వాషింగ్టన్ : మద్యం తాగే వాళ్లకు ప్రపంచ ఆరోగ్య సంస్థ (డబ్ల్యూహెచ్వో) షాకింగ్ న్యూస్ చెప్పింది. శరీరంలోకి ఒక్క చుక్క ఆల్కహాల్ పోయినా క్యాన్సర్ బారినపడ్తారని హెచ్చరించింది. ప్రఖ్యాత మెడికల్ జర్నల్ ‘ది లాన్సెట్’ లో దీనికి సంబంధించిన కథనం ప్రచురితమైంది. తక్కువగా ఆల్కహాల్ తాగితే ఆరోగ్యానికి ఇబ్బంది కలగదనే భరోసా ఏదీ లేదని డబ్ల్యూహెచ్వో నాన్ కమ్యూనికబుల్ డిసీజెస్ విభాగానికి తాత్కాలికంగా నేతృత్వం వహిస్తున్న డాక్టర్ క్యారినా ఫెరీరా బోర్గెస్ స్పష్టం చేశారు. ఒక మోస్తరు స్థాయిలో మద్యం తాగితే ఆరోగ్యానికి ఎలాంటి నష్టం ఉండదనే భావన సరికాదన్నారు. ‘‘ ఫ్రాన్స్ కేంద్రంగా పనిచేసే ఇంటర్నేషనల్ ఏజెన్సీ ఫర్ రీసెర్చ్ ఆన్ క్యాన్సర్ ప్రకారం.. గ్రూప్ 1 కార్సినోజెన్స్ కేటగిరీలో ఆల్కహాల్ కూడా ఉంది. ఇదే కేటగిరిలో ఆస్బెస్టాస్, రేడియేషన్, టొబాకో వంటివి ఉన్నాయి. దీన్నిబట్టి అత్యధిక క్యాన్సర్ ముప్పును కలిగించే పానీయంగా ఆల్కహాల్ ను పరిగణించవచ్చు”అని తాజా ప్రకటనలో డబ్ల్యూహెచ్వో వివరించింది.
వైన్, బీర్, రెడ్ వైన్ తాగినా..
వైన్, బీర్, రెడ్ వైన్ వంటి ఆల్కహాలిక్ డ్రింక్స్తాగితే ప్రధానంగా 7 రకాల క్యాన్సర్లు చుట్టుముట్టే ముప్పు ఉంటుందంటూ తాజాగా ‘హెల్త్ లైన్’ వెబ్ సైట్ లోనూ ఒక అధ్యయన నివేదిక ప్రచురితమైంది. ఆ డ్రింక్స్ వల్ల గొంతు, రొమ్ము, కాలేయం, పెద్ద పేగు, ఆహార నాళాలకు సంబంధించిన క్యాన్సర్లు వచ్చే అవకాశం ఉంటుందని హెచ్చరించారు. ఆల్కహాల్ అలవాటున్న చాలా మంది అమెరికాలో వివిధ రకాల క్యాన్సర్లతో బాధపడుతున్నారని నివేదికలో ప్రస్తావించారు. నేషనల్ క్యాన్సర్ ఇన్ స్టిట్యూట్ ఆఫ్ అమెరికాకు చెందిన అసోసియేట్ డైరెక్టర్ విలియం ఎం.పి.క్లెయిన్ సారథ్యంలోని నిపుణుల బృందం అధ్యయనంలో ఈవిషయాలు వెల్లడయ్యాయి. ఆల్కహాల్ తీసుకోవడం వల్ల ఆరోగ్యానికి మేలు జరుగుతుందనే అపోహలో చాలామంది ఉంటారని, అయితే అది ఎంతమాత్రం వాస్తవం కాదని రీసెర్చ్ టీం తేల్చి చెప్పింది. వైన్, బీర్, రెడ్ వైన్తాగినా క్యాన్సర్ ముప్పు ముసురుకుంటుందని వార్నింగ్ ఇచ్చింది. అన్ని రకాల ఆల్కహాలిక్ డ్రింక్స్కు దూరంగా ఉంటేనే క్యాన్సర్ గండం బారిన పడకుండా రక్షణ పొందొచ్చని సూచించింది.
ఏటా 10 లక్షల మందికిపైగా..
ఏటా ప్రపంచవ్యాప్తంగా ఎంతోమంది క్యాన్సర్ తో ప్రాణాలు కోల్పోతున్నారు. 2020 సంవత్సరంలో 10 లక్షల మందికిపైగా ప్రజల ప్రాణాలను క్యాన్సర్ మహమ్మారి హరించింది. ఇలా చనిపోయిన వారిలో ఎక్కువ మంది రొమ్ము, ఊపిరితిత్తులు, పెద్దపేగు, పురీష నాళం (రెక్టమ్), ప్రొస్టేట్ క్యాన్సర్ల బాధితులేనని తాజా నివేదికలు చెబుతున్నాయి.
--
