కామారెడ్డి, వెలుగు: అసెంబ్లీ ఎన్నికలు దగ్గర పడుతున్న నేపథ్యంలో ప్రధాన పార్టీలు చేరికలపై నజర్ పెట్టాయి. జిల్లాలోని నాలుగు నియోజకవర్గాల్లో బీఆర్ఎస్, బీజేపీ, కాంగ్రెస్లు ప్రత్యర్థి పార్టీల్లో ఉన్న అసంతృప్తులను తమ వైపు తిప్పుకునేందుకు ముమ్మర ప్రయత్నాలు చేస్తున్నాయి. ఒక పార్టీలో ఉన్న లీడర్మరో పార్టీలోకి చేరగానే, ఆ పార్టీ నుంచి ఇంకో లీడర్ను తమవైపు తిప్పుకునేందుకు యత్నిస్తున్నారు. జిల్లాలోని మిగతా నియోజకవర్గాల కంటే కామారెడ్డి నియోజకవర్గంలో చేరికలు ఎక్కువగా జరుగుతున్నాయి. తమ పార్టీలోకి వస్తే మంచి భవిష్యత్ ఉంటుందంటూ భరోసా కల్పిస్తున్నారు. కుల సంఘాల ప్రతినిధులతోనూ ఆయా పార్టీల లీడర్లు టచ్లో ఉంటున్నారు.
కారెక్కిస్తున్నారు..
కామారెడ్డి, ఎల్లారెడ్డి, జుక్కల్ నియోజకవర్గాల్లో ఆయా పార్టీలకు చెందిన లీడర్లు బీఆర్ఎస్లో చేరుతున్నారు. మండల, గ్రామ స్థాయిలో పట్టున్న లీడర్లు, ప్రతిపక్ష పార్టీల్లో కొనసాగుతున్న ప్రజాప్రతినిధులను తమ వైపు ఆకర్షించి గులాబీ కండువాలు కప్పుతున్నారు. కామారెడ్డి నియోజకవర్గంలోని మద్దికుంటకు చెందిన బీజేపీ ఎంపీటీసీ ఇటీవల బీఆర్ఎస్లో చేరారు. బీబీపేట, దోమకొండ, భిక్కనూరు, రాజంపేట మండలాలకు చెందిన పలువురు కాంగ్రెస్ లీడర్లు సైతం బీఆర్ఎస్లో చేరారు. ఎల్లారెడ్డి నియోజకవర్గానికి చెందిన బీజేపీ, కాంగ్రెస్ పార్టీలకు చెందిన కొందరు స్థానిక ఎమ్మెల్యే సమక్షంలో బీఆర్ఎస్ తీర్థం పుచ్చుకున్నారు. బీఆర్ఎస్ లీడర్లు మండల, గ్రామ స్థాయిల్లో పలుకుబడి ఉన్నవారిపై ఫోకస్చేస్తున్నారు.
హస్తం గూటికి రావాలని..
కాంగ్రెస్ పార్టీలోనూ బీఆర్ఎస్, బీజేపీల నుంచి వలసలు కొనసాగుతున్నాయి. క్షేత్రస్థాయిలో ఓటర్లను ప్రభావితం చేయగలిగే వ్యక్తుల కోసం అన్వేషిస్తున్నారు. అనివార్య కారణాల వల్ల పార్టీని వీడినవారిని తిరిగి రప్పించేందుకు ప్రయత్నాలు చేస్తున్నారు. కామారెడ్డి నియోజకవర్గం వ్యాప్తంగా మాజీమంత్రి, కాంగ్రెస్నేత షబ్బీర్అలీ విస్తృతంగా పర్యటిస్తూ, తిరిగి హస్తం గూటికి రావాలని గతంలో కాంగ్రెస్లో కొనసాగిన వారిని కోరుతున్నారు. నియోజకవర్గంలోని పలు గ్రామాలతో పాటు, టౌన్కు చెందిన ఆయా పార్టీల కార్యకర్తలు కాంగ్రెస్లో చేరారు. ఎల్లారెడ్డిలోనూ పలు మండలాలకు చెందిన గ్రామస్థాయి కార్యకర్తలు హస్తం గూటికి చేరారు. టికెట్ఆశిస్తున్న మదన్మోహన్రావు, వడ్డేపల్లి సుభాష్రెడ్డి పోటాపోటీగా ఇతర పార్టీల కార్యకర్తల్ని కాంగ్రెస్లోకి రప్పిస్తున్నారు.
యూత్పై బీజేపీ ఫోకస్..
బీజేపీ కూడా చేరికలపై ఫోకస్ పెట్టింది. ప్రధానంగా యూత్పై దృష్టి సారించింది. కామారెడ్డి నియోజక వర్గంలోని ఆయా మండలాలతో పాటు, టౌన్కు చెందిన పలువురు బీజేపీలో చేరారు. నియోజకవర్గ ఇన్చార్జి కాటిపల్లి వెంకటరమణారెడ్డి సమక్షంలో యువకులతో పాటు, మహిళలు కూడా బీజేపీలో చేరారు. పార్టీ జిల్లా ప్రెసిడెంట్ అరుణతార, జుక్కల్ టికెట్ను ఆశిస్తూ.. అక్కడ ముమ్మర ప్రయత్నాలు చేస్తున్నారు. ఇటీవల జుక్కల్, మద్నూర్, బిచ్కుంద మండలాలకు చెందిన పలువరు యువకులు బీజీపీలో చేరారు. ఆయా చోట్ల బీఆర్ఎస్, కాంగ్రెస్లో ఉన్న అసంతృప్తులు ఆమెతో టచ్లో ఉంటున్నారు.
