యూట్యూబ్ లో వ్యూస్ కోసం బరితెగిస్తున్న కంటెంట్ క్రియేటర్లు, యూట్యూబర్లపై వరుసగా చర్యలు తీసుకుంటున్నారు సైబర్ క్రైమ్ పోలీసులు. మైనర్లతో బూతు ఇంటర్వ్యూలు చేస్తూ.. వైరల్ వీడియోలుగా ప్రమోట్ చేస్తూ.. వ్యూస్ వేటలో నైతిక విలువలు మరిచిన మరో యూట్యూబర్ ను హైదరాబాద్ పోలీసులు బుధవారం (జనవరి 07) అరెస్టు చేశారు.
పిల్లలపై లైంగిక దాడి కంటెంట్ కేసులో హైదరాబాద్ సైబర్ క్రైమ్ పోలీసులు కీలక అరెస్ట్ చేశారు. వైరల్ హబ్ అనే యూట్యూబ్ ఛానల్ ద్వారా మైనర్లతో అశ్లీల ఇంటర్వ్యూలు చేసి.. వీడియోలు అప్లోడ్ చేసిన కంబేటి సత్యమూర్తిని అరెస్ట్ చేశారు పోలీసులు.
15 నుంచి 17 ఏళ్ల బాలబాలికలతో ఇంటర్వ్యూ చేసిన సత్యమూర్తి.. అసభ్య ప్రశ్నలు, అనుచిత ప్రవర్తనకు పాల్పడ్డట్లు గుర్తించారు. పోక్సో, ఐటీ చట్టాల కింద కేసు నమోదు చేసి దర్యాప్తు చేస్తున్నారు సీసీఎస్ పోలీసులు. మైనర్ల విషయంలో ఇలాంటి చట్టవిరుద్ధమైన ఇంటర్వూలకు పాల్పడినా.. కంటెంట్ క్రియేట్ చేసినా.. కఠిన చర్యలు తప్పవని ఈ సందర్భంగా సైబర్ క్రైమ్ పోలీసులు హెచ్చరికలు జారీ చేశారు.
