దిత్వా తుఫాన్ శ్రీలంకపై కోలుకోలేని దెబ్బకొట్టింది. తుఫాన్ ధాటికి శ్రీలంక లో చాలా ప్రాంతాలు దారుణంగా దెబ్బతిన్నాయి. ఇండ్లు, రోడ్లు, బ్రిడ్జీలు పూర్తిగా నేలమట్టమయ్యాయి. తుఫాన్ ధాటికి లంకలో 123 మంది చనిపోవడం తీవ్ర ఆందోళన కలిగించే విషయం. అతేకాకుండా భారీ వర్షాలు, వరదలకు ఇప్పటి వరకు 130 మంది మిస్సైనట్లు శ్రీలంక డిజాస్టర్ మేనేజ్మెంట్ టీమ్ ప్రకటించింది.
శ్రీలంకలో ప్రళయ తాండవం చేసిన దిత్వా ధాటికి 12 లక్షల 88 వేల కుటుంబాలలో 3 లక్షల 73 వేల మంది ప్రభావితం అయ్యారు. మొత్తం 13 వేల 690 మంది కుటుంబాలు.. అందులో 43 వేల 925 మందిని సురక్షిత ప్రాంతాలకు తరలించారు. మొత్తం 488 పునరావాస కేంద్రాలను ఏర్పాటు చేశారు అధికారులు.
అత్యధికంగా దెబ్బతిన్న జిల్లాల్లో కండై జిల్లాలో 51 మంది చనిపోయారు. 67 మంది కనిపించకుండా పోయారు. బదుల్లా జిల్లాలో 35 మంది చనిపోగా 27 మంది మిస్సైనట్లు తెలిపారు. సహాయక చర్యలు కొనసాగుతున్నట్లు తెలిపారు.
శ్రీలంకలో భారీ విధ్వంసాన్ని సృష్టించిన దిత్వా తుఫాన్ తమిళనాడు, ఆంధ్రప్రదేశ్ తీరప్రాంతాలవైపు దూసుకొస్తోంది. గంటకు 8 కి.మీ. వేగంతో వస్తున్న దిత్వా.. ప్రస్తుతం పుదుచ్చేరికి 300 కిమీ., చెన్నైకి దక్షిణాన 400 కి.మీ. దూరంలో ఉంది. ఆదివారం (నవంబర్ 30) ఉదయం ఉత్తర తమిళనాడును తాకనున్నట్లు వాతావరణ కేంద్రం తెలిపింది.
నవంబర్ 27వ తేదీన గంటకు 6 కిమీ వేగంతో కదిలిన దిత్వా.. ప్రస్తుతం వేగం పెంచి గంటకు 8 కి.మీ స్పీడ్ తో తమిళనాడు దిశగా కదులుతోంది. తమిళనాడు దక్షిణ ప్రాంతంలో భారీ వర్షాలు కురిసే చాన్స్ ఉందని వాతావరణ కేంద్రం రెడ్ అలర్ట్ జారీ చేసింది. దీంతో ఎమర్జెన్సీ టీమ్స్ ముందస్తు చర్యలు చేపట్టాయి.
ప్రభావిత ప్రాంతాల ప్రజలను పునరావాస కేంద్రాలకు తరలించారు. ముఖ్యంగా కుడలూర్, విల్లుపరం,చెంగల్పట్టు, పుదుచ్చేరి ప్రాంతాలను వర్షాలు ముంచెత్తే అవకాశం ఉందని వాతావరణ కేంద్రం హెచ్చరించింది. దీంతో మొత్తం 12 వేల 7 వందల మందిని పునరావాస కేంద్రాలకు తరలించారు. విల్లుపరంలోని స్కూల్స్, కాలేజీలకు శనివారం (నవంబర్ 29) సెలవు ప్రకటించారు. దిత్వా ప్రభావంతో 54 విమానాలను రద్దు చేసినట్లు చెన్నై ఎయిర్ పోర్ట్ అధికారులు ప్రకటించారు.
