రిట్లు జారీ చేసే విధానాన్ని బ్రిటన్ నుంచి గ్రహించారు. వీటిని బ్రిటన్ లో విశిష్ట ఆదేశాలు అంటారు. రిట్స్ను ఆజ్ఞలు లేదా ఆదేశాలు అంటారు. బ్రిటన్లో సాధారణ న్యాయాన్ని పొందనప్పుడు రాజు అసాధారణ రెమెడీ కోసం ఈ రిట్లను జారీ చేస్తారు. కాబట్టి వీటిని ఫౌంటేన్ ఆఫ్ జస్టిస్ అంటారు. 1950కు ముందు కలకత్తా, ముంబయి, మద్రాస్ హైకోర్టులకు మాత్రమే రిట్లు జారీ చేసే అధికారం ఉండేది. రాజ్యాంగంలో అమలులోకి వచ్చిన తర్వాత ఆర్టికల్ 226 ప్రకారం అన్ని హైకోర్టులకు రిట్లు జారీ చేసే అధికారం కల్పించారు.
హెబియస్ కార్పస్: ఇది ప్రాచీనమైన రిట్గా భావిస్తారు. దీనికి లాటిన్ భాషలో అర్థం శరీరాన్ని కలిగి ఉండటం, హెబియస్ అంటే కలిగి ఉండుట, కార్పస్ అంటే శరీరం. ఈ రిట్టును చట్ట విరుద్ధంగా నిర్బంధించిన వ్యక్తిని 24గంటల్లోగా భౌతికంగా సమీప న్యాయస్థానం ఎదుట హాజరుపరచమని, అరెస్ట్ చట్టబద్ధత తెలపమని, అరెస్టుకు గల కారణాలను తెలపమని జారీ చేస్తారు.
మాండమస్: మాండమస్ అనే పదానికి అర్థం మేము ఆదేశిస్తున్నాం. ఒక ప్రభుత్వాధికారి తను నిర్వర్తించాల్సిన విధులను నిర్వహించకపోతే మాండమస్ రిట్టు జారీ చేస్తారు ఈ రిట్టును ఒక ప్రభుత్వ సంస్థపైగాని, కార్పొరేషన్ సంస్థపైగాని ఏదైనా కింది కోర్టుపై గాని, ట్రిబ్యునల్పై గాని, మంత్రి మండలిపై గాని జారీ చేయవచ్చు. ఈ రిట్ జారీ కోర్టుల విచక్షణ మీద ఆధారపడి ఉంటుంది.
ప్రొహిబిషన్: ఈ పదానికి అర్థం నిషేధించడం. ఒక కింది కోర్టు లేదా ట్రిబ్యునల్ తన పరిధిలో లేని ఏదైనా కేసు పరిశీలిస్తూ ఉంటే తదుపరి ఆదేశాల వరకు ఆ పరిశీలన నిలిపివేయమని ఉన్నత న్యాయస్థానం ఈ రిట్టు జారీ చేస్తుంది. పరిశీలన నిలిపివేసి ఈ కేసును మరో కోర్టుకు బదిలీ చేస్తారు. లేక రిట్ జారీ చేసిన కోర్టు స్వయంగా ఈ కేసును పరిశీలిస్తుంది.
సెర్షియారరి: ఈ పదానికి అర్థం టు బి సర్టిఫైడ్. ఒక కింది కోర్టు లేదా ట్రిబ్యునల్ ఇచ్చిన తీర్పు న్యాయబద్ధంగా లేనప్పుడు గాని ఆ కేసును ఆ కోర్టు పరిధిలో లేనప్పుడు గాని ఈ రిట్టును ఉన్నత న్యాయస్థానం జారీ చేసి ఆ తీర్పును రద్దు చేస్తుంది.
కోవరెంటో: అర్హత లేని వ్యక్తి ప్రజా సంబంధమైన పదవుల్లోకి ప్రవేశించినా లేదా ప్రజా సంబంధమైన పదవుల్లో ఉన్న వ్యక్తి ఆ పదవిని దుర్వినియోగపరిచినా ఆ వ్యక్తికి ఉన్న చట్టబద్ధమైన అధికారాన్నిఈ రిట్ ద్వారా న్యాయస్థానాలు ప్రశ్నిస్తాయి.
