మధిర, వెలుగు: మధిర ఆర్టీసీ డిపోలో బ్రీతింగ్ మిషన్ తప్పుడు రిపోర్టు చూపిస్తోందని ఓ ఆర్టీసీ డ్రైవర్ డిపో ఎదుట ఆందోళనకు దిగాడు. ఆదివారం బ్రీతింగ్ఎనలైజర్ చెకింగ్లో భాగంగా మధిర ఆర్టీసీ లో 2009 నుంచి డ్రైవర్ గా పని చేస్తున్న సండ్ర నాగేశ్వరరావుకు బ్రీతింగ్ చెక్ చేశారు. ఆయన మద్యం సేవించినట్లు రిపోర్టు వచ్చింది. అతడిని డ్యూటీకి పంపించడం కుదరదని అధికారులు చెప్పారు. దీంతో తనకు మద్యం తాగే అలవాటు లేదని, బ్రీతింగ్ మిషన్ తప్పుడు రిపోర్టు ఇస్తోందని, తాను గవర్నమెంట్ హాస్పిటల్లో చెకప్చేసుకునేందుకు సిద్ధంగా ఉన్నానని నాగేశ్వరరావు బస్ డిపో ముందు ఆందోళనకు దిగాడు.
ఆయనకు కార్మిక సంఘాల నాయకులు అండగా నిలిచారు. రెండు రోజుల కింద ఒక డ్రైవర్ కూ ఇలానే జరిగిందని చెప్పారు. విషయం తెలుసుకొని మధిర ఎస్సై ధర్నా చేస్తున్న ఆర్టీసీ కార్మికుడిని పోలీస్ స్టేషన్కు తరలించే ప్రయత్నం చేయగా కార్మిక సంఘాల నాయకులు అడ్డుకోవడంతో కొంత ఉద్రిక్త పరిస్థితి నెలకొంది.
