బుల్లి టీవి
వేలెడంత ఉండే కెమెరాని ఎప్పుడైనా వాడారా? వేలి కంటే చిన్నగా ఉండే టాయ్ సోలార్ కారుని చూశారా? అవును మినియేచర్ వస్తువులే కాదు.. గాడ్జెట్స్ కూడా మార్కెట్లో దొరుకుతున్నాయి. ఇలాంటి గాడ్జెట్స్కి మార్కెట్లో మస్తు క్రేజ్ ఉంది. కొందరు కంఫర్ట్ కోసం కొంటే.. మరికొందరు సరదా కోసం కొంటుంటారు. అలాంటి గాడ్జెట్స్లో కొన్ని ఇవి...
ఆరెంజ్ కెమెరా
చాలా చిన్న కెమెరా ఇది. అయితేనేం దీంతో.. వీడియో రికార్డ్ చేసుకోవచ్చు. ఫొటోలు తీసుకోవచ్చు. ఆపరేట్ చేయడం కూడా చాలా ఈజీ. చూడ్డానికి చాలా అందంగా కీ చైన్లా కనిపిస్తుంది. ఆరెంజ్ కంపెనీ దీన్ని తెచ్చింది. ఇది సెక్యూరిటీ కెమెరాగా, టూర్లకు వెళ్లినప్పుడు ఫొటోలు తీసుకోవడానికి బాగా పనికొస్తుంది. పవర్ ఆఫ్లో ఉన్నప్పుడు కూడా కంప్యూటర్కు కనెక్ట్ చేసుకోవచ్చు. తక్కువ వెలుతురు ఉన్నా హై డెఫినిషన్లో ఫొటోలు తీయగలదు. 32 జీబీ మెమరీ కార్డ్ వేసుకోవచ్చు. ఇందులో హై కెపాసిటీ లిథియం పాలిమర్ బ్యాటరీ ఉంటుంది. ఒక్కసారి ఫుల్ ఛార్జ్ చేయడానికి మూడు గంటల టైం పడుతుంది. తర్వాత మరో మూడు గంటల వరకు వాడుకోవచ్చు. ఈ కెమెరా 60 గ్రాముల బరువు ఉంటుంది. దీన్ని వాడడం ఆపేస్తే.. ఐదు సెకన్లకు ఆటోమెటిక్గా ఆఫ్ అయిపోతుంది.
ధర: 6,690 రూపాయలు
మినీ మైక్రోస్కోప్
చాలా చిన్నగా ఉండేవాటిని చూడ్డానికి మైక్రోస్కోప్ని వాడుతుంటాం. అలాంటి మైక్రోస్కోప్ కూడా చాలా చిన్నగా ఉంటే ఎలా ఉంటుంది? అవును ఈ బుల్లి మైక్రోస్కోప్ కేవలం 30 మిల్లీ మీటర్ల పొడవు మాత్రమే ఉంటుంది. ఎస్.ఎస్.ఈ.ఏ. కంపెనీ తీసుకొచ్చిన ఈ మైక్రోస్కోప్ చీకట్లో కూడా బాగా పనిచేస్తుంది. వస్తువులను స్పష్టంగా చూడొచ్చు. వస్తువులను స్పష్టంగా చూపించేందుకు ఇందులో రెండు ఎల్ఈడీ లైట్లు కూడా ఉన్నాయి. 60X వరకు జూమ్ చేయగలదు. దీని బరువు 25 గ్రాములు మాత్రమే.
ధర: 275 రూపాయలు
వై బెస్ట్ టీవీ
ఎక్కడైనా టీవీ పెద్దగా, రిమోట్ చిన్నగా ఉంటాయి. వై బెస్ట్ కంపెనీ తీసుకొచ్చిన ఈ టీవీ మాత్రం దాని రిమోట్ కంటే తక్కువ పొడవు ఉంటుంది. అలాగని రిమోట్ చాలా పెద్దదిగా ఉందేమో అనుకునేరు. ఈ టీవీ చాలా చిన్నగా ఉంటుంది. సైజులో చిన్నగా ఉన్నా.. ఫీచర్లు మాత్రం పెద్ద టీవీలో ఉన్నట్టే ఉంటాయి. చూడ్డానికి పాత మోడల్ టీవీలా ఉంటుంది. కానీ.. ఇది ఆండ్రాయిడ్ 7.1తో వస్తుంది. వైఫైకి కనెక్ట్ చేసి వాడుకోవచ్చు. దాదాపు అన్ని రకాల స్ట్రీమింగ్ యాప్లను ఇన్స్టాల్ చేసుకోవచ్చు. ఇందులో కొన్ని నాస్టాల్జిక్ గేమ్లు కూడా ఇన్బిల్ట్గా వస్తాయి. యూఎస్బీ బ్లూటూత్ రిసీవర్ కనెక్ట్ చేసి, బ్లూటూత్ డివైజ్లు కూడా వాడుకోవచ్చు. దీనికి 3.5 అంగుళాల ఎల్సీడీ డిస్ప్లే ఉంటుంది. బరువు కేవలం 400 గ్రాములు మాత్రమే.
ధర: 16,837 రూపాయలు
మినీ కారు
సరిగ్గా వేలెడంత పొడవు కూడా ఉండదు ఈ కారు. కానీ.. మీద లైట్ పడితే రయ్.. రయ్.. అని పరుగులు పెడుతుంది. ఇది సోలార్ పవర్తో నడిచే అల్ట్రా-స్మాల్ టాయ్ కారు. దీనికి బ్యాటరీలు అవసరం లేదు. దీని పొడవు32 మిల్లీమీటర్లు, ఎత్తు 22 మిల్లీమీటర్లు మాత్రమే. బరువు ఆరు గ్రాములు. దీన్ని షర్వీ ఎలక్ట్రానిక్స్ వాళ్లు తీసుకొచ్చారు.
ధర: 259 రూపాయలు