మారుతున్న లైఫ్ స్టైల్‌ వల్ల సరైన తిండి తినకో, కలుషితమైన ఆహారం తినడంవల్లో గ్యాస్ట్రిక్ సమస్యలు వస్తున్నాయి. నలుగురిలో ఉన్నప్పుడు గ్యాస్‌ సమస్య వస్తే ఇబ్బందిగా ఉంటుంది. ఇలాంటి సమస్యనుంచి బయటపడాలంటే... ప్రతీరోజు ఈ యోగాసనాలు చేయాలి. ఇవి చేస్తే... గ్యాస్ట్రిక్ ట్రబుల్‌తో పాటు ఎసిడిటీ, కడుపు ఉబ్బరం లాంటి సమస్యలన్నీ పోయి, జీర్ణ వ్యవస్థ మెరుగుపడుతుందని చెప్తున్నాడు యోగా గురువు సిద్ధ అక్షర్‌.
మలాసనం:
కాళ్లను కొంచెం వెడల్పు చేసి ఇండియన్ టాయిలెట్‌ పోజ్‌లో కూర్చోవాలి. వెన్నెముక నిటారుగా ఉంచాలి. తరువాత రెండు చేతుల్ని మోకాళ్లపై ఉంచి నమస్కరిస్తూ గాలి బాగా పీల్చి, వదులుతూ ఈ ఆసనాన్ని చేయాలి.
పవనముక్తాసనం:
ఇదెలాచేయాలంటే.. నేలపై వెల్లకిలా పడుకోవాలి. తరువాత రెండు కాళ్లను పైకెత్తి తొడలు పొత్తి కడుపుకి, మోకాళ్లు ఛాతికి తాకేలా మడవాలి. తలను మోకాళ్లకి ఆనిస్తూ, రెండు చేతులతో కాళ్లను గట్టిగా కడుపుకు అదిమి, గాలి పీల్చి, వదలాలి.
దండాసనం:
కింద కూర్చొని రెండు కాళ్లు చాపి దగ్గరగా పెట్టాలి. నిటారుగా కూర్చొని రెండు అరచేతుల్ని నేలకి ఆన్చి, గాలి పీలుస్తూ, వదలాలి.
