పెద్ద పెద్ద కణతులతో యూపీలో పుట్టిన బాలిక
మూడు తలలతో పుట్టిందీ చిన్నారి. ఉత్తర్ప్రదేశ్లోని ఈటా జిల్లా పిలువా గ్రామానికి చెందిన ఓ మహిళ జులై 11న కాన్పు కోసం స్థానికంగా ఉన్న ఆస్పత్రికి వెళ్లింది. అక్కడ ఆమె మూడు తలలతో చిన్నారికి జన్మనిచ్చింది. అది చూసి షాక్ తిన్న కుటుంబ సభ్యులు, డాక్టర్లు, వెంటనే ఈటా జిల్లా ఆస్పత్రికి ఆ చిన్నారిని తరలించారు. ఇలాంటి ఘటనలు అరుదని డాక్టర్లు చెబుతున్నారు. ఎంఆర్ఐ స్కాన్లు తీసిన తర్వాత ఆ తలల్లాంటి పెద్ద పెద్ద ‘కణతులను’ తొలగిస్తామని జిల్లా ఆస్పత్రి చీఫ్ మెడికల్ సూపరింటెండెంట్ రాజేశ్ ఠాకూర్ చెప్పారు. ప్రపంచంలో ఇలాంటి కేసులు రావడం చాలా తక్కువని, ఎక్కువగా ఆఫ్రికా దేశాల్లో మాత్రమే కనిపిస్తుంటాయని డాక్టర్లు చెబుతున్నారు. ఈ పరిస్థితిని ‘ఎన్సెఫలోసీల్’ అంటారని చెప్పారు.
నరాల వ్యవస్థల్లోని లోపం వల్ల పుర్రె ఎముక సరిగ్గా ఎదగదని, దాని ఫలితంగా ఇలాంటి పెద్ద కణతులను తలకు ఆనుకుని పుట్టుకొస్తాయని చెప్పారు. ఆ భాగాల్లోకీ మెదడు కణజాలం విస్తరిస్తుందని, తలకు సంబంధించిన ఇతర రక్తనాళాలు, నరాలు వాటిలో ఏర్పడతాయని వివరించారు. ఇలాంటి లోపంతో పుట్టే పిల్లలు బతికే చాన్స్ కేవలం 55 శాతం అని చెబుతున్నారు. ఒక వేళ బతికినా జీవితాంతం మానసిక రోగాలతో బాధపడతారని, మెదడు ఎదగదని అంటున్నారు. ఇక, ఈ ఏడాది మార్చి 4న కాశ్మీర్లోనూ అలాంటి లోపంతో ఓ బాబు పుట్టాడు. భారమవుతాడని భావించిన అతడి తండ్రి, బతికుండగానే పూడ్చిపెట్టబోతుండగా పోలీసులు ఆపి ఆస్పత్రికి తరలించారు. షేర్ ఈ కాశ్మీర్ ఇనిస్టిట్యూట్ ఆఫ్ మెడికల్ సైన్సెస్ (స్కిమ్స్)లో ఆ అదనపు తలను వేరు చేశారు. మామూలు మెదడు నుంచి లోపమున్న మెదడునూ తొలగించారు. మూడు గంటల పాటు చేసిన ఆపరేషన్ సక్సెస్ అయింది. తర్వాత ఆ చిన్నారిని అతడి బాబాయి దత్తత తీసుకున్నాడు. మరో ఘటనలో బెంగళూరులోని సప్తగిరి హాస్పిటల్ వైద్యులూ ఐదు నెలల చిన్నారికీ అలాంటి ఆపరేషనే చేశారు.
