సంప్రదాయ వైద్యంలో పరిశోధన కోసం హైదరాబాద్లోని నేషనల్ ఇన్స్టిట్యూట్ ఆఫ్ ఇండియన్ మెడికల్ హెరిటేజ్ (ఎన్ఐఎంహెచ్)ను సహకార కేంద్రంగా ప్రపంచ ఆరోగ్య సంస్థ గుర్తించింది. ఈ గుర్తింపు నాలుగేండ్ల కాలానికి ఉంటుందని ఆయుష్ శాఖ ప్రకటించింది. ఆయుర్వేద, యునాని, సిద్ధ తదితర సంప్రదాయ వైద్య పద్ధతులపై సహకార పరిశోధన కోసం డబ్ల్యూహెచ్ఓకు ఈ సంస్థ సహకారం అందించనున్నది.
జామ్నగర్ లోని ఇన్స్టిట్యూట్ ఫర్ టీచింగ్ అండ్ రీసెర్చ్ ఇన్ ఆయుర్వేదం, న్యూఢిల్లీలోని మొరార్జీ దేశాయ్ నేషనల్ ఇన్స్టిట్యూట్ ఆఫ్ యోగా(ఎండీఎన్వై)లతోపాటు భారతదేశంలో సంప్రదాయ వైద్య రంగంలో మూడో డబ్ల్యూహెచ్ఓ సహకార కేంద్రంగా సీసీఆర్ఏఎస్–ఎన్ఐఎంహెచ్ హైదరాబాద్ ఉంది.
1996లో హైదరాబాద్లో ఎన్ఐఎంహెచ్ను స్థాపించారు. దీనిని గతంలో నేషనల్ సెంటర్ ఆఫ్ ఇండియన్ మెడికల్ హెరిటేజ్(ఎన్సీఐఎంహెచ్) అని పిలిచేవారు. ఇది భారత ప్రభుత్వ ఆయుష్ మంత్రిత్వ శాఖలోని సెంట్రల్ కౌన్సిల్ ఫర్ రీసెర్చ్ ఇన్ ఆయుర్వేద సైన్సెస్(సీసీఆర్ఏఎస్) ఆధ్వర్యంలో పనిచేస్తుంది.
ఈ సంస్థ భారతదేశంలో ఆయుర్వేదం, యోగా ప్రకృతి వైద్యం, యునాని, సిద్ధ, సోవా రిగ్పా, హోమియోపతి, బయోమెడిసిన్, సంబంధిత ఆరోగ్య సంరక్షణ విభాగాల్లో వైద్య చారిత్రక పరిశోధనలను డాక్యుమెంట్ చేయడానికి, ప్రదర్శించడానికి అంకితం చేసింది.
