అప్పటివరకు అన్నీ తానై కుటుంబాన్ని నడిపించిన తండ్రి చనిపోయాడు. కానీ, ఆ బాధలోనే ఉండిపోవాలనుకోలేదు కూతురు. తమలాంటి కష్టం మరొకరికి వద్దనుకుంది. దానికోసం తన తండ్రికి ఇష్టమైన ఫుడ్నే బిజినెస్గా మార్చుకుంది. తండ్రి పేరుతో బేకరీ పెట్టి సక్సెస్ఫుల్గా నడిపిస్తోంది. దాని ద్వారా వచ్చే
లాభాల్ని కూడా ట్రీట్మెంట్కి డబ్బులేక ఇబ్బంది పడుతున్న పేదవాళ్ల కోసం ఖర్చు చేస్తోంది. అలా ఇప్పటివరకు ఎంతోమంది ప్రాణాలు కాపాడింది 23 యేండ్ల
స్వాతి అరుణ్. ఆమె ఇన్స్పిరేషనల్ జర్నీ ఇది. ఏ కూతురికైనా నాన్నను మించిన సూపర్ హీరో ఉండడు. అయితే నా విషయంలో నాన్న నా హీరో మాత్రమే కాదు... ఎమోషనల్ అండ్ మోరల్ సపోర్ట్ కూడా. అన్నింటికన్నా ముఖ్యంగా నా బెస్ట్ ఫ్రెండ్ అంటుంది స్వాతి. ఆయన ఉన్నాడన్న ధైర్యమే నన్ను ఎప్పుడూ ముందడుగు వేయిస్తుంది. అలాంటి నాన్న సడెన్గా చనిపోవడం నన్ను చీకట్లోకి నెట్టేసింది. బతకాలన్న ఆశని పట్టుకెళ్లింది. కానీ, అక్కడితో నా జీవితం ఆగిపోతే నాన్న సంతోషంగా ఉండరు కదా!. అందుకే జీవితంతో పోరాడాలనుకున్నా.. నాన్న జ్ఞాపకాలతోనే కొత్త జీవితం మొదలుపెట్టాలనుకున్నా. అలా వచ్చిందే ఈ బేకరీ ఐడియా అంటూ తన కథంతా చెప్పుకొచ్చింది స్వాతి.
అన్నీ ఫెయిలే
‘‘నేను పుట్టి, పెరిగిందంతా ఢిల్లీలోనే. అమ్మ చేతి కమ్మటి వంట.. నా కుకింగ్పై నాన్న వేసే సెటైర్లు.. చెల్లితో గిల్లికజ్జాలు ఇదే నా ప్రపంచం. వీకెండ్స్ వస్తే చాలు.. ఫ్యామిలీ అంతా ఏదో ఒక పిక్నిక్ స్పాట్కి చేరుకునేవాళ్లం. అందరం కలిసి వంట చేసేవాళ్లం. ఎక్కువగా బనానా వాల్నట్, మార్బుల్ కేక్స్ తయారుచేసేవాళ్లం. అప్పుడప్పుడు కొత్త రకం వంటకాల్ని కూడా ట్రై చేసేదాన్ని నేను. కానీ, అడుగంటి పోయి తినడానికి పనికొచ్చేవి కాదు. లేదంటే ఉడికీ ఉడక్కుండానే స్టవ్ ఆపేసేదాన్ని. కిచెన్ పరిస్థితి అయితే మాటల్లో చెప్పలేను. అవి చూసి నాన్న నన్ను ఏడిపించేవాళ్లు. ‘‘నీ వంట తినిపించి నన్ను హాస్పిటల్ పాలు చేయాలనుకుంటున్నావా? నా పళ్లు విరగొట్టాలనుకుంటున్నావా?’’ అంటుండే వాళ్లు ఎప్పుడూ. ఆ సరదాల మధ్యనే నాన్నకి పారిస్లో ఉద్యోగం వచ్చింది. అప్పట్నించీ సెలవుల్లో మేము ఆయన దగ్గరకి వెళ్లడమో.. లేదా ఆయన ఇండియాకి రావడమో జరిగేది. అలా నాన్న బర్త్ డే కోసం ప్యాండెమిక్కి ముందు చివరిసారి పారిస్ వెళ్లాం.
