టైటిల్ : మీట్ క్యూట్
డైరెక్షన్ : దీప్తి గంటా
కాస్ట్ : వర్ష బొల్లమ్మ, రుహానీ శర్మ, రాజా, ఆకాంక్ష సింగ్, దీక్షిత్, శివ కందుకూరి, సంచిత, గోవింద్
లాంగ్వేజ్ : తెలుగు, రన్ టైం : ఐదు ఎపిసోడ్లు (ఒక్కో ఎపిసోడ్ అరగంట)
ప్లాట్ ఫాం : సోనీ లివ్
‘మీట్ క్యూట్’ ఒక ఆంథాలజీ వెబ్ సిరీస్. ఇందులో ఐదు కథలున్నాయి. వాటిలో స్వాతి (వర్ష బొల్లమ్మ) సాఫ్ట్వేర్ ఇంజినీర్. అప్పటికే పది సంబంధాలు రిజెక్ట్ చేసిన స్వాతికి, పేరెంట్స్ బలవంతంగా అభితో రెస్టారెంట్లో పెళ్లి చూపులు ఏర్పాటు చేస్తారు. మరి స్వాతి పెళ్లికి ఓకే చెప్పిందా? లేదా? అనేది ‘మీట్ ద బాయ్’ స్టోరీ. సరోజ (రుహానీ శర్మ) తన ఫ్రెండ్స్తో కలిసి వెకేషన్కి వెళ్లాలనుకుంటుంది. అది భర్త జై (రాజా)కి నచ్చదు. కానీ, చెప్పలేకపోతుంటాడు. ఆ టైంలో సరోజ, మోహన్రావు (సత్యరాజ్) ఒకరికొకరు పరిచయమవుతారు. ఆ తర్వాత ఆమె లైఫ్ ఎలా మారిందనేది ‘ఓల్డ్ ఈజ్ గోల్డ్’.
పూజ (ఆకాంక్ష సింగ్), సిద్ధార్థ్ (దీక్షిత్) ప్రేమికులు. ఒకసారి వీళ్లిద్దరూ సిద్ధూ వాళ్ల అమ్మ పద్మ (రోహిణి) కంటపడతారు. పద్మకి, పూజ పరిచయమయ్యాక కొన్ని నిజాలు తెలుస్తాయి. అవేంటో తెలుసుకోవాలంటే ‘ఇన్ లా’ చూడాలి. ఒక వర్షం కురిసిన రాత్రి హీరోయిన్ శాలిని (అదా శర్మ), డాక్టర్ అమన్ (శివ) అనుకోకుండా కలుస్తారు. వాళ్లిద్దరూ తమ అభిరుచుల గురించి మాట్లాడుకుంటారు. అదే ‘స్టార్స్ టాక్’.
అరేంజ్డ్ మ్యారేజ్తో ఒక్కటైన అంజన (సంచిత), అజయ్ (గోవింద్) మధ్య మాటలు పెద్దగా ఉండవు. ఒకరి గురించి మరొకరికి తెలియకపోవడంతో విడిపోవాలి అనుకుంటుంది అంజన. అప్పుడు, అజయ్ ‘ఎక్స్గర్ల్ ఫ్రెండ్’ అతడి గురించి అంజనకు చెప్తుంది. తర్వాత ఏమైందనేది మిగతా కథ. ఓవరాల్గా ఈ సిరీస్లో సినిమాటోగ్రఫీ, బ్యాక్గ్రౌండ్ మ్యూజిక్, ప్రొడక్షన్ వ్యాల్యూస్, నటీనటుల నటన బాగున్నాయి. కథ, కథనం, డైలాగ్స్ నాట్ సో క్యూట్. డెబ్యూ డైరెక్టర్గా దీప్తి ఓకే.
