధక చట్టాల కింద కేసులు నమోదు చేశారు. డిసిప్లినరీ కమిటీ భేటీ తర్వాత జూనియర్ విద్యార్థిపై దాడికి పాల్పడ్డ వారిపై సస్పెన్షన్ వేటు వేసే అవకాశం ఉన్నట్లు తెలుస్తోంది.
