ముంబై : వెస్ట్ బెంగాల్ సీఎం మమతా బెనర్జీకి బాంబే హైకోర్టులో చుక్కెదురైంది. ముంబైలో జాతీయ గీతాన్ని అవమానించారంటూ మమతపై రిజిస్టరైన కేసును కొట్టేసేందుకు ధర్మాసనం నిరాకరించింది. ఈ విషయంలో జోక్యం చేసుకోవాల్సిన అవసరం లేదని జస్టిస్ అమిత్ బోర్కర్ తో కూడిన సింగిల్ బెంచ్ తేల్చి చెప్పింది. 2021లో ముంబైలో జరిగిన ఓ కార్యక్రమంలో జాతీయ గీతాన్ని మమత అగౌరవపర్చారని, చర్యలు తీసుకోవాలని బీజేపీ ముంబై యూనిట్ ఆఫీస్ బేరర్ వివేకానంద్ గుప్తా మెజిస్ట్రేట్ కోర్టులో ఫిర్యాదు చేశారు. ఆ కార్యక్రమంలో జాతీయ గీతం ఆలపిస్తున్న సమయంలో మమత లేచి నిలబడలేదని ఫిర్యాదులో పేర్కొన్నారు. దీంతో మెజిస్ట్రేట్ కోర్టు మమతకు సమన్లు జారీ చేసింది. ఈ సమన్లను రద్దు చేసి కేసును మళ్లీ పరిశీలించాలని 2023లో సెషన్స్ కోర్టు ఆదేశాలిచ్చింది. ఈ ఆదేశాలను సవాలు చేస్తూ మమత బాంబే హైకోర్టులో పిటిషన్ వేశారు. సెషన్ కోర్టు సమన్లతో పాటు, మొత్తం కేసును రద్దు చేయాలని కోరారు. దీనిపై బుధవారం విచారించిన కోర్టు.. సెషన్ కోర్టు పాటించిన విధానం సరైందేనని, ఈ కేసులో హైకోర్టు జోక్యం చేసుకోవాల్సిన అవసరం లేదని తీర్పునిచ్చింది.
కేంద్రం వైఖరికి నిరసనగా మమత ధర్నా
బెంగాల్ అభివృద్ధిని కేంద్రం అడ్డుకుంటోందని, నిధులు రిలీజ్ చేయట్లేదంటూ మమతా బెనర్జీ ధర్నాకు దిగారు. బుధవారం కోల్కతా రెడ్ రోడ్డులోని అంబేద్కర్ విగ్రహం ఎదుట ఆమె బైఠాయించారు. ఉపాధిహామీ, హౌసింగ్, రోడ్డు రవాణా, పలు పథకాలకు కేంద్రం నిధులు ఆపేసిందని మమత మండిపడ్డారు. గురువారం సాయంత్రం దాకా ధర్నా కొనసాగుతుందన్నారు. ఇందిరా ఆవాస్ యోజన స్కీమ్కు, ఓబీసీ స్టూడెంట్లకు స్కాలర్షిప్లు ఇవ్వట్లేదని, రోడ్ల నిర్మాణానికి కేంద్రం సహకరించట్లేదని అన్నారు. ఉపాధి హామీ కింద రావాల్సిన రూ.7వేల కోట్లు రిలీజ్ చేయట్లేదన్నారు.ఈశాన్య రాష్ట్రాలను పట్టించుకోవట్లేదని, అందుకే తాను ధర్నా చేస్తున్నానన్నారు.