***********
ఇన్వెస్టిగేటివ్ థ్రిల్లర్
టైటిల్ : చుప్ – రివేంజ్ ఆఫ్ ది ఆర్టిస్ట్, డైరెక్షన్ : ఆర్. బాల్కీ
కాస్ట్ : దుల్కర్ సల్మాన్, శ్రేయా ధన్వంతరి, పూజా భట్, సన్నీ డియోల్, లాంగ్వేజ్ : హిందీ, తెలుగు, రన్ టైం : 2:15 గంటలు
ప్లాట్ ఫాం : జీ5
‘సీతారామం’తో తెలుగులో మంచి హిట్ అందుకున్నాడు మలయాళ నటుడు దుల్కర్. రీసెంట్గా హిందీలో ‘చుప్’ అనే క్రైమ్ ఇన్వెస్టిగేటివ్ థ్రిల్లర్ ద్వారా ఎంట్రీ ఇచ్చాడు. ఈ కథ విషయానికొస్తే.. ముంబైలో వరుస హత్యలు జరుగుతుంటాయి. చనిపోయిన వాళ్లంతా ఫిల్మ్ క్రిటిక్స్. ఆ హత్యకేసుల్ని ఇన్వెస్టిగేట్ చేయడానికి క్రైమ్ బ్రాంచ్ నుంచి అరవింద్ (సన్నీ డియోల్) అనే పోలీస్ ఆఫీసర్ వస్తాడు. అరవింద్, ఆ హంతకుడిని ఎలా పట్టుకున్నాడన్నదే కథ. మరోవైపు గురుదత్ ఫ్యాన్ అయిన ఫ్లోరిస్ట్ డానీ (దుల్కర్), జర్నలిస్ట్ నీలా మీనన్ (శ్రేయా ధన్వంతరి) మధ్య లవ్ ట్రాక్ నడుస్తుంటుంది. అయితే, క్లైమాక్స్లో ఈ జంట హత్యలతో కనెక్ట్ అవుతుంది. ఈ కథలో ఆ హంతకుడు ఎవరు? ఫిల్మ్ క్రిటిక్స్నే ఎందుకు టార్గెట్ చేశాడు? అతడి ఉద్దేశం ఏంటి? అనేది తెలియాలంటే ‘చుప్’ చూడాల్సిందే. ‘పా’, ‘షమితాబ్’, ‘ప్యాడ్ మ్యాన్’ వంటి వెరైటీ స్టోరీస్ తీసిన డైరెక్టర్ బాల్కీ, ‘చుప్’లోనూ తన మార్క్ చూపించాడు. ఇందులో దుల్కర్ నటన ప్లస్ పాయింట్. మిగతా క్యారెక్టర్స్ తమ పరిధి మేరకు నటించారు. సినిమాటోగ్రఫీ, మ్యూజిక్ బాగున్నాయి.
***********
బీహార్ పోలీస్ స్టోరీ
టైటిల్ : ఖాకీ – ది బీహార్ చాప్టర్, డైరెక్షన్ : భవ్ ధులియా
కాస్ట్ : కరణ్ థాకర్, అవినాశ్ తివారి, నిఖిత దత్తా, రవి కిషన్, అభిమన్యు సింగ్, శ్రద్ధా దాస్ లాంగ్వేజ్ : హిందీ, తెలుగు
రన్ టైం : ఏడు ఎపిసోడ్లు (ఒక్కోటి దాదాపు గంట)
ప్లాట్ ఫాం : నెట్ఫ్లిక్స్
ఈ సిరీస్ 2000 నుంచి 2006 మధ్యలో జరిగిన సంఘటనల ఆధారంగా తీశారు. కథలోకి వెళ్తే.. చందన్ (అవినాశ్ తివారి) బీహార్లో మోస్ట్ వాంటెడ్ క్రిమినల్. విలేజ్ కుర్రాడు అక్రమాలకు పాల్పడుతూ గ్యాంగ్స్టర్గా ఎదుగుతాడు. అతడు కనిపిస్తే కాల్చేసేందుకు రెడీ ఉంటారు పోలీసులు. కానీ, రాజకీయ నాయకులు, కొందరు పోలీస్ ఆఫీసర్స్ సపోర్ట్తో తప్పించుకుంటుంటాడు. అలా పోలీస్ ఇన్ఫార్మర్గా పనిచేసేవాళ్లని కూడా మర్డర్ చేస్తాడు. అదలా ఉండగా.. అప్పుడే ట్రైనింగ్ కంప్లీట్ చేసి, ఐపీఎస్గా బాధ్యతలు తీసుకుంటాడు అమిత్ లోధా (కరణ్ థాకర్). అతని శక్తి సామర్థ్యాలు తెలిసిన అధికారులు, చందన్ని పట్టుకోమని అమిత్కి ఆర్డర్స్ ఇస్తారు. అమిత్, చందన్ను పట్టుకునే క్రమంలో ఎలాంటి ఛాలెంజ్లు ఎదుర్కొన్నాడు? చందన్ని పట్టుకున్నాడా? లేదా? అనేదే మిగతా స్టోరీ.
ఈ సిరీస్లో చందన్ మాతో, అమిత్ లోధా మధ్య ఇంట్రెస్టింగ్ సీన్స్ ఉంటాయి. బీహార్ బ్యాక్ డ్రాప్, గ్యాంగ్స్టర్ , పోలీస్ మధ్య నడిచే కథ ఇంట్రెస్టింగ్గా ఉంటుంది. ముఖ్యంగా పోలీస్ కథలు ఇష్టపడేవాళ్లకు ఈ సిరీస్ నచ్చుతుంది. కాకపోతే రన్ టైం చాలా ఎక్కువ.