ఆ బాధని మాటల్లో చెప్పలేను
నాన్న బర్త్డే కోసం అమ్మ, చెల్లి ఏవేవో సర్ప్రైజ్లు ప్లాన్ చేశారు. కానీ, నేను మాత్రం నాన్న కోసం స్పెషల్గా కేక్ తయారుచేయాలనుకున్నా. అది కూడా పర్ఫెక్ట్గా. నాన్నపై నాకున్న ప్రేమనంతా కలిపి చేశా ఆ కేక్.. అందుకే లైఫ్లో ఫస్ట్ టైం బాగా వచ్చింది. నాన్న మనసారా తిన్నారు కూడా. ఆ తర్వాత కొన్నిరోజులకే పరిస్థితులన్నీ మారిపోయాయి. ఒకరోజు ఆఫీసుకి వెళ్తూ దారి మధ్యలోనే కుప్పకూలిపోయారు నాన్న. హాస్పిటల్లో చేర్పిస్తే కార్డియాక్ అరెస్ట్ అన్నారు. సర్జరీ చేసి స్టెంట్ వేశారు. ఆ స్టెంట్ వేసిన నాలుగురోజులకే మళ్లీ కార్డియాక్ అరెస్ట్ అయింది. పదిహేడు రోజులు హాస్పిటల్లో పోరాడి ఓడిపోయారు నాన్న. ఆ బాధ నుంచి బయటపడటానికి తిరిగి ఇండియా రావాలనుకున్నాం. అప్పుడే లాక్డౌన్ అనౌన్స్ చేశారు. దాంతో దేశం కాని దేశంలో నాన్న లేరన్న నిజంతో నెలల పాటు సతమతమయ్యాం. పైగా ప్యాండెమిక్ భయంతో ఇంట్లోంచి కాలు బయటపెట్టలేకపోయాం. బ్రెడ్ కూడా ఇంట్లోనే బేక్ చేసుకుని తినేవాళ్లం. అలా మూడు నెలల స్ట్రగుల్ తర్వాత తిరిగి ఢిల్లీ వచ్చేశాం.
అందుకే పేదవాళ్లకి సాయం చేస్తున్నా
సరిపడా డబ్బు లేకపోవడం వల్ల మా నాన్నకి మంచి ట్రీట్మెంట్ ఇప్పించలేకపోయాం. నాన్నలాంటి వాళ్లు మన చుట్టూరా చాలామంది ఉన్నారు. అలాంటి వాళ్లకి సాయం చేయాలనే బేకరీని నడుపుతున్నా. ప్రస్తుతం 5 లక్షలు ఖర్చు చేసి ఒకరికి స్టెంట్ వేయించాం. మరొకరికి అపాయింట్మెంట్ తీసుకున్నాం. అలాగే పారిస్లో నాన్న ట్రీట్మెంట్ తీసుకున్న హాస్పిటల్లో ఎవరైనా పేషెంట్స్ డబ్బుల్లేక ఇబ్బంది పడుతుంటే.. అక్కడి కార్డియాలజిస్ట్ మమ్మల్ని కాంటాక్ట్ అవుతారు. వాళ్లకి కొంతమేర సాయం చేస్తున్నాం. ఫ్యూచర్లో మరింతమందికి సాయం చేయాలనుకుంటున్నామని చెప్పింది స్వాతి. అంతేకాదు ఈ తల్లీకూతుళ్లు లాక్డౌన్లో చాలా మంది పేదవాళ్లకి నిత్యావసర సరుకులు పంచారు.
యూట్యూబ్ చూసి.. బేకింగ్
నాన్న లేరన్న బాధ నుంచి నాతో పాటు నా కుటుంబాన్ని కూడా బయటపడేయాలను కున్నా. ఆ ప్రయత్నంలో అమ్మతో కలిసి యూట్యూబ్లో కేక్ బేకింగ్ వీడియోలు చూశా. నాన్న ఫుడ్డీ అవడంతో.. ఆయన జ్ఞాపకంగా బేకరీ పెట్టాలని డిసైడ్ అయ్యా. దాని ద్వారా వచ్చే లాభాల్ని ట్రీట్మెంట్కు డబ్బుల్లేక ఇబ్బంది పడుతున్న పేషెంట్స్కి ఇవ్వాలనుకున్నా. అమ్మ కూడా ఓకే చెప్పడంతో.. పదివేల పెట్టుబడితో నాన్న పేరు మీద ‘అరుణ్ బేకరీ’ పెట్టా. కొద్దిరోజుల్లోనే కస్టమర్స్ సంఖ్య పెరుగుతూ పోయింది. మౌత్ పబ్లిసిటీ ద్వారా సిటీలోనే టాప్ బేకరీల్లో మాది ఒకటిగా నిలిచింది. అమ్మా, నేను ఒక పక్క ఉద్యోగాలు చేస్తూనే ఈ బేకరీ నడుపుతున్నాం. రోజూ ఉదయం ఏడింటి నుంచి పదింటి వరకు బేకింగ్తో బిజీగా ఉంటాం. ఆ తర్వాత ఆఫీసుకెళ్లి తిరిగి ఆరింటికి ఇంటికొచ్చేస్తాం. మళ్లీ రాత్రి ఎనిమిది నుంచి పదకొండు వరకు బేకరీలోనే గడుపుతాం. రెండింటీని బ్యాలెన్స్ చేయడం కష్టమే. కానీ, ఇష్టంతో చేస్తున్నాం. కాబట్టి అలిసిపోయిన ఫీలింగ్ రాదు. పైగా మా బేకరీలో ఆర్గానిక్ ఇంగ్రెడియెంట్స్ని మాత్రమే వాడతాం.