- తండ్రికి ఆలస్యంగా సమాచారం ఇచ్చిన సిబ్బంది
- స్టాఫ్ తీరు వల్లే చనిపోయాడంటూ కుటుంబసభ్యుల ఆందోళన
- మహబూబ్నగర్ లోని మైనార్టీ గురుకుల స్కూల్ లో ఘటన
పాలమూరు/మద్దూరు, వెలుగు : మహబూబ్నగర్ జిల్లా కేంద్రంలోని మైనార్టీ గురుకుల స్కూల్లో ఓ ఇంటర్ స్టూడెంట్ అనుమానాస్పద స్థితిలో చనిపోయాడు. ఈ సమాచారాన్ని ఆలస్యంగా కుటుంబసభ్యులకు చేరవేయడంతో వారు కాలేజీలో ఫర్నిచర్ ధ్వంసం చేశారు. నారాయణపేట జిల్లా మద్దూరు మండలం భునీడ్గ్రామానికి చెందిన ముదేలి హన్మంత్ రెడ్డి, లక్ష్మి దంపతుల కొడుకు రామ్రెడ్డి (17) మహబూబ్నగర్ న్యూ టౌన్ లోని మైనార్టీ గురుకుల స్కూల్ లో ఇంటర్ సెకండియర్ చదువుతున్నాడు. ఆదివారం రాత్రి స్టూడెంట్లు స్కూల్ పై ఫ్లోర్ లోని డార్మెట్రీ రూమ్ లో పడుకున్నారు. సోమవారం ఉదయం సిబ్బంది క్లాస్రూమ్లోకి వెళ్లి చూడగా రామ్రెడ్డి టవల్ తో ఉరేసుకుని కనిపించాడు. వెంటనే అతడిని కిందకు దింపి మహబూబ్నగర్జనరల్ హాస్పిటల్కు తీసుకెళ్లారు. అప్పటికే అతడు చనిపోయాడని డాక్టర్లు చెప్పారు. దీంతో రామ్రెడ్డి తండ్రికి ఫోన్ చేసిన సిబ్బంది రామ్రెడ్డి ఆరోగ్యం బాగోలేదని చెప్పారు.
కుటుంబంతో కలిసి వెళ్లగా తల్లి ఆరోగ్యం బాగోలేదని బెంగ పెట్టుకొని రామ్ రెడ్డి సూసైడ్ చేసుకున్నట్లు చెప్పారు. దీంతో అతడు తన భార్యకు 25 రోజుల కింద చిన్న ఆపరేషన్ జరిగిందని.. ప్రస్తుతం ఆమె బాగానే ఉందని, తన కొడుకు ఎలా చనిపోయాడో చెప్పాలని నిలదీశాడు. తర్వాత తన కొడుకు మృతికి స్కూల్ సిబ్బందే కారణమని ధర్నాకు దిగారు. స్టూడెంట్యూనియన్ లీడర్లు కూడా ఆందోళన చేశారు. ఈసందర్భంగా కాలేజీలోని ఫర్నిచర్ను ధ్వంసం చేశారు. పోలీసులు వచ్చి నచ్చజెప్పినా వినలేదు. చివరకు కేసు నమోదు చేసి, విచారణ చేస్తామని డీఎస్పీ మహేశ్ గౌడ్ హామీ ఇవ్వగా ధర్నా విరమించారు.
