- నిర్మల్, ముథోల్ నేతలతో సయోధ్య సవాల్
- చాలెంజ్గా మారనున్న సీనియర్లతో సమన్వయం
- ప్రతిష్టాత్మకంగా పంచాయతీ ఎన్నికలు
నిర్మల్, వెలుగు: అనూహ్యంగా నిర్మల్ జిల్లా కాంగ్రెస్ పార్టీ అధ్యక్ష పదవిని చేపట్టిన ఖానాపూర్ ఎమ్మెల్యే వెడ్మ బొజ్జుకు లోకల్ బాడీస్ ఎలక్షన్స్ సవాల్ కానున్నాయి. డీసీసీ అధ్యక్ష పదవి కోసం దరఖాస్తులు చేసుకున్న ఆ పార్టీ సీనియర్లను పక్కన పెట్టిన అధిష్టానం జిల్లాలో పార్టీతరఫున గెలిచిన ఏకైక ఎమ్మెల్యే బొజ్జు పటేల్కు ఆ పదవిని కట్టబెట్టింది. ఈ పదవిపై ఎన్నో ఆశలు పెట్టుకున్న నాయకులను పక్కనపెట్టి అధిష్టానం బొజ్జుకు ఆ పదవి ఇవ్వడం వెనుక బలమైన కారణాలు ఉన్నట్లు తెలుస్తోంది.
స్థానిక ఎన్నికల్లో పార్టీ బలపరిచిన నేతలు విజయం సాధించేందుకు బొజ్జు పటేలే సరైన ఎంపిక అని అధిష్టానం భావించిందని పార్టీ నేతలు పేర్కొంటున్నారు. అయితే ఖానాపూర్ నియోజకవర్గం నుంచి విజయం సాధించిన ఆయన మొదటి నుంచీ తన నియోజకవర్గానికే పరిమితమవుతూ వస్తున్నారు. అక్కడి అధికారిక, పార్టీ పరమైన కార్యక్రమాల్లో చురుగ్గా పాల్గొంటూ జనంలో ఉంటున్నారు. కానీ పార్టీ తరఫున నిర్మల్, ముథోల్ నియోజకవర్గాల్లో ఆశించిన మేర పర్యటనలు చేయలేదు. ఈ నేపథ్యంలోనే జిల్లా నేతలను సమన్వయం చేసుకుంటూ పార్టీ బలపరిచిన నేతలు విజయం సాధించేలా బొజ్జు ఏ మేర కృషి చేస్తారా అనేది ఆసక్తికరంగా మారింది.
బాధ్యతలను నిర్వర్తించాల్సిన అవసరం
గ్రామ పంచాయతీ ఎన్నికలు బొజ్జు పటేల్కు ప్రతిష్టాత్మకం కానున్నాయి. ఈ ఎన్నికలు పార్టీలకతీతంగా జరగనున్నప్పటికీ.. పరోక్షంగా మాత్రం అన్ని పార్టీలు తమ మద్దతుదారులను రంగంలోకి దింపుతుండడం బహిరంగ రహస్యం. ఈ నేపథ్యంలో మూడు నియోజకవర్గాల నేతలను సమన్వయం చేసుకుంటూ అన్ని గ్రామ పంచాయతీల్లో బలమైన అభ్యర్థులను బరిలోకి దింపాల్సిన అవసరం ఉంటుంది. మెజార్టీ గ్రామపంచాయతీలను గెలిపించుకొని తన పట్టును నిలుపుకోవాల్సిన అవసరం బొజ్జుకు ఎంతైనా ఉంది.
సవాల్గా మారనున్న అసంతృప్తి నేతలతో సమన్వయం
ఖానాపూర్ నియోజకవర్గ నేతలపై పట్టున్న బొజ్జుకు.. స్థానిక ఎన్నికల నేపథ్యంలో నిర్మల్, ముథోల్ నియోజకవర్గంలోని సీనియర్ నేతలతో సమన్వయం తప్పనిసరి కానుంది. ముఖ్యంగా మాజీ మంత్రి అల్లోల ఇంద్రకరణ్ రెడ్డి, మొన్నటివరకు డీసీసీ ప్రెసిడెంట్ గా ఉన్న శ్రీహరి రావు, గ్రంథాలయ సంస్థ చైర్మన్ అర్జుమంద్, మాజీ జడ్పీటీసీ పత్తిరెడ్డి రాజేశ్వర్ రెడ్డి, పీసీసీ కార్యదర్శి వెంబడి రాజేశ్వర్, తదితరులతో వెడుమ బొజ్జు జిల్లా అధ్యక్షుని హోదాలో కలిసి పనిచేయాల్సి ఉంటుంది.
అయితే నిర్మల్ లో ఇంద్రకరణ్ రెడ్డి, శ్రీహరిరావులు ఎడమొహం పెడమొహంగా ఉంటున్నారు. వీరందరినీ కలుపుకొని ముందుకు సాగడం బొజ్జుకు చాలెంజింగ్ మారనుంది. ఇక ముథోల్ నియోజకవర్గంలోని సీనియర్ నేత, మాజీ ఎమ్మెల్యే నారాయణరావు పటేల్, మార్కెట్ కమిటీ చైర్మన్ ఆనంద్రావు పటేల్ తో కూడా వెడుమ బొజ్జు సంబంధాలు కొనసాగించాల్సిన అవసరం ఏర్పడనుంది. అయితే వీరిద్దరు కూడా డీసీసీ పదవిని ఆశించినవారే.
తమకు పదవిని ఇవ్వకుండా అధిష్టానం సిట్టింగ్ ఎమ్మెల్యేకు ఇవ్వడం పట్ల వీరు కొంత అసంతృప్తితో ఉన్నట్లు ప్రచారం జరుగుతోంది. ఈ నేపథ్యంలో బొజ్జు సీనియర్లందరినీ ఏకతాటిపైకి తీసుకొచ్చి పార్టీని ముందుకు తీసుకెళ్లాల్సిన అవసరం ఉంది.
