ITR గడువు ముగిసింది

ITR గడువు ముగిసింది

న్యూఢిల్లీ:  ఆదాయపు పన్ను శాఖకు ఆదివారం నాటికి  దాదాపు 5.83 కోట్ల పన్ను రిటర్న్‌‌లు వచ్చాయని సంబంధిత ఆఫీసర్లు సోమవారం తెలిపారు. ఈ నెంబర్‌‌ పోయిన ఆర్థిక సంవత్సరం (2020–-21) మాదిరిగానే ఉన్నాయి.  2022 మార్చి 31తో ముగిసే ఆర్థిక సంవత్సరానికి తమ ఖాతాలను ఆడిట్ చేయనవసరం లేని వాళ్లు, ఇండివిడ్యువల్​ కేటగిరీ పన్ను చెల్లింపుదారులు ఆదాయపు పన్ను రిటర్న్‌‌లను (ఐటీఆర్​లు) దాఖలు చేయడానికి గడువు తేదీ జులై 31 (ఆదివారం)తో ముగిసింది. చివరిరోజు నాటికి దాదాపు 5.83 కోట్ల రిటర్న్‌‌లు వచ్చాయని, కచ్చితమైన లెక్కలను చెప్పేందుకు డేటాను సరిదిద్దుతున్నామని సీనియర్ ఆఫీసర్​ ఒకరు తెలిపారు.

ఐటీఆర్​ దాఖలుకు గడువు తేదీ
కరోనా ఎఫెక్ట్ వల్ల పోయిన ఆర్థిక సంవత్సరంలో ఐటీఆర్​ దాఖలుకు గడువు తేదీని డిసెంబర్ 31, 2021 వరకు పొడిగించారు. అప్పుడు 5.89 కోట్ల ఐటీఆర్​లు వచ్చాయి. ఈసారి చివరి రోజు (ఆదివారం) 72 లక్షలకు పైగా ఐటీఆర్‌‌లు అందాయి. తాజా రూల్స్​ ప్రకారం, 2022–-23 అసెస్‌‌మెంట్ సంవత్సరంలో ఆలస్యంగా.. అంటే డిసెంబర్ 31లోపు తమ ఐటీఆర్​ను ఫైల్ చేసిన వారు (రూ. 5 లక్షల కంటే ఎక్కువ వార్షిక ఆదాయం ఉన్నవారు) రూ. 5,000 లేట్​ ఫీజు చెల్లించాలి. ఏడాది ఆదాయం రూ. 5 లక్షల కంటే తక్కువ ఉన్న వ్యక్తులు లేటుగా ఐటీఆర్​ వేస్తే రూ.వెయ్యి ఫైన్​గా చెల్లించాల్సి ఉంటుంది. పన్ను బాకీ ఉన్నవారు ఆలస్యంగా దాఖలు చేసినందుకు నెలకు అదనంగా 1 శాతం వడ్డీని చెల్లించాలని ఐటీశాఖ వర్గాలు తెలిపాయి.