- హైదరాబాదీలు ఓటీటీలోఏం చూస్తున్నరు?
- హిందీ కంటెంట్కే ఎక్కువ మంది ప్రయారిటీ
- తర్వాతి స్థానాల్లో ఇంగ్లిష్, తెలుగు సినిమాలు, వెబ్ సిరీస్‌‌లు
ప్రస్తుతం ఓటీటీ ట్రెండ్ నడుస్తున్నది. రోజుకో వెబ్ సిరీస్ వస్తున్నది. వారానికి డజన్ సినిమాలు స్ట్రీమింగ్ అయితున్నయ్. మరి ఇందులో హైదరాబాదీలు ఏవి ఎక్కువ చూస్తున్నరు? ఏ కంటెంట్ను ఇష్టపడుతున్నరు? ఎంత సేపు ఓటీటీల్లో గడుపుతున్నరు? ఈ విషయాలపై రెడ్‌ మ్యాటర్‌ టెక్నాలజీస్‌ (ఆర్ఎంటీ) అనే సంస్థ సర్వే చేసింది. ‘అండర్స్టాండింగ్ పెయిడ్‌ ఓటీటీ సబ్స్ర్కైబర్స్ ఆఫ్ హైదరాబాద్‌’ పేరుతో రిపోర్టును రిలీజ్ చేసింది. తెలుగు సినిమాలు బాలీవుడ్‌‌లో అదరగొడుతుంటే.. హైదరాబాదీలు మాత్రం హిందీ సినిమాలు మస్తు చూస్తున్నరని చెప్పుకొచ్చింది.
ఆ తరువాత ఇంగ్లీష్... మూడోప్లేస్లో తెలుగు
హైదరాబాద్‌, వెలుగు : సిటీ జనం తెలుగు సినిమాలను పెద్దగా పట్టించుకోవడం లేదు. హిందీ సినిమాలపై, వెబ్సిరీస్లపై మక్కువ చూపుతున్నారు. ఇంగ్లీష్ కంటెంట్ను బాగా ఇష్టపడుతున్నారు. వీళ్ల ప్రయారిటీలో తెలుగు కంటెంట్ మూడోస్థానంలో ఉంది. మార్కెటింగ్‌ స్ట్రాటజీ కన్సల్టెన్సీ ఆర్ఎంటీ (రెడ్‌ మ్యాటర్‌ టెక్నాలజీస్‌) ‘అండర్స్టాండింగ్ పెయిడ్‌ ఓటీటీ సబ్స్ర్కైబర్స్ ఆఫ్ హైదరాబాద్‌’ పేరుతో విడుదల చేసిన రిపోర్ట్ఈ ఆసక్తికర విషయాలను వెల్లడించింది. దీని ప్రకారం.. 52శాతం మంది హిందీ ఓటీటీ కంటెంట్ ఇష్టపడుతున్నారు. 28శాతం మంది ఇంగ్లీష్ ఓటీటీ కంటెంట్ ఎక్కువగా చూస్తున్నారు. 14శాతం మంది మాత్రమే తెలుగు కంటెంట్ను అభిమానిస్తున్నారు. 26 ఏళ్ల లోపు వ్యక్తులు ఓటీటీని ఒంటరిగా చూడాలనుకుంటున్నారు. 36 ఏళ్లు దాటిన వారిలో 46శాతం మంది కుటుంబంతో కలిసి ఓటీటీ కంటెంట్ను టీవీలో చూడాలని కోరుకుంటున్నారు. మహిళల్లో 60శాతం మంది హిందీ, 27 శాతం ఇంగ్లీష్ కంటెంట్ చూడటానికి ఇష్టపడుతున్నారు. తెలుగు చూసేవారి సంఖ్య ఆరు శాతాన్ని మించడం లేదు. ఓటీటీ ప్లాట్‌ ఫామ్స్ లో ప్రైమ్ వీడియోను ఎక్కువ మంది వాడుతున్నారు. సర్వేలో పాల్గొన్న వారిలో 70శాతం యూజర్లు అమెజాన్ ప్రైమ్ యూజర్లు ఉన్నారు. రోజుకు కనీసం మూడు గంటలు ఓటీటీలపై గడుపుతున్నారు.
సగం మంది ఫోన్లల్లోనే..
వ్యూయర్లలో సగం మంది కంటెంట్ను మొబైల్ ఫోన్లలో చూడటానికి ఇష్టపడుతున్నారు. 51 శాతం మంది ఫోన్లలో, 32 శాతం మంది టీవీ స్క్రీన్లపై, 14 శాతం మంది కంప్యూటర్లలో కంటెంట్ను చూస్తున్నారు. 36 ఏళ్లపైబడిన గ్రూపులో 43 శాతం మంది వ్యూయర్లు మొబైల్స్లో కంటెంట్ చూస్తున్నారు. ఓటీటీల సబ్స్క్రిప్షన్ రేట్లు ఎక్కువ ఉండటం తమకు నచ్చడం లేదని 31 శాతం మంది, ప్రకటనలు నచ్చడం లేదని 29 శాతం మంది, నెట్కనెక్టివిటీ తప్పనిసరి కావడం ఇబ్బందిగా ఉందని 27 శాతం మంది చెప్పారు. మెజారిటీ యూజర్లు మంచి కంటెంట్ను వెతుక్కోవడానికి సోషల్ మీడియాపై ఆధారపడుతున్నట్టు చెప్పారు. ఈ సర్వే కోసం 500 మంది ఓటీటీ యూజర్ల నుంచి వివరాలు సేకరించామని ఆర్ఎంటీ హెడ్ ఆఫ్ రీసెర్చ్ అమన్ చెప్పారు.
రిపోర్టు హైలైట్స్:
- 36సంవత్సరాలు దాటిన వ్యక్తులలో 55శాతం మంది తమ కుటుంబ సభ్యులతో కలిసి ఓటీటీలు చూడాలనుకుంటున్నారు. యువత ఒంటరిగా చూడటానికి ఇష్టపడుతున్నారు.
- హైదరాబాద్‌ ఓటీటీ సబ్స్క్రయిబర్లలో 52శాతం మంది హిందీ ఓటీటీ కంటెంట్‌కు ప్రాధాన్యం ఇస్తున్నారు. 28శాతం మంది ఇంగ్లీష్ ఓటీటీ కంటెంట్‌కుప్రాధాన్యతనిస్తే, 14శాతం మంది మాత్రమే తెలుగు కంటెంట్‌కు ప్రాధాన్యం ఇస్తున్నారు.
- హైదరాబాదీలను ఆకట్టుకోవడంలోప్రాంతీయ ఓటీటీ సంస్థలు ఇబ్బంది పడుతున్నాయి.నేషనల్,ఇంటర్నేషనల్ సంస్థల కంటెంట్కే ఎక్కువ ఆదరణ ఉంది.
