- 10 నిమిషాల్లోనే రిపబ్లిక్ డే వేడుకలు ముగింపు
- ఆఫీసర్ల తీరుపై ఉద్యోగుల్లో తీవ్ర అసంతృప్తి
నల్గొండ, వెలుగు: రిపబ్లిక్డే వేడుకల్లో భాగంగా వివిధ ప్రభుత్వ శాఖల్లో పనిచేస్తున్న ఉద్యోగులు, అధికారుల సేవలకు గుర్తింపుగా ఇచ్చే అవార్డులను నల్గొండ జిల్లాలో రద్దు చేశారు. ఇందుకు ఉన్నతాధికారులు చెప్పిన కారణం వింతగా ఉంది. వేడుకలు జరిగిన కలెక్టరేట్లో సరిపడా జాగ లేకపోవడం వల్లే అవార్డుల ఫంక్షన్ రద్దు చేసినట్లు చెప్పడంతో స్టాఫ్అంతా నారాజ్ అయ్యారు.
పరేడ్ గ్రౌండ్లో రద్దు..
ఎప్పట్లాగే రిపబ్లిక్ డే వేడుకలు పరేడ్ గ్రౌండ్లోనే జరుగుతాయనే ఆలోచనతో నల్గొండ జిల్లా ఆఫీసర్లు అన్ని ఏర్పాట్లు చేశారు. బుధవారం రాత్రి వరకు పోలీసులతో ప్రీ పరేడ్ కూడా నిర్వహించారు. కానీ సర్కారు నుంచి ఆదేశాలు రావడంతో రాత్రికి రాత్రే వేదికను పరేడ్ గ్రౌండ్స్నుంచి కలెక్టరేట్కు మార్చారు. కరోనా కారణంతో వేడుకలు వద్దని ప్రభుత్వం చెప్పడంతో గురువారం నల్గొండ కలెక్టరేట్లో రిపబ్లిక్ డే కార్యక్రమాన్ని కేవలం 10 నిమిషాల్లోనే ముగించారు. అంత తక్కువ టైంలో జెండా ఆవిష్కరించిన కలెక్టర్, ముఖ్య ప్రజాప్రతినిధులతో మీటింగ్ హాల్లో కొద్దిసేపు మాట్లాడి సెలబ్రేషన్స్ ముగిశాయని చెప్పి పంపించారు. కానీ ఉద్యోగులకు, అధికారులకు అవార్డులు, లబ్ధిదారులకు ఆస్తుల పంపిణీ ఉంటుందని భావించారు. ఈ మేరకు డిపార్ట్మెంట్ల వారీగా అవార్డుల ఎంపిక లిస్ట్లు కూడా ప్రిపేర్ చేశారు.
జాగా లేకనే ఇయ్యలేదట..
కలెక్టరేట్ భవన్ ముందు ఉన్న ఖాళీ స్థలం జెండా ఎగురవేయడానికి, పోలీసుల నుంచి గౌరవ వందనం స్వీకరించడానికే సరిపోయిందని, అవార్డులు ఇచ్చేందుకు సరిపడా స్థలం లేకపోవడంతో ఫంక్షన్ రద్దు చేశామని ఉన్నతాధికారులు ఆయా శాఖల హెచ్ఓడీలకు సమాచారం ఇచ్చారు. కానీ కొత్త జిల్లాలైన సూర్యాపేట, యాదాద్రిలో అవార్డుల ప్రోగ్రాం జరగడం, రాష్ట్రంలో అతి పెద్ద జిల్లాగా గుర్తింపున్న నల్గొండలో మాత్రం రద్దు చేయడంతో గెజిటెడ్ ఆఫీసర్ల సంఘం, పంచాయతీరాజ్, రెవెన్యూ ఉద్యోగుల సంఘాల నేతలు మండిపడుతున్నారు. ఉన్నతాధికారులు తలుచుకుంటే ఉన్న కొద్ది జాగలోనైనా అవార్డులు ఇచ్చే అవకాశముండేదని, కానీ కావాలనే కార్యక్రమాన్ని రద్దు చేసి దానికో నెపం వెతుక్కున్నారని విమర్శిస్తున్నారు.
