కోరుట్ల, వెలుగు: కోరుట్ల పట్టణంలోని ఆర్టీసీ డిపోకు చెందిన స్థలాన్ని కబ్జా చేసేందుకు శుక్రవారం కొంత మంది వ్యక్తులు ప్రయత్నించారు. దీంతో ఆర్టీసీ అధికారులు పోలీసులకు ఫిర్యాదు చేయగా.. ఆరుగురిపై కేసు నమోదైంది. ఎస్ఐ చిరంజీవి, ఆర్టీసీ అధికారుల వివరాల ప్రకారం.. కోరుట్ల పట్టణంలోని కొత్త బస్టాండ్ సమీపంలోని ఆర్టీసీ డిపోకు అనుకొని ఆర్టీసీకి దాదాపు 1.18 ఎకరాల ఖాళీ స్థలం ఉంది. దీనిపై కన్నేసిన కొందరు అక్రమార్కులు, ఈ స్థలం తమదంటూ చదును చేసి గోడ నిర్మాణం చేపట్టారు.
గమనించిన ఆర్టీసీ అధికారులు అక్కడికి చేరుకుని వారిని అడ్డుకున్నారు. ఇరువర్గాల మధ్య వాగ్వాదం జరగడంతో ఆర్టీసీ సిబ్బంది, పోలీసులు, రెవెన్యూ, మున్సిపల్ అధికారులకు సమాచారమిచ్చారు. సర్వేయర్ కుమారస్వామి, ఆర్ఐ రాజేందర్ అక్కడికి చేరుకుని ఎంక్వైరీ చేసి, ఆ స్థలం ఆర్టీసీదిగా తేల్చారు. డీఎం మనోహర్ ఫిర్యాదు మేరకు కోరుట్ల అంబేద్కర్‌‌‌‌‌‌‌‌నగర్‌‌‌‌‌‌‌‌కు చెందిన పసుల చిన్ననర్సయ్య, వనిత, నాగరాజు, మాగోని మహేందర్, ఆకుల ఆనంద్, పాముల వెంకటరమణపై కేసు నమోదు చేసినట్లు ఎస్ఐ చిరంజీవి తెలిపారు.
