లక్నో: ప్రేమికుల్లో చాలా రకాలు ఉంటారు. కొందరు ప్రేమించిన అమ్మాయి సంతోషం కోసం ఆమెను వదులుకోవడానికి సిద్ధంగా ఉంటారు. ఇంకొందరు ప్రేమించిన యువతి కుటుంబ సభ్యులను ఎదురించడం, గొడవలు, కొట్లాటలు ఇలా ఎంతకైనా తెగిస్తారు. మరికొందరు ప్రేమించిన యువతి దక్కదనే బాధ, కోపంలో దారుణాలకు ఒడిగొడతారు. తాజాగా ఉత్తరప్రదేశ్లోని నోయిడాలో ఇలాంటి ఘటనే ఒకటి జరిగింది. పెళ్లికి నిరాకరించినందుకు ప్రియురాలిని కాల్చి చంపాడు ఆమె ప్రియుడు.
వివరాల ప్రకారం.. అమ్రోహాకు చెందిన సోను (25) నోయిడాలోని ఫేజ్ 2 ప్రాంతంలో ఉన్న ఓ పేయింగ్ గెస్ట్ (పీజీ) వసతి గృహంలో ఉంటుంది. బీహార్‌కు చెందిన 26 ఏళ్ల కృష్ణ కూడా నోయిడాలో ఒక ఫ్యాక్టరీలో పని చేస్తున్నాడు. ఈ క్రమంలో సోను, కృష్ణకు మధ్య పరిచయం ఏర్పడింది. కొన్నాళ్లకు పరిచయం కాస్తా ప్రేమగా మారింది. దీంతో ప్రేయసి సోనును పెళ్లి చేసుకుని కొత్త జీవితం ప్రారంభించాలని కృష్ణ అనుకున్నాడు.
ఇదే విషయాన్ని ప్రియురాలు సోనుకు చెప్పాడు. పెళ్లి చేసుకుని ఒకటైదామని కోరాడు. కానీ సోను పెళ్లికి నిరాకరించింది. దీంతో తీవ్ర ఆగ్రహానికి గురైన కృష్ణ ప్రియురాలు సోను ఉంటున్న హాస్టల్కు వెళ్లి ఆమెకు సర్దిచెప్పే ప్రయత్నం చేశాడు. కానీ సోను పెళ్లికి ససేమిరా అనడంతో పట్టరాని కోపానికి గురై వెంట తీసుకెళ్లిన తుపాకీతో ప్రియురాలిని కాల్చి చంపాడు. అనంతరం అక్కడి నుంచి పారిపోయాడు.
హాస్టల్ సిబ్బంది సమాచరం మేరకు ఘటన స్థలానికి చేరుకున్న పోలీసులు.. సోను మృతదేహాన్ని స్వాధీనం చేసుకుని కేసు నమోదు చేసి దర్యాప్తు చేపట్టారు. పరారీలో ఉన్న కృష్ణను పట్టుకోవడానికి నాలుగు ప్రత్యేక బృందాలు ఏర్పాటు చేశారు. పెళ్లి విషయంలో ఇద్దరి మధ్య వివాదం కారణంగా కృష్ణ ఆమెపై కాల్పులు జరిపినట్లు ప్రాథమిక విచారణలో తేలిందని డిప్యూటీ కమిషనర్ ఆఫ్ పోలీస్ (సెంట్రల్ నోయిడా) శక్తి మోహన్ అవస్థి వెల్లడించారు.
