ఉక్రెయిన్‌లో యుద్ధాన్ని ముగించేందుకు శాంతి చర్చల కోసం చైనా అధ్యక్షుడు జి జిన్‌పింగ్‌ను భేటీ కావాలనుకుంటున్నట్లు ఉక్రెయిన్ అధ్యక్షుడు వోలోడిమిర్ జెలెన్స్కీ చెప్పారు. రష్యాకు చైనా ఆయుధాలు సరఫరా చేస్తోందన్న ఆరోపణల నేపథ్యంలో ఆయన ఈ వ్యాఖ్యలు చేశారు. చైనా ఆయుధాలను రష్యాకు పంపకపోవచ్చని జెలెన్స్కీ అభిప్రాయపడ్డారు. ప్రపంచ యుద్ధాన్ని తప్పించేందుకు, రష్యాకు చైనా ఆయుధాలు సరఫరా చేయకుండా ఉండే అంశంపై ఆ దేశ అధ్యక్షునితో చర్చిస్తానని చెప్పారు. ఉక్రెయిన్, రష్యా యుద్ధం ప్రారంభమై ఏడాది పూర్తై సందర్భంగా మీడియాతో మాట్లాడిన జెలెన్స్కీ ఈ విషయాలు వెల్లడించారు. ఇదిలా ఉంటే చైనా చేసిన శాంతి ప్రతిపాదనలో ఉక్రెయిన్ నుంచి రష్యా దళాల ఉపసంహరణపై మాత్రం ఎలాంటి ప్రకటన చేయలేదు. జిన్ పింగ్ ను కలిసేందుకు జెలెన్సీ సిద్ధంగా ఉన్నా.. అటు చైనా మాత్రం ఇంకా ఈ అంశంపై స్పందించలేదు. మరోవైపు చైనా శాంతి ప్రతిపాదనను రష్యా స్వాగతించింది.
