టెక్నాలజీ వాడకం పెరిగాక ఆన్లైన్ షాపింగ్ చేసేవాళ్లు ఎక్కువైపోయారు. పెన్సిల్ నుంచి బట్టల వరకు ప్రతీది ఆన్లైన్లో కొనడానికి అలవాటు పడ్డారు. అర్షద్ వసీబ్ అనే ట్విట్టర్ యూజర్ కూడా ఆన్లైన్ షాపింగ్ చేద్దామనుకున్నాడు. రోజూ రాత్రిపూట వేసుకునే నిక్కరు కోసం వెతికాడు. తను వెతుకుతుండగా బ్లూ, గ్రీన్ చారలతో ఉన్న ఒక ఫ్యాషన్ బ్రాండ్ షార్ట్ కనిపించింది. దాని కింద ధర కేవలం15, 450 రూపాయలు అని ఉండడం చూసి అవాక్కయ్యాడు. ‘నిక్కరు ఇంత రేటా? అసలు దీనికి ఇంత రేటెందుకు పెట్టారు!’ అంటూ దాన్ని ఫొటో తీసి ట్విట్టర్లో షేర్ చేశాడు. అది చూసిన నెటిజన్లు ‘అది 90ల కాలం నాటిది అయ్యుండొచ్చు. ఓల్డ్ ఈజ్ గోల్డ్ అంటారు కదా. అందుకే అది అంత రేటు’ అంటూ రెస్పాండ్ అవుతున్నారు. మొన్నామధ్య అమెజాన్లో కూడా ఇలాంటి ధరే ఒకటి ఆశ్చర్యపరిచింది. ఒక పింక్ కలర్ ప్లాస్టిక్ బకెట్ ధర 35,000 రూపాయలు ఉంటే దాన్ని 28శాతం డిస్కౌంట్తో 25, 999 రూపాయలకు అందుబాటులో ఉంచారు. ఆ వార్త సోషల్ మీడియాలో వీర విహారం చేసింది.
