న్యూఢిల్లీ: ఢిల్లీ సీఎం అర్వింద్ కేజ్రీవాల్ పర్సనల్ సెక్రటరీపై వేటు పడింది. నియామకం టైంలో రూల్స్ ఉల్లంఘించారనే ఆరోపణలతో కేజ్రీవాల్ ప్రైవేట్ కార్యదర్శి బిభవ్ కుమార్ను విజిలెన్స్ అధికారులు గురువారం తొలగించారు. తాత్కాలిక నియామకాలకు సంబంధించిన కేంద్ర సివిల్ సర్వీస్ రూల్స్ను ఉల్లంఘించి బిభవ్ను నియమించారని విజిలెన్స్ డైరెక్టరేట్ ఉత్తర్వుల్లో పేర్కొంది.
డ్యూటీలో ఉన్న ప్రభుత్వ ఉద్యోగిపై దాడి చేసినందుకు బిభవ్పై 2007లో నోయిడాలో క్రిమినల్ కేసు నమోదైంది. ఈ విషయాన్ని నియామక సమయంలో వెల్లడించలేదనే కారణంతో తొలగిస్తున్నట్లు తెలిపింది. కాగా, ఢిల్లీ లిక్కర్ స్కామ్ కేసులో బిభవ్ను ఈడీ అధికారులు గత సోమవారమే విచారించి, స్టేట్మెంట్ను రికార్డ్ చేశారు. అయితే, బిభవ్ కుమార్ను ఉద్యోగం నుంచి తొలగించడంపై ఆమ్ ఆద్మీ పార్టీ నేతలు మండిపడ్డారు. ఢిల్లీలో ప్రజాస్వామ్యం నిర్వీర్యం అవుతోందని ఆందోళన వ్యక్తం చేశారు.
