వివరాలు వెల్లడించిన నాగర్కర్నూల్ డీఎస్పీ శ్రీనివాస్
కోడేరు, వెలుగు: హత్యకేసులో పోలీసులు ఆరుగురు నిందితులను అరెస్ట్ చేశారు. శుక్రవారం సాయంత్రం పెద్దకొత్తపల్లి పీఎస్లో నాగర్కర్నూల్ డీఎస్పీ శ్రీనివాస్ ప్రెస్మీట్ ఏర్పాటు చేసి వివరాలు వెల్లడించారు. కోడేర్ మండలం మైలారం గ్రామానికి చెందిన అనుముల రంగస్వామి (45)కు అచ్చంపేటకు చెందిన ఏదుల పులేందర్గౌడ్కు నాలుగు నెలల కింద పరిచయం ఏర్పడింది. రంగస్వామి తనకు తెలిసిన స్వామీజీ గుప్త నిధులు వెలికి తీస్తాడని నమ్మించి, ఈ విషయాలు మాట్లాడుకునేందుకు ఒక ఫోన్ ఇచ్చాడు.
ఆయన మాటలు నమ్మిన పులేందర్ రూ. 5లక్షలు స్వామీజీకి ఇవ్వాలని అందజేశాడు. ఆ తర్వాత రంగస్వామి మరో రూ.5 లక్షలు ఇవ్వాలని, ఇవ్వకపోతే స్వామీజీ కన్నెర్ర చేస్తే చస్తావంటూ బెదిరింపులకు పాల్పడ్డాడు. దీంతో రంగస్వామిని చంపాలని డిసైడ్ అయిన పులేందర్ సన్నిహితులైన రమేశ్, శివ, కర్నాటి సుధాకర్, జక్కుల తిరుపతయ్య, పాలుస భాస్కర్ గౌడ్, సలేశ్వర్ గౌడ్తో కలిసి పథకం పన్నాడు. గత నెల 29న డబ్బులు ఇస్తానని నమ్మించి మహబూబ్నగర్ తీసుకెళ్లారు. అక్కడ సలేశ్వర్గౌడ్ ఇంట్లో చికెన్లో అల్ఫ్రాజోలం కలిపి ఇవ్వడంతో రంగస్వామి స్పృహ కోల్పోయాడు. అక్కడి నుంచి మైలారంలోని భాస్కర్గౌడ్ మామిడితోటకు తీసుకెళ్లి దాడి చేసి గుంతలో పూడ్చేశారు.
అనంతరం మద్యం తాగి వెళ్లిపోయారు. రంగస్వామి కనిపించకపోవడంతో అతడి భార్య అరుణ కోడేర్ పీఎస్లో ఫిర్యాదు చేసింది. పులేందర్గౌడ్పై అనుమానం వ్యక్తం చేయడంతో పోలీసులు అతడి కాల్డాటా ఆధారంగా అదుపులోకి తీసుకుని విచారించారు. దీంతో హత్య చేసినట్లుగా అంగీకరించడంతో మొత్తం ఆరుగురు నిందితులను అదుపులోకి తీసుకోగా రమేశ్అనే వ్యక్తి పరారీలో ఉన్నాడని డీఎస్పీ తెలిపారు. నిందితుల నుంచి ఆరు మొబైల్స్, తుఫాన్ వాహనం, శవాన్నిపూడ్చడానికి వినియోగించిన గడ్డపారలు స్వాధీనం చేసుకున్నామని, నిందితులను కోర్టులో హాజరు పరుస్తామని ఆయన వివరించారు. ప్రెస్మీట్లో కోడేరు ఎస్సై డి.జగదీశ్వర్, పెద్దకొత్తపల్లి ఎస్సై వి.సతీశ్ తదితరులున్నారు.
