- రాజ్యసభ సభ్యులు వద్దిరాజు రవిచంద్ర
భద్రాద్రికొత్తగూడెం, వెలుగు : బీసీలకు 42శాతం రిజర్వేషన్లపై పార్లమెంట్ బీఆర్ఎస్ ఎంపీలు బిల్లు పెడ్తారని బీఆర్ఎస్ ఎన్నికల ఇన్చార్జి, రాజ్యసభ సభ్యుడు వద్ది రాజు రవిచంద్ర పేర్కొన్నారు. దీక్షా దివస్ సందర్భంగా కొత్తగూడెంలోని ప్రగతి మైదానంలో ఉన్న అమరవీరుల స్థూపం వద్ద బీఆర్ఎస్ నేతలు నివాళులర్పించారు.
అనంతరం తెలంగాణ భవన్లోని తెలంగాణ తల్లి విగ్రహానికి పూలమాలలు వేశారు. కేసీఆర్ ఫొటోకు క్షీరాభిషేకం చేశారు. అమరులకు నివాళులర్పిస్తూ మౌనం పాటించారు. ఈ సందర్భంగా ఏర్పాటు చేసిన సభలో వద్దిరాజు మాట్లాడుతూ బీసీ రిజర్వేషన్లపై కాంగ్రెస్ పాలకులు బీసీలను మోసం చేస్తున్నారని విమర్శించారు.
తెలంగాణ రాష్ట్రం కోసం ప్రాణాలను పణంగా పెట్టిన బీఆర్ఎస్అధినేత, మాజీ సీఎం కేసీఆర్పై అసత్య ఆరోపణలు చేస్తూ కాంగ్రెస్ నేతలు పైశాచికానందం పొందుతున్నారన్నారు. బీసీలంతా ఐక్యంగా కాంగ్రెస్, బీజేపీలపై పోరాటాలు చేయాలని పిలుపునిచ్చారు.
ఎన్నికల నోటిఫికేషన్లో పేర్కొన్నట్టుగా 23శాతం కాకుండా అందులో సగం కూడా సర్పంచ్ స్థానాలను కాంగ్రెస్ కేటాయించలేదన్నారు. ఈ ప్రోగ్రాంలో ఉద్యమ నేత, బీఆర్ఎస్ ఉమ్మడి ఖమ్మం జిల్లా మాజీ అధ్యక్షుడు దిండిగాల రాజేందర్, బీఆర్ఎస్ జిల్లా అధ్యక్షుడు రేగా కాంతారావు, మాజీ ఎమ్మెల్యేలు వనమా వెంకటేశ్వరరావు, భానోత్ హరిప్రియ, మెచ్చా నాగేశ్వరరావు, నేతలు కొట్టి వెంకటేశ్వర్లు, రాంప్రసాద్, రాజు గౌడ్, సింధు, కె.సీతాలక్ష్మి, కాపు కృష్ణ, అనుదీప్ పాల్గొన్నారు.
