తెలుగు, తమిళ, మలయాళ భాషల్లో వరుస సినిమాలతో బిజీగా ఉన్న నయనతార.. ఇప్పుడు మరో క్రేజీ ప్రాజెక్ట్‌‌తో ప్రేక్షకుల ముందుకు రాబోతోంది. రజినీకాంత్ హీరోగా, అశ్వత్ మారిముత్తు దర్శకత్వంలో తెరకెక్కుతోన్న ‘ధర్మన్’ చిత్రంలో ఆమె కీలక పాత్ర పోషిస్తున్నట్టు మేకర్స్ ప్రకటించారు.
ఈ సందర్భంగా విడుదల చేసిన పోస్టర్‌‌‌‌లో రజినీకాంత్, నయనతార ఓ కిటికీ ముందు ఎదురెదురుగా నిలబడి షాడో లుక్‌‌లో కనిపిస్తున్నారు. వీరిద్దరూ కలిసి నటించడం ఇది ఐదోసారి. గతంలో చంద్రముఖి, కథానాయకుడు, దర్బార్, పెద్దన్న సినిమాల్లో కలిసి నటించారు. ఇప్పుడు ‘ధర్మన్’తో మరోసారి ప్రేక్షకుల ముందుకు రానుండటంతో ఈ క్రేజీ పెయిర్‌‌‌‌పై అభిమానుల్లో ఆసక్తి నెలకొంది.
రజినీకాంత్ కెరీర్‌‌లో 173వ చిత్రంగా తెరకెక్కుతోన్న ఈ చిత్రంలో ఆయన డెడ్లీ డాక్టర్‌‌‌‌గా కనిపించనున్నారు. ఇప్పటికే విడుదల చేసిన ఆయన లుక్ సినిమాపై అంచనాలు పెంచుతోంది. ఇందులో సిమ్రాన్, రాశీఖన్నా, శ్రీలీల, రామ్ పోతినేని ముఖ్య పాత్రలు పోషిస్తున్నారు. కమల్ హాసన్, ఆర్. మహేంద్రన్ ఈ చిత్రాన్ని నిర్మిస్తున్నారు. అనిరుధ్ సంగీతం అందిస్తున్నాడు.
