ఇస్లామాబాద్: సందు దొరికితే చాలు ఇండియా మీద రెచ్చిపోతారు పాకిస్తాన్ ప్రధాని ఇమ్రాన్ ఖాన్. బాలీవుడ్, హాలీవుడ్ సినిమాల వల్ల పాకిస్తానోళ్లు చెడిపోతున్నరట. దేశంలో సెక్స్ క్రైమ్ పెరగడానికి ఆ సినిమాలే కారణమట. ఈ మధ్య ఇస్లామాబాద్లో కంటెంట్ డెవలపర్లు, యూట్యూబర్లతో మాటామంతి సందర్భంగా ఆయన ఈ మాటలన్నారు. ఇప్పుడు పిల్లలకూ మొబైల్ ఫోన్లుంటున్నాయని, గతంలో ఎన్నడూ లేనంతగా అవసరం లేని కంటెంట్ కూడా దొరుకుతోందని ఆయన అన్నారు. వాటి వల్ల పెద్ద ముప్పు పొంచి ఉందన్నారు. ‘‘పాకిస్తాన్లో లైంగిక నేరాలు పెరగడానికి కారణం హాలీవుడ్, బాలీవుడ్ సినిమాలే కారణం. వాటితో చైల్డ్ పోర్నోగ్రఫీ, పీడోఫీలియా (పిల్లలపై అత్యాచారాలు, లైంగిక వేధింపులు) వంటివి పెరిగిపోతున్నాయి. ఆ నేరాలన్నింటిపై మా ప్రభుత్వం కఠిన చర్యలు తీసుకుంటోంది. వెస్టర్న్ దేశాల్లోని సంస్కృతి వల్ల కలిగే నష్టాలేంటో హాలీవుడ్, బాలీవుడ్ సినిమాలను చూస్తున్న వాళ్లకు తెలియట్లేదు. వాటిని చూడడం వల్ల వెస్టర్న్ సంస్కృతిని ఇక్కడకు తీసుకొస్తునామన్న విషయం కూడా వారు గుర్తించట్లేదు’’ అని అన్నారు. అంతేగాకుండా కుటుంబాల మధ్య గొడవలు రావడానికి, భార్యాభర్తల విడాకులకూ బయటి దేశాల నుంచి వస్తున్న సినిమాలు, కంటెంటే కారణమని ఆరోపించారు. స్కూళ్లలోనే పిల్లలు డ్రగ్స్ వాడుతున్నారని, తాను అధికారంలోకి వచ్చే దాకా ఆ విషయాన్ని గుర్తించలేకపోయానని, వీటన్నింటికీ కారణం బయటి దేశాల కంటెంటేనని అన్నారు.
