ఉమ్మడి ఖమ్మం జిల్లాలో చివరి రోజు జోరుగా నామినేషన్లు

• కొన్నిచోట్ల అర్ధరాత్రి వరకు కొనసాగిన నామినేషన్ల ప్రక్రియ
• ఖమ్మం జిల్లాలో పలు గ్రామాలు ఏకగ్రీవం 
• నేటి నుంచి రెండో విడత నామినేషన్లు షురూ.. 
• ఏర్పాట్లు పూర్తిచేసిన అధికారులు.. 

భద్రాద్రికొత్తగూడెం/ఖమ్మం, వెలుగు :  ఉమ్మడి ఖమ్మం జిల్లాలో మొదటి దశ ఎన్నికలు జరగనున్న పంచాయతీల్లో చివరిరోజు పెద్ద సంఖ్యలో నామినేషన్లు దాఖలయ్యాయి. ఖమ్మం జిల్లాలో మొదటి విడతలో 192 గ్రామపంచాయతీలలో సర్పంచ్, 1740 వార్డులలో నామినేషన్లు తీసుకున్నారు. భద్రాద్రికొత్తగూడెం జిల్లాలో 159 గ్రామపంచాయతీలలో సర్పంచ్లుకు , 1436 వార్డులకు నామినేషన్లను తీసుకున్నారు. కాగా ఉదయం నుంచే క్లస్టర్​ సెంటర్ల వద్ద బారులు తీరిన అభ్యర్థులు సర్పంచ్​, వార్డు మెంబర్​ స్థానాలకు పోటాపోటీగా నామినేషన్లు దాఖలు చేశారు. సాయంత్రం 5 గంటల వరకు వచ్చిన అభ్యర్థులను అనుమతించిన ఆఫీసర్లు వారి నుంచి అర్ధరాత్రి దాకా నామినేషన్లు తీసుకున్నారు.

ఈ పరిస్థితి అశ్వాపురం, ఎర్రుపాలెం మండలంలో ఎక్కువగా కనిపించింది. కాగా, తొలివిడత నామినేషన్ల దాఖలు ప్రక్రియ శనివారంతో ముగియగా, ఆదివారం నామినేషన్ల పరిశీలనకు అధికారులు ఏర్పాట్లు పూర్తి చేశారు. సాయంత్రం 5 గంటల తర్వాత  స్క్రూటినీ పూర్తిచేసి, చెల్లుబాటయ్యే అభ్యర్థుల లిస్ట్​రెడీ చేస్తారు.  నామినేషన్‌‌‌‌ తిరస్కరణకు గురైతే   ఆర్డీవోకు గానీ,  సబ్‌‌‌‌ కలెక్టర్‌‌‌‌ కు గానీ   డిసెంబర్​1 సాయంత్రం వరకు అప్పీల్ చేసుకునే అవకాశం కల్పించారు. 

డిసెంబర్​ 3న  మధ్యాహ్నం3 గంటల వరకు నామినేషన్ల ఉపసంహరణకు గడువు ఉంది. అదేరోజు మధ్యాహ్యం 3 గంటల తర్వాత బరిలో ఉన్న అభ్యర్థుల తుది జాబితాను ఎన్నికల అధికారులు గ్రామాలవారీగా ప్రకటిస్తారు. కాగా, రెండో విడుతలో ఉమ్మడి ఖమ్మం జిల్లా వ్యాప్తంగా 339 గ్రామ పంచాయతీల్లో ఎన్నికలు జరుగనున్నాయి. 

ఖమ్మం జిల్లాలోని 183 పంచాయతీలు, 1,686 వార్డులు, భద్రాద్రికొత్తగూడెం జిల్లాలో 156 పంచాయతీలు , 1,382వార్డుల్లో జరుగనున్న ఎన్నికలకు సంబంధించి అధికారులు ఏర్పాట్లు పూర్తి చేశారు. నామినేషన్ల స్వీకరణ టైంలో అభ్యర్థులకు అవసరమైన సాయం అందించేందుకు హెల్ప్ డెస్కులను ఏర్పాటు చేశారు. కాగా, ఉమ్మడి ఖమ్మం జిల్లా వ్యాప్తంగా రెండో విడత ఎన్నికలపై పొలిటికల్​ పార్టీలు స్పెషల్​ఫోకస్​ పెట్టాయి. మొదటి విడత అభ్యర్థుల ఎంపిక కొంత హడావుడిగా సాగింది. ఈ క్రమంలో రెండో విడతపై పార్టీల ముఖ్యులు గెలిచే అభ్యర్థులనే ఎంపిక చేసే పనిలో నిమగ్నమయ్యారు.

