ముంబై: ఆమెకు పెండ్లి అయింది. కొన్ని కారణాల వల్ల భర్త నుంచి డైవర్స్ తీసుకుని రెండో వివాహం చేసుకుంది. అది కుల పెద్దలకు నచ్చలేదు. పంచాయితీ పెట్టారు. బాధితురాలి బంధువులను పిలిపించి ఆమె తమ ఉమ్మును నాకాలని తీర్పు చెప్పారు. అంతేకాకుండా రూ.లక్ష జరిమానా చెల్లించాలన్నారు. ఈ ఘటన మహారాష్ట్రలోని అకోలా జిల్లా వాడ్గావ్ గ్రామంలో ఆలస్యంగా వెలుగు చూసింది. ఏప్రిల్ 9న జరిగిన ఈ ఘటనపై బాధితురాలు కుల పెద్దలపై గురువారం పోలీసులకు కంప్లయింట్చేయడంతో విషయం బయటకు తెలిసింది. పోలీసులు వివరాల ప్రకారం, నాత్జోగి కమ్యూనిటీకి చెందిన ఓ మహిళ 2011లో మొదటి పెండ్లి చేసుకోగా, 2015లో భర్త నుంచి డైవర్స్ తీసుకుంది. ఆ తర్వాత 2019లో రెండో పెండ్లి చేసుకుంది. ఈ విషయంపై కుల పంచాయతీ పెద్దలు.. ఆమె సోదరి, బంధువులను పిలిపించి కుల పంచాయతీ సభ్యులు అరటి ఆకులపై ఉమ్మి వేస్తారని, ఆ ఉమ్మును బాధితురాలు నాకాలని తీర్పు ఇచ్చారు. అలాగే లక్ష రూపాయలు జరిమానా చెల్లించాలని చెప్పారు. లేకపోతే కులం నుంచి బహిష్కరిస్తామని హెచ్చరించారు. ఈ విషయాన్ని బంధువులు బాధితురాలికి చెప్పడంతో షాక్కు గురైన ఆమె చోప్డా నగర పోలీస్ స్టేషన్లో పంచాయతీ సభ్యులపై కంప్లయింట్ చేసింది.
