మందుగా లేదా వ్యాక్సిన్గా పనిచేసే యాంటీబాడీ
ఏబీ8ను తయారు చేసిన పిట్స్ బర్గ్ వర్సిటీ సైంటిస్టులు
పది వేల కోట్లలో ఒకే ఒక్కటి
మామూలు యాంటీబాడీతో పోలిస్తే పది రెట్లు చిన్న సైజు
టొరంటో: కరోనా అంతు చూసేందుకు సరికొత్త మందొస్తోంది. వేల కోట్లలో ఒకే ఒక్కటిగా ఓ చిన్న యాంటీబాడీ తాను స్పెషల్ అని నిరూపించింది. ఆ మందును అమెరికాలోని పిట్స్బర్గ్ యూనివర్సిటీ సైంటిస్టులు గుర్తించారు. వాళ్లకు అమెరికాలోని యూనివర్సిటీ ఆఫ్ నార్త్ కరోలినా, యూనివర్సిటీ ఆఫ్ టెక్సస్ మెడికల్ బ్రాంచ్, కెనడాలోని యూనివర్సిటీ ఆఫ్ బ్రిటీష్ కొలంబియా, యూనివర్సిటీ ఆఫ్ సాస్కచివాన్ సైంటిస్టులు తోడుగా నిలిచారు. అందులో యూనివర్సిటీ ఆఫ్ బ్రిటీష్ కొలంబియా యూనివర్సిటీలో సైంటిస్ట్, మన దేశానికి చెందిన శ్రీరామ్ సుబ్రమణియం కూడా ఉన్నారు. వాళ్లు కనిపెట్టిన ఆ మందు పేరు ఏబీ8 అనే ఒక యాంటీ బాడీ.
కరోనా ప్రొటీన్ను ఎరగా వేసి
ఈ స్పెషల్ ఏబీ8 యాంటీ బాడీని కనిపెట్టేందుకు కరోనా వైరస్లోని స్పైక్ ప్రొటీన్నే ఎరగా వేశారు సైంటిస్టులు. దాంతోనే మన రక్తంలోని యాంటీబాడీలైన ఇమ్యునోగ్లోబ్యులిన్లలో వేరియబుల్ హెవీ చెయిన్ (వీహెచ్) డొమెయిన్ను గుర్తించారు. పది వేల కుపైగా క్యాండిడేట్లను పరిశీలించి వీహెచ్ పనితీరు బాగుందని తేల్చారు. తర్వాత ఇమ్యునోగ్లోబ్యులిన్ల నుంచి వీహెచ్ డొమెయిన్ను తీసుకున్నారు. దానిని సెపరేట్ చేసిన ఇమ్యునోగ్లోబ్యులిన్ తోకకు తగిలించి ఏబీ8 అనే సరికొత్త ఫుల్సైజ్ యాంటీబాడీకి జీవం పోశారు. మామూలు యాంటీబాడీలతో పోలిస్తే ఈ ఏబీ8 యాంటీబాడీ పది రెట్లు చిన్నగా ఉంటుందట.
స్పీడ్గా మందు పనితీరు
చిన్నగా ఉండడమే ఈ యాంటీబాడీ స్పెషలా? అంటే కానే కాదు. దానికి ఇంకా ఎన్నో ప్రత్యేకతలూ ఉన్నాయి. దీనిని టూ ఇన్ వన్గా వాడుకోవచ్చంటున్నారు సైంటిస్టులు. కరోనా వస్తే మందుగానూ, కరోనా రాకుండా అడ్డుకునేందుకు వ్యాక్సిన్గానూ దీనిని వేసుకోవచ్చని చెబుతున్నారు. అంతేకాదు, చాలా చిన్నగా ఉండే దీని సైజు కూడా మందు వేయడంలో ప్రత్యేకతను చూపిస్తుందట. మామూలుగా వ్యాక్సిన్లను ఇంజెక్షన్ల ద్వారానే ఇస్తుంటారు. కానీ, ఏబీ8ను ఆస్తమా మందులాగా పీల్చుకోవచ్చట. లేదంటే ప్యాచ్తో చర్మం ద్వారానైనా ఎక్కించొచ్చని అంటున్నారు. దాని వల్ల ఇంజెక్షన్ నొప్పి నుంచి తప్పించుకునే అవకాశం దొరకడంతో పాటు.. చాలా వేగంగా మందు యాక్టివిటీ పెరిగే అవకాశం ఉందని హామీ ఇస్తున్నారు. చిన్న సైజు ట్రయల్స్లో ఇది మంచి ఫలితాలనిచ్చిందని సైంటిస్టులు చెబుతున్నారు. పిట్స్బర్గ్ యూనివర్సిటీ సపోర్ట్తో కొత్తగా ఏర్పాటు చేసిన ‘ఎబౌండ్ బయో’ అనే కంపెనీ ప్రపంచవ్యాప్తంగా ఈ ఏబీ8 యాంటీబాడీలను తయారు చేయనుంది.
For More News..