పలు గ్రామాలు ఏకగ్రీవం.. 

​మధిర, వెలుగు : మధిర నియోజకవర్గంలో వచ్చే నెల 11వ తేదీన జరగనున్న గ్రామ పంచాయతీ ఎన్నికల నామినేషన్ల ప్రక్రియ శనివారంతో ముగిసింది. మధిర మండలం సిద్ధినేనిగూడెం గ్రామపంచాయతీ సర్పంచ్ గా వేల్పుల వెంకటరావమ్మ ఏకగ్రీవం కాగా ​బోనకల్ మండలంలోని కలకోట గ్రామపంచాయతీ సర్పంచ్ గా పైడిపల్లి అనిత ఏకగ్రీవం అయ్యాయి.  సిద్దినేనిగూడెం సర్పంచ్ గా కాంగ్రెస్ పార్టీ అభ్యర్థి గా వేల్పుల వెంకట్ రావమ్మ ఒక్కరే నామినేషన్ దాఖలు చేయడంతో ఆమె ఏకగ్రీవం అయినట్లయింది. ఏకగ్రీవ అభ్యర్థుల అధికారిక ప్రకటన ఈనెల 3l నామినేషన్ల పరిశీలన అనంతరం ఎన్నికల అధికారుల ద్వారా వెలువడే అవకాశం ఉంది.

ఖమ్మం టౌన్ : ఖమ్మం నియోజకవర్గం రఘునాథ పాలెం మండలంలోని 500 ల పైచిలుకు ఓటర్లు కలిగిన రాములు తండా గ్రామ పంచాయతీ ఓటర్లు నామినేషన్ లు చివరి రోజు కావడంతో ఏకగ్రీవం చేసుకున్నారు. కాంగ్రెస్ పార్టీ సర్పంచ్ అభ్యర్థిగా బానోతు వెంకట్రావ్ ను ఎన్నుకున్నారు. 

కామేపల్లి : మండలంలోని పాత లింగాల గ్రామ పంచాయతీ సర్పంచ్ గా ఆ గ్రామానికి చెందిన కిన్నెర సుజాతను ఏకగ్రీవంగా ఎన్నుకోవాలని ఆ గ్రామ ప్రజలు తీర్మానించారు. రెండో విడత కామేపల్లి మండలంలో సర్పంచ్ ఎన్నికలు జరగనున్నాయి. ఆదివారం నుంచి నామినేషన్ ప్రక్రియ ప్రారంభమవుతుంది. ఒకరోజు ముందుగానే  ఈ గ్రామానికి చెందిన  రాష్ట్ర అగ్రికల్చర్ కమిషన్ డైరెక్టర్ రామ్ రెడ్డి గోపాల్ రెడ్డి ఆధ్వర్యంలో గ్రామ ప్రజలందరూ సమావేశమై సమష్టిగా నిర్ణయం తీసుకున్నారు. కాగా, ఈ గ్రామంలో ఇప్పుడు వరకు ఆరుసార్లు సర్పంచ్‌‌‌‌లు ఏకగ్రీవంగా ఎన్నికయ్యారు. 

చింతకాని  : చింతకాని మండల పరిధిలోని రేపల్లెవాడ  గ్రామపంచాయతీ  సర్పంచ్ పదవి ఏకగ్రీవం ఖరారైంది. నామినేషన్లు ఒకరు మాత్రమే వేశారు. ఖమ్మం మార్కెట్ కమిటీ మాజీ వైస్ చైర్మన్ , జిల్లా సీనియర్ కాంగ్రెస్ నాయకులు మడుపల్లి భాస్కర్ గౌడ్ కుమారుడు మడిపల్లి రాంప్రసాద్ సతీమణి మడిపల్లి అంబికను రేపల్లెవాడ గ్రామ సర్పంచిగా ఎన్నుకున్నారు. 
వైరా : వైరా మండలం పరిధిలోని పుణ్యపురం గ్రామ పంచాయతీ సర్పంచ్ గా 8 మంది వార్డు సభ్యులను ఏకగ్రీవం చేసినందుకు ఎమ్మెల్యే క్యాంపు కార్యాలయంలో మర్యాదపూర్వకంగా కలిశారు.